សំណុំរឿងលោក កឹម សុខា ជាឆន្ទានុសិទ្ធរបស់តុលាការ និងមិនជារឿងអាទិភាព
- ភ្នំពេញ
រាជធានីភ្នំពេញ ៖ អ្នកនាំពាក្យក្រសួងយុត្តិធម៌ លោក ជិន ម៉ាលីន បានបញ្ជាក់ថា សំណុំរឿងរបស់លោក កឹម សុខា…
រាជធានីភ្នំពេញ ៖ អ្នកនាំពាក្យក្រសួងយុត្តិធម៌ លោក ជិន ម៉ាលីន បានបញ្ជាក់ថា សំណុំរឿងរបស់លោក កឹម សុខា គឺជាសន្ទានុសិទ្ធិរបស់តុលាការ ហើយការសុំបើកសវនាការមិនមែនជាអាទិភាពនោះទេ ព្រោះជនត្រូវចោទកំពុងនៅក្រៅឃុំ ។
ការបញ្ជាក់របស់អ្នកនាំពាក្យក្រសួងយុត្តិធម៌ បន្ទាប់ពីក្រុមមេធាវីលោក កឹម សុខា បានស្នើជាលើកទី៣ ទៅកាន់សាលាដំបូងរាជធានីភ្នំពេញ ដើម្បីឲ្យបើកដំណើរការរឿងក្តីព្រហ្មទណ្ឌ លោកកឹម សុខា ឲ្យបានឆាប់ កាលពេលថ្មីៗនេះ ។
លោកជិន ម៉ាលីន អ្នកនាំពាក្យក្រសួងយុត្តិធម៌បានបញ្ជាក់ នៅថ្ងៃទី២៨ មករា ឆ្នាំ២០២១ថា ៖«ខ្ញុំសូមជូនចំណុចអំពីទិដ្ឋភាពច្បាប់ និងបច្ចុប្បន្នភាពករណីសំណុំរឿង កឹម សុខា ថាតើហេតុអ្វីបានសវនាការសំណុំរឿងផ្សេងអាចបន្តដំណើរការទៅបាន ហើយសំណុំរឿង កឹម សុខា បែរជានៅតែអូសបន្លាយពេលវេលាទៅវិញ គឺ សំណុំរឿង កឹម សុខា កំពុងស្ថិតក្នុងចំណាត់ការរបស់តុលាការ ហើយការសម្រេចបែបណា គឺជាឆន្ទានុសិទ្ធិរបស់តុលាការ ដែលជាស្ថាប័នឯករាជ្យ ។
អ្នកនាំពាក្យបន្តថា លោក កឹម សុខា បាន និងកំពុងប្រើប្រាស់សិទ្ធិក្នុងការការពារខ្លួនយ៉ាងពេញលេញតាមផ្លូវច្បាប់ ដោយមានមេធាវីការពារដល់ទៅ៥ រូប ។ សវនាការលើករណី កឹម សុខា នាពេលកន្លងមកត្រូវបានធ្វើឡើងជាសាធារណៈ និងប្រកបដោយតម្លាភាព ដោយអនុញ្ញាតឱ្យសង្គមស៊ីវិល តំណាងអង្គទូតក៏ដូចជា សាធារណជនផ្សេងទៀតបានចូលរួមស្តាប់ ។ ឧទាហរណ៍ ករណីការពិនិត្យផ្ទៀងផ្ទាត់ភស្តុតាងជា Video Clip ដែលមេធាវីរបស់ កឹម សុខា អះអាងថាជា Video មិនពិត ។ ប៉ុន្តែក្រោយពេលផ្ទៀតផ្ទាត់បង្ហាញថា Video Clip ដែលផ្តល់ដោយមេធាវីរបស់ កឹម សុខា គឺដូចគ្នានឹង Video Clip ដែលជាភស្តុតាងនៅក្នុងសំណុំរឿង ។
ខ្លឹមសារជារួមនៃ Video Clip នេះ កឹម សុខា បាននិយាយថា «គាត់ត្រូវបានរៀបចំបណ្តុះបណ្តាល និងឧបត្ថម្ភគាំទ្រដោយបរទេស ដើម្បីផ្តួលរំលំរាជរដ្ឋាភិបាលកម្ពុជា» ។ លោកបន្តថា ប្រសិនបើករណីដូចលោក កឹម សុខា បែបនេះកើតឡើងនៅប្រទេសផ្សេងក៏ប្រទេសនោះនឹងអនុវត្តវិធានការច្បាប់ដូចករណីកម្ពុជាផងដែរ ។ ឧទាហរណ៍ ករណីមានការចោទប្រកាន់ថា Donald Trump បានចូលដៃជាមួយ Russia ក្នុងការបោះឆ្នោតនៅសហរដ្ឋអាមេរិកនាពេលកន្លងមកក៏សហរដ្ឋអាមេរិកបាន និងកំពុងចាត់ការស៊ើបអង្កេតផងដែរ ។
លោកគូសបញ្ជាក់ថា៖« ដោយករណី កឹម សុខា គឺមិនមានការឃុំខ្លួននោះទេ ហេតុដូចនេះ ការបើកសវនាការលើសំណុំរឿងនេះ គឺមិនមែនជាអាទិភាពនោះទេ ។ អាទិភាពពិតប្រាកដ គឺការបើកសវនាការចំពោះសំណុំរឿងដែលមានអ្នកជាប់ឃុំ ដើម្បីជៀងវាងកុំឱ្យមានការឃុំខ្លួន ហួសកាលកំណត់របស់ច្បាប់ ជាពិសេសស្របពេលដែលតុលាការកំពុងអនុវត្តយុទ្ធនាការដោះ ស្រាយការកកស្ទះសំណុំរឿងព្រហ្មទណ្ឌ ក្នុងគោលដៅឈានទៅរកការដោះស្រាយបញ្ហាចង្អៀតណែនក្នុងពន្ធនាគារ ។ ហេតុដូចនេះ ប្រសិនបើ កឹម សុខា ស្ថិតក្នុងការឃុំ នោះសវនាការសំណុំរឿងនេះក៏នឹងត្រូវយកមកចាត់ការជាអាទិភាពផងដែរ» ។
សូមជម្រាបថា ក្រុមមេធាវីលោកកឹម សុខា អតីតប្រធានគណបក្សសង្គ្រោះជាតិ រួមមានលោក ចាន់ ចេន, លោក ផែងហេង, លោក អាង ឧត្តម និងអ្នកស្រី ម៉េង សុភារី បានដាក់លិខិតទៅប្រធានសាលាដំបូងរាជធានីភ្នំពេញស្នើសុំឱ្យតុលាការបន្តសវនាការលើសំណុំរឿងនេះឡើងវិញ បានបញ្ជាក់ថា ៖«យើងខ្ញុំជាសហមេធាវីការពារក្តីជូនលោកកឹម សុខា សូមជម្រាបជូនលោកចៅក្រមប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញថា ដោយសារស្ថានភាពជំងឺកូវីដ១៩ រាជរដ្ឋាភិបាលបានគ្រប់ក្រងបានទាំងស្រុងហើយតាមរយៈក្រសួងសុខាភិបាលយើងស្នើសុំតុលាការជំនុំជម្រះដំណើរការវិញ ដូចការជំនុំជម្រះរឿងក្តីដទៃទៀតដែរ» ។
ក្រុមមេធាវីលោក កឹម សុខាក៏បានលើកឡើងថាការស្នើសុំនេះ ដើម្បីជៀសវាងការបន្តផ្អាកដំណើរការនីតិវិធី ជាពិសេសនោះ ដើម្បីជៀសវាងការបន្តរំលោភបំពានលើសិទ្ធិក្នុងការ ទទួលបានការជំនុំជម្រះក្តីឆាប់រហ័ស និងយុត្តិរបស់លោកកឹម សុខា ។ ក្រុមមេធាវីបានគូសបញ្ជាក់ថាការស្នើសុំនេះជាលើកទី៣ហើយ ដើម្បីឲ្យតុលាការបន្តសវនាការឡើងវិញ ឲ្យបានឆាប់បំផុត ។
ជាមួយគ្នានោះដែរ ក្រុមមេធានីដដែលក៏បានកត់សម្គាល់ថា សំណុំរឿងព្រហ្មទណ្ឌលេខ ៥៦៤២ ចុះថ្ងៃទី៣ ខែកញ្ញា ឆ្នាំ២០១៧ របស់សាលាដំបូងរាជធានីភ្នំពេញ ជំនុំជម្រះករណី លោកកឹម សុខា គឺបានធ្វើការដេញដោលសួរលោកកឹម សុខា យ៉ាងច្រើនអស់ហើយ ។ ការដាក់កម្មវិធីបន្តសវនាការលើសំណុំរឿងចាស់នេះ មិនគួរអូសបន្លាយទៀតទេ ព្រោះថាក្រុមប្រឹក្សជំនុំជម្រះមេធាវី និងភាគីពាក់ព័ន្ធ គឺមានសមាសភាពស្រេចហើយ ។ ក្រុមមេធាវីបញ្ជាក់ថា ក្នុងពាក្យស្នើសុំយ៉ាងដូច្នេះថា៖«ការទុកសំណុំរឿងចាស់ចោលយូរហួសហេតុពេក ដែលអង្គសវនាការបានធ្វើការដេញចដោលរួចហើយនោះ មិនមែនជាជម្រើស ល្អទេ និងគ្មានទម្លាប់រឿងក្តីយកមកដេញដោលរួចទុកចោលយ៉ាងយូរនេះដែរ ។ រឿងនេះគួរតែ ត្រូវបានដាក់កម្មវិធីជាប្រក្រតីដូចបណ្តាលរឿងក្តីផ្សេងទៀត ដែលតុលាការកំពុងដំណើរកា រកម្មវិធីសព្វថ្ងៃ» ។
ក្រុមមេធាវីដដែលក៏បានលើកឡើងថា សំណុំរឿងខាងលើ គិតមកដល់ពេលនេះមានថិរ វេលាជាង៣ឆ្នាំហើយ ដែលតុលាការមិនទាន់បានបញ្ចប់ដំណើរការនីតិវិធីនៅសាលាដំបូងនៅឡើយ ។ រយៈបេលនេះគឺយូរហួសហេតុពេល ។ ការទុកសំណុំរឿងដែលបានដេញដោលចោល យូរ និងអូសបន្លាយដំណើរការជំនុំជម្រះដោយមិនមានច្បាប់ និងនីតិវិធីសំអាងបែបនេះបានធ្វើឲ្យប៉ះពាល់យ៉ាងធ្ងន់ធ្ងរដល់សិទ្ធិក្នុងការទទួលបានការជំនុំជម្រះក្តីឆាប់រហ័ស និងយុត្តិធម៌របស់លោកកឹម សុខា ៕
ចែករំលែកព័តមាននេះ