ADផ្ទាំងផ្សព្វផ្សាយពាណិជ្ជកម្ម

Picture

លោក ស ថេ​ត ប្រាប់​គ្រួសារ​សព​មន្ត្រី​នគរបាល​ព្រហ្មទណ្ឌ​កំរិត​ស្រាល ថា​នឹង​តាម​ចាប់​ឃាតករ​ឲ្យ​ខាង​តែ​បាន!

6 ខែ មុន

រាជធានី​ភ្នំពេញ ៖ ជុំវិញ​នៃ​អំពើ​ឃាតកម្ម បាញ់​សម្លាប់​នាយ​រង​ការិយាល័យ​នគរបាល​ព្រហ្មទណ្ឌ​កម្រិត​ស្រាល​រាជធានី​ភ្នំពេញ នៅ​ខណ្ឌ​ពោធិ៍​សែន​ជ័យ រឿង​ទំនាក់​គ្រោះថ្នាក់​ចរាចរណ៍​នោះ លោក​ឧត្តម​ស​នី​យ៍​ឯក ស ថេ​ត អគ្គស្នងការ​រង​នគរបាល​ជាតិ…

រាជធានី​ភ្នំពេញ ៖ ជុំវិញ​នៃ​អំពើ​ឃាតកម្ម បាញ់​សម្លាប់​នាយ​រង​ការិយាល័យ​នគរបាល​ព្រហ្មទណ្ឌ​កម្រិត​ស្រាល​រាជធានី​ភ្នំពេញ នៅ​ខណ្ឌ​ពោធិ៍​សែន​ជ័យ រឿង​ទំនាក់​គ្រោះថ្នាក់​ចរាចរណ៍​នោះ លោក​ឧត្តម​ស​នី​យ៍​ឯក ស ថេ​ត អគ្គស្នងការ​រង​នគរបាល​ជាតិ និង​ជា​ស្នងការ​នគរបាល​រាជធានី​ភ្នំពេញ បាន​ប្រាប់​គ្រួសារ​សព​នៅ​ក្នុង​ពិធី​គោរព​វិញ្ញាណក្ខន្ធ​សព​លោក​វរសេនីយ៍ទោ រ៉េ​ត ស៊ី​ណែ​ត ហៅ​ញ៉​ក់ កាលពី​កន្លង​ទៅ​ថ្មី​ៗ​នេះ​ថា «​នឹង​ប្តេជ្ញា​តាម​ស្វែងរក​ចាប់ខ្លួន​ជា​ឃាតករ ដើម្បី​យក​មក​ផ្តន្ទាទោស​តាម​ផ្លូវច្បាប់​ឲ្យ​ខាង​តែ​បាន​» ។

លោក ស ថេ​ត ថ្លែង​បែប​នេះ​ក្នុង​ពេល​នោះ​ដែរ​អញ្ជើញ​ដឹកនាំ​លោក​-​លោកស្រី​ស្នងការ​រង នាយការិយាល័យ និង​មន្ត្រី​ជា​ច្រើន​រូប ចូលរួម​ពិធី​បុណ្យសព គោរព​វិញ្ញាណក្ខន្ធ និង​បំពាក់​ស័ក​វរសេនីយ៍ឯក ជូន​សព​របស់​លោក​វរសេនីយ៍ទោ រ៉េ​ត ស៊ី​ណែ​ត ជា​កិច្ច​ប​ច្ឆា​មរណ​: នៅ​ព្រឹក​ថ្ងៃ​ទី​៣១ ខែធ្នូ ឆ្នាំ​២០២០ ។

ជាមួយ​គ្នា​នោះ​ដែរ លោកស្នងការ បាន​បង្ហាញ​អារម្មណ៍​នឹក​ស្រណោះ សោកស្តាយ​ដែល​បាត់បង់​មន្ត្រី​ដ៏​សកម្ម​ម្នាក់ ដោយ​គាត់​តែងតែ​បំពេញការងារ​បាន​យ៉ាង​ល្អ​ជូន​អង្គភាព ក៏​ដូច​ជា​ការ​ចូលរួម​សហ​ការណ៍ ក្នុង​ការ​បង្ក្រាប​បទល្មើស​នានា​ជា​ច្រើន និង​បាន​ចូលរួម​ចំណែក​ការពារ​សុខ​សុវត្ថិភាព​ជូន​ប្រជាពលរដ្ឋ​ក្នុង​រាជធានី​ភ្នំពេញ​នា​ពេល​កន្លង​មក ។

សូម​បញ្ជាក់​ថា លោក​វរសេនីយ៍ទោ រ៉េ​ត ស៊ី​ណែ​ត អាយុ​៤១​ឆ្នាំ ជា​នាយ​រង​ការិយាល័យ​ព្រហ្មទណ្ឌ​កម្រិត​ស្រាល នៃ​ស្នងការដ្ឋាន​នគរបាល​រាជធានី​ភ្នំពេញ មានកូន​២​នាក់ ស្រី​ម្នាក់ ប្រុស​ម្នាក់ ជា​មន្ត្រី​ដ៏​ល្អ​មួយ​រូប​បាន​លះបង់​ក្នុង​ការ​បម្រើ​សង្គម​ជាតិ ហើយ​គាត់​ក៏​មានការ​ទំនាក់ទំនង​យ៉ាង​ល្អជា​មួយ​មិត្ត​រួម​ការងារ​ទាំងអស់​ផង​ដែរ ។
ឧត្តម​ស​នី​យ៍​ឯក ស ថេ​ត ក៏​បាន​ចូលរួម​រំលែក​ទុក្ខ​ដ៏​ក្រៀមក្រំ​នេះ ជាមួយ​ក្រុម​គ្រួសារ​សព​លោក​វរសេនីយ៍ទោ រ៉េ​ត ស៊ី​ណែ​ត និង​បាន​នាំ​យក​ជា​សម្ភារ​: និង​ថវិកា​មួយ​ចំនួន ដើម្បី​ផ្តល់​ជូន​ដល់​ក្រុម​គ្រួសារ​សព​ផង​ដែរ ៕

Picture
Picture
Picture
Picture
Picture
Picture
Picture