រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក៣នាក់ ត្រូវបានជនរងគ្រោះជាម្ចាស់ផ្ទះចាប់ឃាត់ខ្លួនបាន រួចប្រគល់ឱ្យសមត្ថកិច្ចប៉ុស្តិ៍នគរបាលស្ទឹងមានជ័យ២ ធ្វើការសាកសួរ បន្ទាប់ពីជនសង្ស័យរូបនេះធ្វើសកម្មភាពគាស់ផ្ទះបំរុងលួចទ្រព្យសម្បត្តិតែមិនបានសម្រេច កាលពីវេលាម៉ោង១រំលងអធ្រាត្រឈានចូលថ្ងៃទី២៨ ខែមករា ឆ្នាំ២០២១ នៅមុខផ្ទះយីហោ «ដាវី ឆាយណាស្តរ» លក់សំលៀកបំពាក់កុមារា បុរស-នារី ស្ថិតនៅតាមបណ្ដោយផ្លូវ៣៧១ ក្នុងសង្កាត់ស្ទឹងមានជ័យ២ ខណ្ឌមានជ័យ ។
ជនសង្ស័យដែលឃាត់ខ្លួនខាងលើមានឈ្មោះ លឿន ទំ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅវត្តពោធិ៍ញ្ញាណ ។
តាមប្រភពពីជនរងគ្រោះសុំមិនបញ្ចេញឈ្មោះបានឲ្យដឹងថា មុនពេលកើតហេតុ និងឈានទៅដល់ការឃាត់ខ្លួនជនសង្ស័យរូបនេះបាន គឺកន្លែងរបស់គាត់ធ្លាប់មានជនសង្ស័យធ្វើសកម្មភាពគាស់ផ្ទះលួចទ្រព្យសម្បត្តិម្ដងរួចមកហើយ ។ ហើយនៅយប់ថ្ងៃកើតហេតុ គឺនៅពេលព្រលប់ពួកគាត់បានបិទហាងសំរាកដូចសព្វដង លុះមកដល់ម៉ោងកើតហេតុក៏មានជនសង្ស័យបានមកគោះទ្វារ និង បាញ់ទឹកចូលទៅក្នុងផ្ទះរបស់ពួកគាត់។
ជនរងគ្រោះបន្តថា ប៉ុន្តែចៃដន្យ ពួកគាត់បានបើកមើលបានតាមកាមេរ៉ាសុវត្ថិភាព ក៏ប្រទះឃើញជនសង្ស័យមានគ្នាចំនួន៣នាក់ កំពុងតែមានបំណងគាស់ផ្ទះរបស់ពួកគាត់ ទើបពួកគាត់បានទូរស័ព្ទប្រាប់បងប្អូននៅខាងក្រៅឱ្យបើករថយន្តមកស្ទាក់ចាប់បានជនសង្ស័យម្នាក់ភ្លាមៗនៅមុខផ្ទះ ចំណែក២នាក់ទៀតក៏បានរត់គេចខ្លួនបាត់ស្រមោលអស់ ។
ប្រភពដដែលបន្តទៀតថា បន្ទាប់ពីឃាត់ខ្លួនជនសង្ស័យបានម្នាក់ហើយ ពួកគាត់ក៏បានរាយការណ៍ប្រាប់សមត្ថកិច្ចឱ្យមកទទួលយកទៅសាកសួរន ប៉ុស្តិ៍នគរបាលស្ទឹងមានជ័យ២ តែម្តង ។
បន្ទាប់ពីចាប់ខ្លួនហើយ ជនសង្ស័យរូបនេះក៏បានសារភាពថា «រូបគេពិតជាបានមកធ្វើសកម្មភាពគាស់ផ្ទះរបស់ជនរងគ្រោះពិតប្រាកដ» ។ ហើយជនសង្ស័យនេះក៏បាននិយាយទៀតថា «ទីតាំងនេះ ពួកគេធ្លាប់ធ្វើសកម្មភាពគាស់យកទ្រព្យសម្បត្តិម្ដងរួចមកហើយ»។
ក្រោយពេលកើតហេតុ ជនរងគ្រោះបានទៅដាក់ពាក្យបណ្ដឹង ដើម្បីឱ្យសមត្ថកិច្ចចាត់ការតាមនីតិវិធី ។ ចំណែកជនសង្ស័យវិញ យោងតាមពាក្យបណ្ដឹង និងចម្លើយសារភាពត្រូវបានសមត្ថកិច្ចកសាងសំណុំរឿង រួចបញ្ជូនខ្លួនទៅអធិការដ្ឋាននគរបាលខណ្ឌមានជ័យ ដើម្បីចាត់ការបន្តតាមនីតិវិធី ៕
ចែករំលែកព័តមាននេះ