រាជធានីភ្នំពេញ ៖ ក្រុមមេធាវីលោក កឹម សុខា បានដាក់ពាក្យស្នើសុំតុលាការសាលាដំបូងរាជធានីភ្នំពេញបន្តបើកសវនាការសំណុំរឿងកូនក្តីរបស់ខ្លួនឲ្យបានឆាប់បំផុតនូវសំណុំរឿងព្រហ្មទណ្ឌ លេខ៥៦៤២ ចុះថ្ងៃទី៣ ខែកញ្ញា ឆ្នាំ២០១៧…
រាជធានីភ្នំពេញ ៖ ក្រុមមេធាវីលោក កឹម សុខា បានដាក់ពាក្យស្នើសុំតុលាការសាលាដំបូងរាជធានីភ្នំពេញបន្តបើកសវនាការសំណុំរឿងកូនក្តីរបស់ខ្លួនឲ្យបានឆាប់បំផុតនូវសំណុំរឿងព្រហ្មទណ្ឌ លេខ៥៦៤២ ចុះថ្ងៃទី៣ ខែកញ្ញា ឆ្នាំ២០១៧ ។
យោងតាមពាក្យស្នើសុំរបស់ក្រុមមេធាវីលោកកឹម សុខា អតីតប្រធានគណបក្សសង្គ្រោះជាតិ រួមមានលោក ចាន់ ចេន, លោក ផែងហេង, លោក អាង ឧត្តម និងអ្នកស្រី ម៉េង សុភារី បានដាក់លិខិតទៅប្រធានសាលាដំបូងរាជធានីភ្នំពេញស្នើសុំឱ្យតុលាការបន្តសវនាការលើសំណុំរឿងនេះឡើងវិញ បានបញ្ជាក់ថា៖«យើងខ្ញុំជាសហមេធាវីការពារក្តីជូនលោក កឹម សុខា សូមជម្រាបជូនលោកចៅក្រមប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញថា ដោយសារស្ថានភាពជំងឺកូវីដ១៩ រាជរដ្ឋាភិបាលបានគ្រប់គ្រងបានទាំងស្រុងហើយ តាមរយៈក្រសួងសុខាភិបាលយើងស្នើសុំតុលាការជំនុំជម្រះដំណើរការវិញ ដូចការជំនុំជម្រះរឿងក្តីដទៃទៀតដែរ» ។
ក្រុមមេធាវីលោក កឹម សុខា ក៏បានលើកឡើងថា ការស្នើសុំនេះ ដើម្បីជៀសវាងការបន្ត ផ្អាកដំណើរការនីតិវិធី ជាពិសេសនោះដើម្បីជៀសវាងការបន្តរំលោភបំពានលើសិទ្ធិក្នុងការទទួលបានការជំនុំជម្រះក្តីឆាប់រហ័ស និងយុត្តិធម៍របស់លោកកឹម សុខា ។ ក្រុមមេធាវីបានគូសបញ្ជាក់ថា ការស្នើសុំនេះជាលើកទី៣ហើយ ដើម្បីឲ្យតុលាការបន្តសវនាការឡើងវិញ ឲ្យបានឆាប់បំផុត ។
ជាមួយគ្នានោះដែរ ក្រុមេវធានីដដែលក៏បានកត់សម្គាល់ថា សំណុំរឿងព្រហ្មទណ្ឌលេខ ៥៦៤២ ចុះថ្ងៃទី៣ខែកញ្ញា ឆ្នាំ២០១៧ របស់សាលាដំបូងរាជធានីភ្នំពេញ ជំនុំជម្រះករណី លោកកឹម សុខា គឺបានធ្វើការដេញដោលសួរលោកកឹម សុខា យ៉ាងច្រើនអស់ហើយ ។ ការដាក់កម្មវិធីបន្តសវនាការលើសំណុំរឿងចាស់នេះមិនគួរអូសបន្លាយទៀតទេ ព្រោះថា ក្រុមប្រឹក្សជំនុំជម្រះមេធាវី និងភាគីពាក់ព័ន្ធ គឺមានសមាសភាពស្រេចហើយ ។
ក្រុមមេធាវីបញ្ជាក់ថា ក្នុងពាក្យស្នើសុំយ៉ាងដូច្នេះថា ៖«ការទុកសំណុំរឿងចាស់ចោលយូរហួសហេតុពេក ដែលអង្គសវនាការបានធ្វើការដេញចដោលរួចហើយនោះ មិនមែនជាជម្រើសល្អទេ និងគ្មានទម្លាប់រឿងក្តីយកមកដេញដោលរួចទុកចោលយ៉ាងយូរនេះដែរ ។ រឿងនេះគួរតែ ត្រូវបានដាក់កម្មវិធីជាប្រក្រតីដូចបណ្តាលរឿងក្តីផ្សេងទៀត ដែលតុលាការកំពុងដំណើរការកម្មវិធីសព្វថ្ងៃ» ។ ក្រុមមេធាវីដដែលក៏បានលើកឡើងថាសំណុំរឿងខាងលើ គិតមកដល់ពេលនេះមានថិរវេលាជាង៣ឆ្នាំហើយ ដែលតុលាការមិនទាន់បានបញ្ចប់ដំណើរការនីតិវិធីនៅសាលាដំបូងនៅឡើយ ។ រយៈពេលនេះ គឺយូរហួសហេតុពេក ។
ការទុកសំណុំរឿងដែលបានដេញដោលចោលយូរ និងអូសបន្លាយដំណើរការជំនុំជម្រះដោយមិនមានច្បាប់ និងនីតិវិធីសំអាងបែបនេះ បានធ្វើឲ្យប៉ះពាល់យ៉ាងធ្ងន់ធ្ងរដល់សិទ្ធិក្នុងការទទួលបានការជំនុំជម្រះក្តីឆាប់រហ័ស និងយុត្តិធម៌របស់លោកកឹម សុខា ។ មេធាវីគូសបញ្ជាក់ថា ៖«សិទ្ធិទទួលបានកាជំនុំជម្រះឆាប់រហ័ស និងយុត្តិធម៌ គឺជាគោលការណ៍មូលដ្ឋាននៃសង្គមដ៏ត្រឹមត្រូវ និងដើរតួនាទីយ៉ាងសំខាន់ក្នុងការបង្ការភាពអយុត្តិធម៌ ដូចមានចែងក្នុងមាត្រា១៤ ចំណុច«គ» នៃកតិកាសញ្ញាស្តីពីសិទ្ធិពលរដ្ឋ និងសិទ្ធិនយោបាយដែលចែងថា«ជនគ្រប់រូបត្រូវបានជំនុំជម្រះដោយឥតពន្យាពេល» ។
សូមជម្រាបថាសំណុំរឿងក្បត់ជាតិរបស់លោក កឹម សុខា ត្រូវបានតុលាការបើកសវនាការ នៅថ្ងៃពុធ ទី១៥ខែមករា ឆ្នាំ២០២០ បន្ទាប់ពីប្រធានអតីតគណបក្សសង្គ្រោះជាតិរូបនេះត្រូវបានចាប់ខ្លួន កាលពីដើមខែកញ្ញា ឆ្នាំ២០១៧ ក្រោមបទចោទ «សន្និដ្ឋិភាព» ជាមួយបរទេស ។
លោក កឹម សុខា ក្រោយមកក៏ត្រូវបន្ធូរបន្ថយការឃុំខ្លួនផងដែរ ដោយប្តូរពីពន្ធនាគារមកនៅក្នុងផ្ទះវិញ ក្រោមលក្ខខណ្ឌផ្លូវច្បាប់មួយចំនួន ។ បច្ចុប្បន្ននេះត្រូវបានគេសង្កេតឃើញថា បានដើរចុះតាមបណ្តាខេត្តមួយចំនួនទៅជួបជាមួយប្រជាពលរដ្ឋ និងចែកអំណោយដល់ប្រជាពលរដ្ឋក្រីក្រ ក៏ដូចផ្តល់សំភារៈមួយចំនួន ដល់ពលរដ្ឋដែលកំពុងធ្វើចត្តាឡីស័កនៅតាមមណ្ឌលចត្តាឡីស័កមួយចំនួនផងដែរ៕
ចែករំលែកព័តមាននេះ