រាជធានីភ្នំពេញ ៖ លោក សុង លី ស្នងការរងនគរបាលរាជធានីភ្នំពេញ បានលើកឡើងថា អនុវត្តតាមផែនការណែនាំ កម្លាំងនគរបាលស្នងការនគរបាលរាជធានីភ្នំពេញ បានធ្វើការឃាត់យានយន្តចំនួន៦០គ្រឿង និងបានធ្វើបច្ចុប្បន្នភាពបានចំនួន៤០គ្រឿង ប៉ុន្តែទោះបីជាមានការណែនាំថា ឱ្យអប់រំ និងប្ដូរស៊ីម៉ាំងមកជាធម្មតាវិញ និងឱ្យពួកគាត់ត្រឡប់ទៅគេហដ្ឋានវិញនោះក្តី តែយានយន្តដែលបានឃាត់ទុកទាំងនោះ នៅមិនទាន់អនុញ្ញតឱ្យពួកគាត់ត្រឡប់ទៅវិញអស់នោះទេ ដោយសារតែម៉ូតូមួយចំនួនមិនទាន់មានស៊ីម៉ាំង ដើម្បីធ្វើការផ្លាស់ប្ដូរ។
លោក សុង លី ស្នងការរងរាជធានីភ្នំពេញ មានប្រសាសន៍បែបនេះនៅក្នុងកិច្ចប្រជុំស្តីពី ការងារគ្រប់គ្រង និងវិធានការទប់ស្កាត់ ម៉ូតូ និងរថយន្តបំពាក់បំពង់ស៊ីម៉ាំងប្រែន នៅសាលារាជធានីភ្នំពេញ នាព្រឹកថ្ងៃទី២០ ខែមករា ឆ្នាំ២០២១ ស្ថិតក្នុងអធិបតីភាព លោក ឃួង ស្រេង អភិបាលនៃគណៈអភិបាលរាជធានីភ្នំពេញ ។
លោកឃួង ស្រេង បានមានប្រសាសន៍ថា ចំពោះវិធានការស៊ីម៉ាំងប្រែននេះ អាជ្ញាធរត្រូវតែអនុវត្តឲ្យបានម៉ឺងម៉ាត់ ចំពោះយានយន្តគ្រប់ប្រភេទ មិនថាម៉ូតូ ឬរថយន្តនោះទេ គឺឲ្យតែមានសំឡេងរំខានខុសពីធម្មតា គឺយើងត្រូវតែឃាត់ទុក ណែនាំអប់រំ និងឲ្យពួកគាត់ដោះដូរមកជាបំពង់ស៊ីម៉ាំងធម្មតាវិញ ទើបអនុញ្ញាតឲ្យពួកគាត់ត្រឡប់ទៅវិញបាន ។
លោក ឃួង ស្រេង បន្តថា ហើយដើម្បីអនុវត្តឲ្យបានជោគជ័យ អាជ្ញាធរខណ្ឌ១៤ និងមានឧបករណ៍វាស់សំឡេងក្នុង១ខណ្ឌ២ទៅ៣គ្រឿង ដើម្បីឱ្យអាជ្ញាធរ និងកម្លាំងមានសមត្ថកិច្ចរបស់ខណ្ឌនីមួយមានលទ្ធភាពក្នុងការឃាត់ វាស់សំលេងយានយន្តទាំងនោះ។
លោកបន្តថា រាជធានីភ្នំពេញ ត្រូវតែមានសណ្ដាប់ធ្នាប់ មានភាពស៊ីវីល័យ ដូច្នេះអាជ្ញាធរទាំងអស់ត្រូវមានវិធានការជុំវិញរ៉ឺម៉កដឹកសំពីងសំពោងមិនអនុញ្ញាតឲ្យពួកគាត់ដឹកជញ្ជូនចូលមកកណ្ដាលរាជធានីនោះទេ ។ សម្រាប់ជំហានដំបូង រ៉ឺម៉កម៉ូតូដឹកសំពីងសំពោងនេះ អាជ្ញាធរត្រូវឃាត់ ដើម្បីធ្វើកិច្ចសន្យាអប់រំជាលើកទី១ ទើបអនុញ្ញាតឲ្យពួកគាត់ត្រឡប់ទៅវិញ ។ តែបើមានជាលើកទី២ ត្រូវតែធ្វើការឃាត់ពួកគាត់ទុក វិធានការនេះដើម្បីធ្វើយ៉ាងណាឱ្យរាជធានីភ្នំពេញរបស់យើងកាន់តែមានសោភ័ណភាព មានសណ្ដាប់ធ្នាប់សាកសមជាទីក្រុងដែលមានភាពស៊ីវិល័យ។
លោកឃួង ស្រេង បានធ្វើការណែនាំអោយអាជ្ញាធរខណ្ឌទាំង១៤ និងកម្លាំងមានសមត្ថកិច្ចពាក់ព័ន្ធទាំងអស់អនុវត្តវឱ្យតឹងរឹងបំផុត ចំពោះយានយន្តដែលបំពាក់ស៊ីម៉ាំងខ្លាំងរំខានទៅដល់បងប្អូនប្រជាពលរដ្ឋនៅក្នុងរាជធានីភ្នំពេញ ខណៈដែលក្រសួងមហាផ្ទៃបានចេញសេចក្តីណែនាំមួយជុំវិញបញ្ហានេះ ដើម្បីឲ្យអាជ្ញាធរមានសមត្ថកិច្ចទាំងអស់អនុវត្តឲ្យបានម៉ឺងម៉ាត់ និងមិនមានការលើកលែងឡើយ។
លោក ឃួង ស្រេង ក៏បានជំរុញឲ្យអាជ្ញាធរខណ្ឌទាំងអស់រៀបចំសណ្ដាប់ធ្នាប់សាធារណៈឲ្យកាន់តែប្រសើរជាងមុន ទទួលបានការគាំទ្រពីសំណាក់បងប្អូនប្រជាពលរដ្ឋដែលរស់នៅក្នុងរាជធានីភ្នំពេញ៕
ចែករំលែកព័តមាននេះ