រាជធានីភ្នំពេញ ៖ ឆ្នាំថ្មីបានមកដល់ហើយ! មនុស្សគ្នាតែងតែប៉ងប្រាថ្នាសុំសេចក្តីសុខ និងភាពសម្បូរសប្បាយ។ល ។ ក៏ដូចជា ការសុំឱ្យខ្លួនឯង មានសុខភាពល្អ និងមានទ្រព្យសម្បត្តិច្រើនជាងឆ្នាំចាស់ និងផុតគ្រោះផុតភ័យជាដើម ។
តោះមកស្តាប់អ្នកជំនាញបកស្រាយ នូវសេចក្តីប្រាថ្នារបស់មនុស្សគ្រប់រូប ប្រសិនជាពួកគាត់ពិតជាចង់បានការប្រាថ្នាដែលទទួលជោគជ័យនោះ ។
លោក ង៉ែត ជូ អ្នកជំនាញផ្នែកសេដ្ឋកិច្ច និងជាអ្នកប្រឹក្សាឯករាជ្យ ម្នាក់បានលើកឡើងថា «ឆ្នាំថ្មីមិនមានទេវតា ឬព្រះឯណាអោយពរជ័យធ្វើអោយមនុស្សទទួលបានភាពជោគជ័យ សុខភាពល្អ សំបូរទ្រព្យ និងសប្បាយរីករាយនោះទេ » ។ លោកបន្តបានពរជ័យដែលមនុស្ស នឹងទទួលបាន គឺចេញពីគំនិត និងទង្វើផ្ទាល់ខ្លួន៖
១)- កិច្ចការដែលអ្នកធ្វើ ៖ តើអ្នកបំពេញកិច្ចការតាមតួនាទីបានល្អឬនៅ? តើអ្វីខ្លះដែលអ្នកគួរធ្វើ ដើម្បីពង្រីកការទទួលខុសត្រូវ និងរួមចំណែកធ្វើអោយខ្លួនអ្នកក្លាយជាទ្រព្យដ៏មានតម្លៃរបស់ស្ថាប័នឬក្រុមហ៊ុន?
២)- ការគ្រប់គ្រងហិរញ្ញវត្ថុ និងធនធានផ្ទាល់ខ្លួន ៖ ពិនិត្យឡើងវិញពីការគ្រប់គ្រងចំណូល-ចំណាយ ការប្រើបំណុល និងការចាត់ចែងទ្រព្យធនអោយមានប្រសិទ្ធិភាព ។ យ៉ាងតិច ៥០ ភាគរយ នៃចំណូលគួរចាត់ចែងជាគ្រាប់ពូជយកទៅវិនិយោគបន្ត ។ យ៉ាងតិចតិច ៥០ភាគរយនៃទ្រព្យសរុប គឺជាទ្រព្យដែលចំរើនអាចរកចំណូល (income) ឬកើនតម្លៃ (capital gain) យ៉ាងតិចចន្លោះ ពី១៥ ភាគរយ ទៅ ២០ភាគរយ ក្នុង១ឆ្នាំ ។
ត្រូវប្រាកដថា បំណុលទាំងអស់ គឺជាបំណុលនាំមកនូវផលចំណេញ ពោល គឺបំណុលដែលខ្ចីយកមកធ្វើទុនវិនិយោគដោយក្រោយពីទូទាត់ការប្រាក់សល់ផលចំណេញគួរជាទីគាប់ចិត្ត (យ៉ាងតិចក៏ចំណេញ១០ ភាគរយ ក្នុង១ឆ្នាំដែរ) ។ កិច្ចការទាំងនេះទាមទារអោយអ្នកមានចំណេះ ជំនាញ វិន័យ ផ្នត់គំនិតវិជ្ជមាន និងចក្ខុវិស័យវែងឆ្ងាយ ។ គួរបំពេញនូវចំណេះ ជំនាញដែលខ្វះខាត ពង្រឹង និងពង្រីកចំណេះ ជំនាញដែលមានជាប់ជាប្រចាំ។ល។
៣)- សុខភាពផ្លូវកាយ ៖ មានរបបអាហារសមរម្យ និងលេងកីឡាជាប់ជាប្រចាំ ពោលគឺគួរយកកីឡាធ្វើជាមិត្តដើម្បីសុខភាព និងចៀសវាងនូវអារម្មណ៍ឯកកោ ឬអផ្សុកដោយទុកពេលទំនេរឥតប្រយោជន៍។
៤)- សុខភាពផ្លូវចិត្ត និងទំនាក់ទំនងសង្គម ៖ អានសៀវភៅ អត្ថបទ ឬស្តាប់ធម៌អប់រំចិត្ត ដើម្បីបង្កើនភាពស្ងប់ក្នុងចិត្ត។ ជ្រើសរើសការប្រាស្រ័យទាក់ទងជាមួយបុគ្គលដែលគិតវិជ្ជមាន មានការទទួលខុសត្រូវ មានគោលការណ៍ មានសុចរិតភាព និងក្រមសីលធម៌ល្អ។ល។ បើកឱកាសអោយខ្លួនឯងបានស្គាល់បនុស្សថ្មីៗ រក្សាទំនាក់ទំនងជាមួយបុគ្គលដែលមានគុណតម្លៃ និងចំរុះបុគ្គលខ្វះគុណតម្លៃតាមរយៈការកាត់បន្ថយការទំនាក់ទំនង។ល៕
ចែករំលែកព័តមាននេះ