ខេត្តកំពង់ចាម ៖ អគ្គិភ័យមូយបានឆាបឆេះសន្ធោសន្ធៅ បង្កឲ្យមានការភ្ញាក់ផ្អើលដោយសារតែឆេះឡសម្ងួតជ័រកៅស៊ូមួយកន្លែង កាលពីវេលាម៉ោង៦និង៣០នាទីព្រឹកថ្ងៃទី២៦ធ្នូ នេះ ស្ថិតនៅចំណុចរោងចក្រកែច្នៃជ័រកៅស៊ូ ឯកជនរបស់ឈ្មោះ ប៉េង ជឺ ភេទប្រុស អាយុ៧៧ឆ្នាំ ស្ថិតនៅតំបន់ស្រោងខ្នុរ ក្នុងភូមិសូជ័យ ឃុំចំការអណ្តូង ស្រុកចំការលើ ។ជាមួយនោះ មានរថយន្តពន្លត់អគ្គិភ័យ១គ្រឿងបានចេញទៅអន្តរាគមន៍បាញ់ទឹកពន្លត់ភ្លាមៗផងដែរ ។
លោកវរសេនីយ៍ឯក ប៉ែន ទៀងចំរើន អធិការនគរបាលស្រុកចំការលើ ប្រាប់ឲ្យដឹងថាបន្ទាប់ពីកម្លាំងមូលដ្ឋានបានរាយការណ៍មករូបលោកភ្លាមៗនោះ ក៏បានឲ្យរថយន្តពន្លត់អគ្គិភ័យនៃអធិការរដ្ឋាននគរបាលស្រុកចំការលើមួយគ្រឿងចេញទៅអន្តរាគមន៍បាញ់ទឹកពន្លត់ជាបន្ទាន់។ ដោយមិនបណ្ដាលឲ្យឆេះរាលដាលទៅលើសម្ងួតផ្សេងទៀតនោះទេ។
អធិការនគរបាលស្រុកចំការលើប្រាប់បន្តថាចំពោះឡសម្ងួតដែលបានឆាបឆេះនោះគឺមានទំហំ៨.៦០ម x ០៤ម និងជ័រកៅស៊ូចំនួន ០២តោនត្រូវបានឆេះខូចទាំងស្រុង មូលហេតុបណ្ដាលមកពីនាឡិកាវាស់កំដៅខូច ហើយឡចំហុយជ័រកៅស៊ូឡើងកំដៅហួសកំណត់ទើបបណ្ដាលឲ្យមានអគ្គីភ័យឆាបឆេះឡើង។ក្រៅពីរថយន្តពន្លត់អគ្គីភ័យរបស់នគរបាលម្ចាស់ទីតាំងខាងលើនេះក៏បានប្រើប្រាស់ប្រយោន៍ទឹកបាញ់ជួយអន្តរាគមន៍ផងដែរ។
ចំណែកសម្ងួតផ្សេងទៀតនៅក្នុងបរិវេណរោងចក្រនោះ គឺមិនរងផលប៉ះពាល់អ្វីនោះទេ។ចំពោះទីតាំងដែលកើតមានអគ្គីភ័យគឺនៅមិនឆ្ងាយប៉ុន្មាន ហើយត្រូវបានកម្លាំងពន្លត់អគ្គីភ័យនៃអធិការរដ្ឋាននគរបាលស្រុកចំការលើចេញទៅជួយអន្តរាគមន៍ទាន់ពេលវេលា៕
ចែករំលែកព័តមាននេះ