រាជធានីភ្នំពេញ៖ «បងអើយ ខ្ញុំពិតជារំភើបចិត្តណាស់ ព្រោះនេះជាលើកទី១ដែលខ្ញុំបានស្លៀកឈុតជាមគ្គុទេសទេសចរជាថ្មី ក្រោយខានបានពាក់ឯកសណ្ឋាននេះជិតមួយឆ្នាំពេញ» ។ នេះជាការលើកឡើងរបស់លោក ធឿន វុឌ្ឍី មគ្គុទេស…
រាជធានីភ្នំពេញ៖ «បងអើយ ខ្ញុំពិតជារំភើបចិត្តណាស់ ព្រោះនេះជាលើកទី១ដែលខ្ញុំបានស្លៀកឈុតជាមគ្គុទេសទេសចរជាថ្មី ក្រោយខានបានពាក់ឯកសណ្ឋាននេះជិតមួយឆ្នាំពេញ» ។ នេះជាការលើកឡើងរបស់លោក ធឿន វុឌ្ឍី មគ្គុទេស ទេសចរនៅខេត្តសៀមរាបដែលបាត់បង់ចំណូលពីវិស័យមគ្គុទេសទេសចរណ៍ដែលរងគ្រោះយ៉ាងដុនដាបដោយសារតែវិបត្តិជំងឺកូវីដ ១៩ ដែលធ្វើឲ្យចំនួនភ្ញៀវទេសចរបរទេសមកទស្សនាកម្ពុជាថយចុះយ៉ាងខ្លាំងក្លានោះ ។
ប្រាកដណាស់មិនមែនមានតែលោក ធឿន វុឌ្ឍី ទេដែលរងគ្រោះនោះ មានមគ្គុទេសទេសចរមួយចំនួនធំបានបាត់បង់ចំណូលទាំងស្រុងតែម្តង ខណៈសណ្ឋាគារលំដាប់ផ្គាយ និងផ្ទះសំណាក់ល្មមៗបានបិទទ្វារជាបន្តបន្ទាប់នៅខេត្តសៀមរាប ទឹកដីអង្គរ ។ វិស័យទេសចរណ៍កម្ពុជានៅតែបន្តរងផលប៉ះពាល់ដោយពុំទាន់អាចព្យាករណ៍ដឹងថាដល់ពេលណាអាចនឹងងើបឡើងវិញនោះទេ ខណៈអ្នកធ្វើការលើវិស័យទេសចរណ៍បានបង្ហាញនូវក្តីបារម្ភថាវិស័យទេសចរណ៍ប្រឈមមុខនឹងការខ្វះខាតធនធានអ្នកជំណាញទេសចរណ៍ ដោយសារបងប្អូនអ្នកជំនាញទេសចរណ៍ដែលរងគ្រោះដោយសារតែជំងឺកូវីដ ១៩ បានងាកទៅចាប់មុខរបរថ្មី ដូចជាអ្នករត់ម៉ូតូកង់៣ឥណ្ឌា ជាងសំណង់ ឬក៏រៀនធ្វើជាគ្រូទាយជាដើម ។
ថ្លែងប្រាប់អ្នកសារព័ត៌មានកោះសន្តិភាព លោក ធឿន វុឌ្ឍី មគ្គុទេស ទេសចរនៅខេត្តសៀមរាបមានមាឌធំនិងសំបូរស្រអែមស្រស់បានពោលដោយក្តីរំភើបថា ចូលមកដល់ខែមករាដើមឆ្នាំ២០២១នេះ រួបលោកទើបតែមានឱកាសបានគ្រងឯកសណ្ឋានជាអ្នកមគ្គុទេសទេសចរ ដូច្នេះហើយលោកពិតជាសប្បាយចិត្តនិងនឹករលឹកឃើញរាល់សកម្មភាពមុនៗដែលបានធ្វើកន្លងមក។
លោក ធឿន វុឌ្ឍី មគ្គុទេស ទេសចរនៅខេត្តសៀមរាបបានឱ្យដឹងនៅថ្ងៃទី ២៨មករា ឆ្នាំ២០២១នេះថា «ជំងឺកូវីដ១៩ ស្ទើរតែធ្វើឱ្យវិស័យទេសចរណ៍បិទទាំងស្រុកនៅខេត្តសៀមរាប ហើយអ្នកឯកទេសយើងពិតជាជួបការលំបាកខ្លាំង អ្នកខ្លះព្យាយាមទៅស្រុកកំណើនធ្វើអ្វីដែលអាចធ្វើបាន។ អ្នកខ្លះបានចិញ្ចឹមមាន់ ទា ខ្លះទៀតដើរបង់សំណាញ់ ធ្វើការងារសំណង់ជាដើម ឱ្យតែអាចរស់បាន។ សម្រាប់ខ្ញុំដោយសារប្រពន្ធរបស់ខ្ញុំមានមុខរបរលក់ចាប់ហួយតូចមួយខ្ញុំក៏នៅផ្ទះជួយមើលការងារគាត់ និងបានចិញ្ចឹមមាន់ ទា ក្រៅពីនេះដើរបង្រៀនតាមអ្វីដែលអាចធ្វើបាន» ។
បើតាមមគ្គុទេសទេសចររូបនេះ លើកឡើងកន្លងមកក្រសួងទេសចរណ៍ធ្លាប់ផ្សព្វផ្សាយថា មគ្គុទេសទេសចរនៅទូទាំងប្រទេសប្រមាណ៥.០០០នាក់ ហើយក្នុងនោះខេត្តសៀមរាបមានប្រហែលពាក់កណ្តាលនៃចំនួនសរុប។
លោក ធឿន វុឌ្ឍី មានប្រសាសន៍បន្តថា «ចូលដល់ដើមឆ្នាំ២០២១នេះ ខ្ញុំបានពាក់ឯកសណ្ឋាន ដែលបង្ហាញខ្លួនឯងជាមគ្គុទេសទេសចរប្រចាំតំបន់ទើបបានមួយដងប៉ុណ្ណោះ ប៉ុន្តែខ្ញុំមានចិត្តរំភើបនឹងខោអាវនេះណាស់ ធ្វើឱ្យយើងនឹកឃើញដល់ការងារនិងនឹកអ្វីៗដែលយើងធ្លាប់ធ្វើ, នឹកឃើញដល់កាយវិការដែលយើងធ្លាប់សម្តែង ពាក្យពេជន៍ ឬប្រវត្តិសាស្ត្រដែលយើងធ្លាប់រៀបរ៉ាប់ជូនភ្ញៀវ ដែលខកខាតធ្វើអស់ពេលជាយូរហើយ ។ អ៊ីចឹងនៅពេលយើងបានស្លៀកពាក់ឯកសណ្ឋាននេះ វាធ្វើឱ្យអារម្មណ៍របស់យើងមានការសប្បាយចិត្តខ្លាំងមែនទែន»។
បើតាមមគ្គុទេសទេសចររូបនេះបានឲ្យដឹងថារូបលោកបានចាប់ផ្តើអាជីពរបស់ខ្លួនតាំងពីឆ្នាំ២០១៣ តែរងគ្រោះធ្ងន់ដោយសារតែការធ្លាក់ចុះភ្ញៀវទេសចរបរទេស ។ យ៉ាងណាមិញ លោកបានបង្ហាញនូវសុទិដ្ឋិនិយមថា ភ្ញៀវទេសចរខ្មែរនឹងគាំទ្រក្នុងការប្រើប្រាស់សេវាមគ្គុទេសទេសចរ បន្តទៀត ខណៈកាលដើមខែមករាកន្លងមកនេះ លោកមានឱកាសបានគ្រងឈុតមគ្គុទេសទេសចរជាថ្មី ដោយសារតែលោកបានបម្រើសេវាកម្មដល់ភ្ញៀវក្នុងស្រុកប្រមាណ១០០នាក់សម្រាប់ កម្មវិធីដើរព្រៃភ្ជាប់ជាមួយការស្វែងយល់ពីប្រវត្តិសាស្ត្រអង្គរ ដែលជាស្នាដៃដូនតា។
លោកបន្តថា « នៅពេលខាងមុខ ពោលនៅខែ២ឬខែ៣ខាងមុខនេះ ខ្ញុំសង្ឃឹមនិងមានភាពជឿជាក់ថាអាចនឹងបានស្លៀកពាក់ឯកសណ្ឋានមគ្គុទេស ទេសចរណ៍នេះជាបន្តទៀត ប៉ុន្តែថាមានចំនួនតិចឬច្រើនយ៉ាងណាខ្ញុំមិនទាន់ហ៊ាននិយាយ»។
ស្របពេលវិស័យទេសចរណ៍បន្តមិនទាន់មានភាពច្បាស់លាស់ នៅពេលកន្លងមកការគាំទ្រឬការទទួលយកសេវាពីភ្ញៀវបរទេសច្រើនជាងភ្ញៀវក្នុងស្រុក ខណៈភ្ញៀវក្នុងស្រុកភាគច្រើនទៅលេងប្រាសាទអង្គរបានត្រឹមតែថតរូបដោយពុំបានដឹងពីប្រវត្តិនៃការសាងសង់ប្រាសាទអង្គរដោយបែបណានោះទេ។
លោកបានលើកឡើងថា «ចំណេះដឹងដែលយើងខំរៀន ខំទន្ទិញនិងធ្លាប់បានបម្រើសេវាកម្មទៅដល់ភ្ញៀវបរទេសនិងខ្មែរ គឺជនជាតិខ្មែរយើងខ្លួនឯង ហាក់ដូចជាមិនបានស្វែងយល់អំពីអ្វីដែលជារបស់ខ្លួនឯងឱ្យបានច្រើននោះទេ។ ពីមុនយើងបម្រើសេវាដល់ភ្ញៀវបរទេសសឹង៩៩% តែដោយឡែកជូនខ្មែរយើងមានតិចតួច ពេលពួកគាត់មកលេង គាត់ថតតែរូបតិចតួចហើយត្រលប់ទៅវិញ។ ក្នុងនាមយើងជាខ្មែរ មកលេងក្រុងបុរាណរបស់ដូនតាខ្លួនឯង ប៉ុន្តែអត់បានយល់ថាប្រវត្តិដូនតាធ្វើការកសាងប្រាសាទបែបណាខ្លះគាត់អត់ដឹង។កាលណាយើងមកលេងកន្លែងណាមយយើងគួរតែយល់ថា កន្លែងឬទីតាំងនេះជាអ្វី ហើយមានប្រវត្តិយ៉ាងម៉េច ការកសាងគេប្រើមនុស្សប៉ុន្មាននាក់ ហើយអូសថ្មយ៉ាងម៉េច បានអស្ចារ្យអីចឹង?ជាទូទៅភ្ញៀវខ្មែរយើងមិនសូវជាចាប់អារម្មណ៍ចង់ដឹងទេ ។ ប៉ុន្តែកាលថ្ងៃទី២៣កន្លងទៅនៅពេលខ្ញុំបម្រើសេវាជូនភ្ញៀវមកពីភ្នំពេញនៅពេលគាត់បានស្តាប់ហើយគាត់លាន់មាត់ថា Wow… ពិតជាអស្ចារ្យមែន ដែលកាលពីមុនខ្ញុំដើរតែឯងគ្មានដឹងអ្វីសោះ»។
លោកសង្គត់ធ្ងន់ថា នៅពេលភ្ញៀវក្នុងស្រុកមកទទួលសេវាពីមគ្គុទេស ទេសចរណ៍ ធ្វើឱ្យពួកគាត់ចំណេញច្រើន ដោយយើងបានបណ្តុះនូវព្រលឹងជាតិយើងឡើងវិញ។នៅពេលសព្វថ្ងៃហាក់ដូចជា ព្រលឹងដូនតា ព្រលឹងខ្មែរយើងហាក់ដូចនៅក្នុងខ្លួនមិនសូវជាច្រើន។បើសិនជាយើងបានស្តាប់វានឹងធ្វើឱ្យយើងមានមោទនភាព ថាខ្មែរយើងមិនមែនជាអ្នកអន់ឯណា យើងជាមនុស្សមានពូជពង្សជាអ្នកខ្លាំង ហេតុអ្វីយើងទុកចោលបណ្តោយឱ្យមានការបែកបាក់ យើងគួរតែថែរក្សា។ ដូចនេះយើងត្រូវបណ្តុះទាំងការស្រលាញ់ មោទនភាព ហើយធ្វើឱ្យគាត់ស្រលាញ់សម្បត្តិបិតិកភណ្ឌដែលជាស្នាដៃរបស់ដូនតា ហើយគាត់ចូលរួមថែរក្សាទាំងអស់គ្នា។
លោកលើកឡើងថា «បើភ្ញៀវក្នុងស្រុកនៅតែបន្តសកម្មភាពធម្មតាដូចមុនៗ ក្នុងនាមខ្ញុំជាអ្នកមគ្គុទេស ទេសចរណ៍ម្នាក់មានការអាក់អន់ចិត្តខ្លាំងណាស់។ឧទាហរណ៍បើពួកគាត់ដើរកម្សាន្តដោយមិនមែនអ្នកមគ្គុទេស ដោយគាត់មិនបានស្វែងយល់ជូនកាលដំថ្មមួយដុំដែលមានរូបចម្លាក់គួរឱ្យគោរព តែគាត់អត់ដឹងហើយឡើងជាន់លើថ្ម ដើរឆ្លងកាត់ ស្លៀកពាក់ខ្លី ខុសពីបំរាមរបស់អាជ្ញាធរអប្សារា ហេតុអ្វីបានជាយើងខ្មែរ អត់យល់តែភ្ញៀវបរទេស គេមកគេយល់ជាងខ្មែរហេតុអី្វបានជាអីចឹង។ដូចនេះខ្ញុំមានការអន់ចិត្ត ។ នៅពេលកន្លងមកខ្ញុំធ្លាប់បានទៅប្រទេសជុំវិញយើង វៀតណាម ឡាវ ថៃ គេបានប្រើប្រាស់អ្វីដែលជាធនធានរបស់គេហើយគេហាក់មានជាតិនិយមខ្លាំង។ពិសេសជាងទៀតគេស្វែងយល់ថា តំបន់បេតិកភណ្ឌដែលជាទីសក្តារបូជា គេត្រូវមានឥរិយាបទបែបណា ស្លៀកពាក់បែបណា ដល់នៅកន្លែងខ្លះ គេមិនពាក់ទ្រនាប់ជើងផង»។
តាមអ្នកមគ្គុទេស ទេសចរនៅខេត្តសរៀមរាបរូនេះ បានអំពាវនាវចំពោះស្ថាប័នពាក់ព័ន្ធ អាជ្ញាធរខេត្ត ក្រសួងទេសចរណ៍ ពិសេសប្រមុខរាជរដ្ឋាភិបាលគួរជំរុញនូវការផ្សព្វផ្សាយបន្ថែមដល់ប្រជាពលរដ្ឋតាមដែលអាចធ្វើទៅបាន។ធ្វើយ៉ាងណាឱ្យពលរដ្ឋខ្មែរយើងមានមោទនភាពចំពោះជាតិរបស់ខ្លួន ហើយចូលរួមថែរក្សា ផ្តល់តម្លៃ ហើយជាពិសេសមគ្គុទេស ទេសចរណ៍គាត់ជាមនុស្សបម្រើការងារដោយសុច្ចរិតបំផុត ប្រើតែកំលាំង និងចំណេះដឹងពេលវេលារបស់គាត់ដើម្បីផ្សព្វផ្សាយជូនពលរដ្ឋ។ដូចនេះធ្វើយ៉ាងណាឱ្យពលរដ្ឋខ្មែរងាកមកទទួលសេវាកម្មដើម្បីគាំំទ្រគ្នាទៅវិញទៅមក។
លោកបន្តថា «កន្លងមកយើងគ្រប់គ្នាស៊ឹងដឹងថា ចំណូលដែលបានមកពីវិស័យទេសចរណ៍ចង់ជាប់លំដាប់ទីមួយ ជួយដល់កញ្ចប់ថវិកាជាតិដោយសារតែវិស័យនេះ។ប៉ុន្តែនៅពេលវិស័យនេះរងផលប៉ះពាល់ ហាក់មិនទាន់មានដំណោះស្រាយណាមួយសមស្រប សម្រាប់អ្នកដែលធ្លាប់មានគុណបំណាច់ចំពោះវិស័យទេសចរណ៍។សណ្ឋាគារ ផ្ទះសំណាក់ ភោជនីយដ្ឋាន បានបិទអស់ខ្លះហើយ ពិសេសក្រុមមគ្គុទេសដូចពួកខ្ញុំ ដែលជាអ្នកខំផ្សព្វផ្សាយនូវវប្បធម៌ជាតិ តែនៅពេលយើងប៉ះពាល់នេះហាក់មិនទាន់មានចំណាត់ការណាមួយដើម្បីជួយក្រុមពួកខ្ញុំនៅឡើយ។ខ្ញុំគិតថាបើបន្តនៅតែបែបនេះទៀត ពួកខ្ញុំទាំងអស់គ្នាកាត់តែរឹតលំបាក ហើយអាចនឹងធ្វើអ្វីដែលខ្លួនអាចធ្វើបានដើម្បីឱ្យតែរស់»។
លោកជំទាវ ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាមានប្រសាសន៍ថា វិស័យទេសចរណ៍អាចនឹងនៅតែបន្តរងផលប៉ះពាល់ ទោះបីវ៉ាក់សាំងមានហើយក៏ដោយ ការចាក់និងការកំម្ម៉ង់ទិញមកមានដំណាក់កាល ។ដូចនេះយើងមើលឃើញថាផលប៉ះពាល់នៅបន្តអូសបន្លាយតទៅទៀត។
លោកជំទាវលើកឡើងថា« នៅខេត្តសៀមរាបសេវាកម្ម យើងធ្លាប់បម្រើដល់ភ្ញៀវទេសចរនៅក្នុងមួយឆ្នាំៗរាប់លាននាក់ អីចឹងពលរដ្ឋកម្ពុជាក៏មិនអាចមកជួយសង្គ្រោះសេវាកម្មនៅខេត្តសៀមរាបបានដែរ។ដូចនេះយើងមើលឃើញថាប្រសិនបើគ្មានវិធានការបន្ទាន់ណាមួយនោះទេ យើងនឹងបាត់បង់អ្នកជំនាញទេសចរណ៍ ដែលនៅពេលនេះ ពួកគាត់កំពុងស្រវេស្រវារកកិច្ចការងារផ្សេងៗ អ្វីដែលគាត់ធ្វើបានគឺគាត់ធ្វើមិនថាចិញ្ចឹមាន់ ទានោះទេ»។
ប្រធានសមាគមរូបនេះសង្កត់ធ្ងន់ថា «នេះជាក្តីបារម្ភរបស់សមាគមទេសចរណ៍យើង អីចឹងយើងចង់បានការចេញនៅវិធានការណាមួយ ការពារ និងទប់ស្កាត់ពួកគាត់ឱ្យរស់ក្នុងអន្តរកាលមួយនេះ។យើងចង់បានការជួយសង្គ្រោះដល់អ្នកជំនាញទេសចរណ៍ដូចជាជួយផ្តល់ការងារឱ្យពួកគាត់ធ្វើដើម្បីបានប្រាក់ចំណូលផ្គត់ផ្គង់គ្រួសារគាត់បាន ហើយសម្រាប់ម្ចាស់សហគ្រាសនៅក្នុងវិស័យទេសចរណ៍គឺយើងចង់បានការជួយទម្លាក់ប្រាក់កម្ចីដែលមានការប្រាក់ទាបមកឱ្យពួកយើងដើម្បីបន្តនិន្តរភាពយើងបន្តទៀត ព្រោះថាវិស័យធនាគារគាត់លែងផ្តល់កម្ចីឱ្យទៀតហើយ ទោះបីមិនមានការប្រកាសជាផ្លូវការណាមួយក្តី។លើសពីនេះម្ចាស់សហគ្រាសប្រឈមមុខការចំណាយគ្រប់បែបយ៉ាងហើយ យើងត្រូវចំណាយលើពន្ធដែលបានជំពាក់បំណុលចាស់ៗថែមទៀត យើងពិតជាពិបាកមែនទែន អីចឹងយើងចង់បានឱ្យរាជរដ្ឋាភិបាលជួយដោះស្រាយ ឬយោគយល់នៅចំណុចនេះ »៕
ចែករំលែកព័តមាននេះ