រាជធានីភ្នំពេញ ៖ លោក ឃួង ស្រេង អភិបាលរាជធានីភ្នំពេញ មានប្រសាសន៍ថា ការងារអភិវឌ្ឍន៍នៅក្នុងរាជធានីភ្នំពេញនាពេលបច្ចុប្បន្ននេះបានឈានដល់ដំណាក់កាលលើសពីមធ្យមដែលរាជធានីភ្នំពេញរបស់យើងកាន់តែស៊ីវីល័យទៅៗទាំងមនុស្ស និងឧបករណ៍ប្រើប្រាស់នានា ដូចនេះយើងត្រូវតែរឹតបន្តឹងរាល់ការងារអភិវឌ្ឍន៍ត្រូវតែស្អាតជាពិសេសការសាងសង់តែម្តង។ លោក ឃួង ស្រេង មានប្រសាសន៍បែបនេះ ក្នុងកិច្ចប្រជុំគណបញ្ជាការឯកភាពរបស់ រដ្ឋបាលរាជធានីភ្នំពេញ នៅសាលារាជធានីភ្នំពេញ ព្រឹកថ្ងៃទី១១ ខែមករា ឆ្នាំ២០២១នេះ។
លោក ឃួង ស្រេង មានប្រសាន៍ទៀតថា ទីក្រុងភ្នំពេញបច្ចុប្បន្ន គឺមានការរីកចម្រើនខ្លាំងពីមួយថ្ងៃទៅមួយថ្ងៃ ដោយប្រជាពលរដ្ឋរស់នៅកាន់តែមានភាពស៊ីវិល័យទាំងសម្ភារ និងឧបករណ៍ប្រើប្រាស់ផ្សេងៗមិនត្រឹមតែប៉ុណ្ណោះ ទីក្រុងបច្ចុប្បន្នមានការរីកចម្រើន ដោយមានហេដ្ឋារចនាសម្ព័ន្ធរីកដុះដាលជាច្រើនដូចជា៖ មានអគារខ្ពស់ៗ មានសាលារៀន មានមន្ទីរពេទ្យ មណ្ឌលសុខភាព ពិសេសមានផ្លូវគមនាគមន៍ដ៏ល្អ។
លោកបន្តថា ក្នុងការអភិវឌ្ឍ និងរីកចម្រើនឥតឈប់ឈរនេះដែរ ក៏ត្រូវមានការចូលរួមពីប្រជាពលរដ្ឋក៏ដូចជាម្ចាស់អាជីវកម្ម ដែលធ្វើចរាចរណ៍តាមដងផ្លូវទាំងអស់ ត្រូវធានានូវសណ្តាប់ធ្នាប់នៅតាមដងផ្លូវឲ្យបានខ្ជាប់ខ្ជួន ពិសេសមានទំនួលខុសត្រូវចំពោះអ្វីដែលខ្លួនបានធ្វើ ដើម្បីចូលរួមសម្អាតទីក្រុងឲ្យកាន់តែមាន សោភ័ណភាពស្រស់ស្អាតជានិច្ច។ លោក ឃួង ស្រេង បញ្ជាក់ថា យើងទាំងអស់គ្នាពិតជាសប្បាយរីករាយ ដោយសារទីក្រុងយើងកំពុងអភិវឌ្ឍន៍នឹងបានឈានដល់លើសពីកម្រិតមធ្យម ដែលតម្រូវឱ្យមានការយកចិត្តទុកដាក់។
កាលមុនទីក្រុងកំពុងអភិវឌ្ឍ វាមានបញ្ហាច្រើន ពីមុនយើងបិទភ្នែក ពេលឡានដឹកដីប្រឡាក់បន្តិចបន្តួចលើដងផ្លូវយើងសុខចិត្តទ្រាំលាងសម្អាតឱ្យ ប៉ុន្តែឥឡូវគឺអត់ទេ ដឹកហើយត្រូវតែលាងឱ្យស្អាត ដែលនេះជាកិច្ចការងារត្រូវធ្វើ ដើម្បីចូលរួមចំណែកជាមួយនឹងការអភិវឌ្ឍន៍ ធ្វើយ៉ាងណាអភិវឌ្ឍន៍ទៅតាមអនុសាសន៍របស់សម្តេចតេជោ មិនមែនអភិវឌ្ឍន៍មួយបំផ្លាញមួយទេ គឺអត់ចីរភាពទេ តែឥឡូវនេះគឺត្រូវតែស្អាត។
លោក ឃួង ស្រេង បានអំពាវនាវដល់ប្រជាពលរដ្ឋ ក៏ដូចជាក្រុមហ៊ុនដឹកជញ្ជូនទាំងអស់ដែលធ្វើដំណើរតាមដងផ្លូវ ចូលរួមការថែរក្សានូវសណ្តាប់ធ្នាប់នៅលើដងផ្លូវទាំងអស់គ្នា ដើម្បីរក្សាឱ្យបាននូវភាពរៀបរយ និងមានភាពស្រស់ស្អាតនៅក្នុងទីក្រុង៕ ដោយ ៖ ចន ណារិទ្ធ
ចែករំលែកព័តមាននេះ