ខេត្តបន្ទាយមានជ័យ ៖ ប្រជាពលរដ្ឋខ្មែរត្រឡប់ពីប្រទេសថៃដែលត្រូវបានធ្វើចត្តាឡីស័ករយៈពេល១៤ថ្ងៃ ក្នុងខេត្តបន្ទាយមានជ័យមានចំនួន៩,៧៦៩នាក់ ហើយវិជ្ជមានចំនួន៣៧នាក់ រហូតដល់ថ្ងៃទី២០ ខែមករា ឆ្នាំ២០២១។ លោកវេជ្ជបណ្ឌិត រឿន សុធី អនុប្រធានមន្ទីសុខាភិបាលខេត្តបន្ទាយមានជ័យបានប្រាប់ល្ងាចថ្ងៃទី២០ ខែមករា ឆ្នាំ២០២១ថា៖
រហូតដល់ថ្ងៃទី២០ ខែមករា ឆ្នាំ២០២១នេះប្រជាពលរដ្ឋខ្មែរដែលត្រូវបានត្រឡប់ពីប្រទេសថៃ និងភាគីថៃចាប់បញ្ជូនមកមានចំនួន៩,៧៦៩នាក់ស្រីចំនួន៤,៣៣៧នាក់ ហើយត្រូវបានធ្វើតេស្តយកសំណាកមានចំនួន៩,៥១២នាក់ ស្រី៤,១៨៤នាក់ និងអ្នកដែលត្រូវបញ្ចប់ធ្វើចត្តាឡីស័ករយៈពេល១៤ថ្ងៃត្រឡប់ទៅគេហដ្ឋានវិញមានចំនួន៦,០៦៣នាក់ ស្រី២,៦២០នាក់ អ្នកដែលនៅធ្វើចត្តាឡីស័កចំនួន៣,៧០៦នាក់ ស្រី១,៧១៧នាក់។
លោកបានបញ្ជាក់ថា៖ រហូតដល់ល្ងាចថ្ងៃទី២០ ខែមករា ឆ្នាំ២០២១នេះក្រសួងសុខាភិបាលបានប្រកាសប្រជាពលរដ្ឋខ្មែរដែលត្រឡប់ពីប្រទេសថៃកំពុងធ្វើចត្តាឡីស័ករយៈពេល១៤ថ្ងៃក្នុងខេត្តបន្ទាយមានជ័យ ដែលធ្វើតេស្តសំណាកវិជ្ជមានកូវីដ-១៩ មានចំនួន៣៧នាក់ ស្រី២៥នាក់ បុរស១២នាក់។ លោក លី សុវណ្ណរិទ្ធ អភិបាលស្រុកអូរជ្រៅបានបញ្ជាក់ថា៖
រហូតដល់ម៉ោង៥ល្ងាច ថ្ងៃទី២០ ខែមករា ឆ្នាំ២០២១នេះ ប្រជាពលរដ្ឋខ្មែរត្រឡប់ពីប្រទេសថៃ និងភាគីថៃចាប់បញ្ចូនតាមច្រកអូរបីជាន់ ស្រុកអូរជ្រៅ មានចំនួន១៥១នាក់ ស្រី៧៦នាក់ ដែលត្រូវបានត្រួតពិនិត្យ និងធ្វើចត្តាឡីស័កហើយបញ្ជូនតាមរថយន្តក្រសួងការពារជាតិមកដាក់មណ្ឌលធ្វើចត្តាឡីស័ករយៈពេល១៤ថ្ងៃនៅក្នុងខេត្តបន្ទាយមានជ័យ៕ ដោយ ៖ ប៊ុន ធឿន
ចែករំលែកព័តមាននេះ