រថយន្តធុនយក្សដឹកទំនិញធ្ងន់បែ.កកង់ក្រឡា.ប់ដេកស្តូក
- ស្វាយរៀង
ខេត្តស្វាយរៀង ៖ រថយន្តធុនធំ១គ្រឿងប្រភេទវ៉េអងដឹកទំនិញលើសចំណុះ បានបែកកង់ក្រឡាប់ដេកស្តូកចាក់ទំនិញចោលទៅលើចិញ្ចើមផ្លូវ តែមិនបង្កឲ្យមានគ្រោះថ្នាក់ដល់អ្នកដំណើរណាម្នាក់ផ្លូវឡើយ ។
គ្រោះថ្នាក់នេះ កើតឡើងកាលពីវេលាម៉ោងប្រមាណ២និង១០នាទីរំលងអធ្រាត្រឈានចូលថ្ងៃទី២៧ ខែតុលា ឆ្នាំ២០២៦ នៅលើកំណាត់ផ្លូវជាតិលេខ១ ស្ថិតក្នុងភូមិអង្គាសដី ឃុំតាសួស ស្រុកស្វាយជ្រំ ។
បើតាមសមត្ថកិច្ចបានឲ្យដឹងថា រថយន្តដែលក្រឡាប់នេះធ្វើដំណើរមកពីទិសខាងលិច ពីរាជធានីភ្នំពេញឆ្ពោះមកក្រុងស្វាយរៀង ដោយដឹកទំនិញលើសទម្ងន់ ។ លុះទៅដល់ចំណុចខាងលើ ស្រាប់តែបែកកង់ បណ្តាលឲ្យក្រឡាប់ចាក់ទំនិញចោលតែម្តង ។
ចំណែកមហាជនលើកឡើងថា រថយន្តប្រភេទវ៉េអង ដឹកទំនិញសំពីងសំពោង ធ្វើចរាចរណ៍ពេលយប់អធ្រាត្រសង្ស័យជាទំនិញគេចពន្ធ ដឹកឆ្លងដែនទៅប្រទេសជិតខាង ព្រោះគ្រាន់តែក្រឡាប់ភ្លាម អ្នកបើកបរក៏ដោះផ្លាកលេខចេញភ្លាមៗដែរ ។
នេះសំណាងហើយដែលក្រឡាប់នៅវេលារំលងអធ្រាត្រ បើពេលថ្ងៃវិញមិនដឹងថាជាយ៉ាងណាទេ ។ ការដឹកទំនិញលើសទម្ងន់បែបនេះ បង្កឲ្យបាក់ស្រុតខូចផ្លូវ និងមានហានិភ័យខ្លាំងណាស់ ។ បញ្ហានេះ ក៏ទាក់ទិនទៅនឹងជញ្ជីងថ្លឹងរថយន្តដឹកលើសចំណុះ ដែលស្ថិតនៅតាមផ្លូវជាតិលេខ១ដែរ ៕



ចែករំលែកព័តមាននេះ