សហរដ្ឋអាមេរិក ៖ ប៉ូលិសអាមេរិករាយការណ៍នាថ្ងៃទី១៦ ខែមករា ឆ្នាំ២០២១ថា បុរសម្នាក់ប្រដាប់ដោយអាវុធ ត្រូវបានចាប់ខ្លួនកាលពីថ្ងៃទី១៥ ខែមករា នៅក្រុងវ៉ាស៊ិនតោន ខណៈរូបគេ ស្វែងរកឆ្លងកាត់ចំណុចត្រួតពិនិត្យជាច្រើន នៅជិតវិមានកាពីតូល ដែលនៅទីនោះ លោកចូបៃដិន ត្រូវធ្វើសច្ចាប្រណិធាន ចូលកាន់តំណែងនាប៉ុន្មានថ្ងៃខាងមុននេះទៀត។
បុរសឈ្មោះ WESLEY ALLEN BEELER មានដើមកំណើតនៅរដ្ឋវៀជីនៀ កាលពីយប់ថ្ងៃទី១៥ ខែមករា បានទៅដល់ចំណុចត្រួតពិនិត្យមួយ នៅក្បែរវិមានកាពីតូល។ ក្រោយការលុកលុយអុកឡុក របស់ពួកបាតុករគាំទ្រលោកដូណាល់ ត្រាំមក វិមានកាពីតូលពេលនេះត្រូវបានពង្រឹងសន្តិសុខខ្លាំងបំផុត ជាមួយការរាំងផ្ទាំងបេតុងនិងដាក់រាយលួសបន្លា។
អាជ្ញាធរខ្លាចកើតមានចលាចលថ្មីៗ ពេលលោកបៃដិនត្រូវធ្វើសច្ចាប្រណិធានចូលកាន់តំណែង នាថ្ងៃទី២០ ខែមករា នាពេលខាងមុខនេះ។ នៅវិមានកាពីតូល កងកម្លាំងឆ្មាំជាតិអាមេរិកក៏ត្រូវបានដាក់ពង្រាយច្រើនដែរ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ