ខេត្តស្ទឹងត្រែង ៖ តាមប្រភពព័ត៌មានបានអោយដឹងថា ខ្មាន់កាំភ្លើងដែលបានបាញ់សម្លា.ប់នាយរងព្រហ្មទណ្ឌកម្រិតស្រាលរាជធានីភ្នំពេញមួយរូបដោយមិនញញើតដៃ រួចគេចខ្លួនពីភ្នំពេញឆ្លងខេត្តមួយទៅកាន់ខេត្តមួយ ស្ទើរមិនបន្សល់ដាននោះកំពុងត្រូវបានកងកម្លាំងប្រដាប់អាវុធធ្វើការឡោមព័ន្ធនៅចំណុចភ្នំខៀវ ព្រំប្រទល់ខេត្តស្ទឹងត្រែងជាប់នឹងខេត្តក្រចេះ។ គួររំលឹកថា សមត្ថកិច្ចខេត្តស្ទឹងត្រែង កំពុងប្រមាញ់ចាប់ខ្មាន់កាំភ្លើងដែលបាញ់នាយរងព្រហ្មទណ្ឌកម្រិតស្រាល
តាមប្រភពព័ត៌មានបានបង្ហើបថា ខ្មាន់កាំភ្លើងខាងលើនោះបានប្រដាប់ដោយអាវុធចំនួន២ដើម ក្នុងមានអាវុធធុនវែងមួយដើម និងខ្លីមួយដើម ដែលបច្ចុប្បន្នកំពុងសម្ងំលាក់ខ្លួននៅក្នុងតំបន់ភ្នំខៀវ ជាតំបន់មានព្រៃស្មុគស្មាញ។
តាមប្រភពដដែលបន្តថា កាលពីរសៀលថ្ងៃទី១៤ មករា ឆ្នាំ២០២១ កម្លាំងសមត្ថកិច្ចមកពីភ្នំពេញមួយចំនួន នៅគ្រាដែលកម្លាំងនគរបាននិងយោធាខេត្តស្ទឹងត្រែងនិងខេត្តក្រចេះសរុបជាង១០០នាក់ចុះកំណត់គោលមុខសញ្ញា ដោយបែងចែកកម្លាំងជាបីក្រុមព័ទ្ធជាស្នែងក្របីដើម្បីខ្ទប់ផ្លូវមិនអោយជនល្មើសគេចខ្លួនទៀត ។ ទោះជាយ៉ាងណា រហូតមកទល់រសៀលថ្ងៃទី១៥ មករា ឆ្នាំ២០២១នេះ មុខសញ្ញាខ្មាន់កាំភ្លើងខាងលើ ស្ថិតក្នុងភាពស្ងប់ស្ងាត់នៅឡើយ ខណៈកម្លាំងប្រដាប់អាវុធយាមកាមស្ទើមិនបានដេកពួនពេញមួយយប់ទៅហើយ៕ (កែសម្រួលដោយ ៖ ធីតា)
ចែករំលែកព័តមាននេះ