ខេត្តស្ទឹងត្រែង ៖ ខណៈនេះកម្លាំងកងរាជអាវុធខេត្តស្ទឹងត្រែង ដឹកនាំដោយមេបញ្ជាការរងលោកវរសេនីយ៍ឯក ដួង វិចិត្រ បានចុះឡោមព័ទ្ធខ្មាន់កាំភ្លើង ដែលបានបាញ់សម្លាប់នាយរងព្រហ្មទណ្ឌកម្រិតស្រាលរាជធានីភ្នំពេញ ហើយគេចខ្លួនឆ្លងខេត្តមួយទៅខេត្តមួយរហូតមកដល់ពេលនេះ អាចទៅដល់ទឹកដី…
ខេត្តស្ទឹងត្រែង ៖ ខណៈនេះកម្លាំងកងរាជអាវុធខេត្តស្ទឹងត្រែង ដឹកនាំដោយមេបញ្ជាការរងលោកវរសេនីយ៍ឯក ដួង វិចិត្រ បានចុះឡោមព័ទ្ធខ្មាន់កាំភ្លើង ដែលបានបាញ់សម្លាប់នាយរងព្រហ្មទណ្ឌកម្រិតស្រាលរាជធានីភ្នំពេញ ហើយគេចខ្លួនឆ្លងខេត្តមួយទៅខេត្តមួយរហូតមកដល់ពេលនេះ អាចទៅដល់ទឹកដី នៃខេត្តស្ទឹងត្រែងហើយ ។
បើតាមលោកវរសេនីយ៍ឯក ដួង វិចិត្រ មេបញ្ជារងកងរាជអាវុធហត្ថខេត្តស្ទឹងត្រែង បានប្រាប់ថា ក្រោមការចង្អុលបង្ហាញពីលោកឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្ត និងបន្ទាប់ពីទទួលព័ត៌មានមកថា ខ្មាន់កាំភ្លើងបានរត់គេចពីភ្នំពេញ ឆ្លងខេត្តមួយទៅកាន់ខេត្តមួយ រហូតដល់ខេត្តមណ្ឌលគិរី ខេត្តរតនគិរី និងបន្តគេចមកដល់ខេត្តស្ទឹងត្រែងហើយនោះ លោកបានប្រមូលកម្លាំងតាមឡោមព័ទ្ធ ប្រមាញ់ចាំចាប់ជនល្មើស ។
យ៉ាងណាតាំងពីព្រឹករហូតមកដល់ពេលនេះ កម្លាំងកងរាជអាវុធហត្ថខេត្តកំពុងរុករកជនល្មើសនៅតាមទីតាំងសង្ស័យ នៅឡើយ ។
គួរជម្រាបថា នៅរសៀលថ្ងៃទី៥ ខែមករា ឆ្នាំ២០២១ មានសេចក្តីរាយការណ៍មកថា ជនសង្ស័យជាឃាតករ បានបន្តរត់មកចូលស្រុកលំផាត់ ខេត្តរតនគិរី គេចខ្លួនពីការតាមប្រមាញ់របស់សមត្ថកិច្ចខេត្តមណ្ឌលគិរី ។
លោកឧត្តមសេនីយ៍ទោ យិន ចំណាន ស្នងការនគរបាលខេត្តរតនគិរី បានឲ្យដឹងតាមទូរស័ព្ទថា «មុនដំបូង ខ្ញុំទទួលព័ត៌មានមកថា ជនសង្ស័យរត់គេចខ្លួនពីស្រុកកោះញែកខេត្តមណ្ឌលគិរី មកសំងំក្នុងព្រៃមួយ នៅស្រុកលំផាត់ ខេត្តរតនគិរី» ។ ក្រោយមកក៏ទទួលព័ត៌មានថ្មីលេចឮថា ជនសង្ស័យកំពុងលាក់ខ្លួនក្នុងព្រៃនៅឯស្រុកសេសាន ខេត្តស្ទឹងត្រែង ដូច្នេះទាំងកម្លាំងប្រដាប់អាវុធខេត្តរតនៈគីរី និងខេត្តស្ទឹងត្រែង បានសហការគ្នាក្នុងការឡោមព័ទ្ធ និងតាមប្រមាញ់ជនសង្ស័យជាឃាតករនេះ យ៉ាងយកចិត្តទុកដាក់បំផុត ។
ព្រោះថាតាមប្រភពព័ត៌មានខ្លះបានបញ្ជាក់ថា ជនសង្ស័យយកជាប់ទៅជាមួយនៅអាវុធជាប់ខ្លួនរហូត ។ ដូច្នេះសមត្ថកិច្ចមានការប្រុងប្រយ័ត្នខ្ពស់ ក្នុងវិធានការការពារខ្លួន តាមជំនាញកំពុងចុះប្រតិបត្តិការមួយនេះ ៕
ចែករំលែកព័តមាននេះ