ខេត្តកំពង់ឆ្នាំង ៖ ទោះបីធ្លាក់ខ្លួនពិការ ក៏អតីតសេនាជនជំនាន់រដ្ឋកម្ពុជា ដែលសល់តែដៃមួយជំហៀង និងជើងពិការ នៅតែតស៊ូឡើងត្នោតដើម្បីចិញ្ចឹមគ្រួសារបានក្នុងលទ្ឋភាពរស់មួយគ្រាៗដែរ ។ ប៉ុន្តែគួរឱ្យអនិច្ចា ខណៈពេលអតីតសេនាជនពិការរូបនោះឡើងដើមត្នោត…
ខេត្តកំពង់ឆ្នាំង ៖ ទោះបីធ្លាក់ខ្លួនពិការ ក៏អតីតសេនាជនជំនាន់រដ្ឋកម្ពុជា ដែលសល់តែដៃមួយជំហៀង និងជើងពិការ នៅតែតស៊ូឡើងត្នោតដើម្បីចិញ្ចឹមគ្រួសារបានក្នុងលទ្ឋភាពរស់មួយគ្រាៗដែរ ។ ប៉ុន្តែគួរឱ្យអនិច្ចា ខណៈពេលអតីតសេនាជនពិការរូបនោះឡើងដើមត្នោត ក៏បានធ្លាក់ពីលើចុងត្នោត បណ្ដាលឲ្យរងរបួសធ្ងន់និងកំពុងសម្រាកដេកព្យាបាលដោយថ្នាំបុរាណក្រោមសំយាបផ្ទះកូន ស្ថិតក្នុងភូមិទ្រនាមពេជ្រ ឃុំគោកបន្ទាយ ស្រុករលាប្អៀរ ។
ជួបជាមួយភ្នាក់ងារកោះសន្តិភាពនៅព្រឹកថ្ងៃទី25 ខែធ្នូ ឆ្នាំ2020 នេះ អតីតសេនាជនរដ្ឋកម្ពុជា ដែលមានពិការភាពដោយសារសង្គ្រាមខាងលើឈ្មោះ ឌុំ សាំង អាយុ៦០ឆ្នាំ បានរៀបរាប់ឱ្យដឹងថា គាត់មានប្រពន្ធឈ្មោះ គឹម យឺន អាយុ៦០ឆ្នាំ មានកូនប្រុសស្រីសរុបចំនួន៥នាក់ ដោយពួកគេមានប្តី និងប្រពន្ឋកូនអស់ហើយ ប៉ុន្តែបច្ចុប្បន្នគាត់បានចិញ្ចឹមចៅស្រី២នាក់ក្នុងបន្ទុកថែមទៀត។
អតីតសេនាជនពិការរូបនោះបានរំឮកពីអតីតភាពថា នៅក្នុងអំឡុងឆ្នាំ1985 គាត់ត្រូវបានខាងឃុំឱ្យធ្វើជាសេនាជនការពារឃុំគោកបន្ទាយ ប៉ុន្តែតែក្រោយមកគេបញ្ជូនគាត់អោយទៅការពារផ្លូវដែកនៅចំណុចឃុំក្រាំងស្គា ស្រុកទឹកផុស និងបានប្រយុទ្ធតតាំងជាមួយកងទ័ពខ្មែរក្រហមបណ្តាលឱ្យរងរបួស3លើក រហូតធ្លាក់ខ្លួនពិការ ហើយពេលត្រឡប់មករស់នៅជាមួយប្រពន្ធកូនវិញ ដោយនាំយកមកជាមួយនូវពិការភាព គឺពិការដៃខាងឆ្វេង របួសស្មងជើងខាងឆ្វេង និងភ្នែកខាងស្ដាំម្ខាងមើលមិនឃើញ។
អតីតសេនាជនពិការខាងលើបានបន្តថា ពេលមកដល់ផ្ទះ មិនដឹងរកមុខរបរអ្វីចិញ្ចឹមប្រពន្ឋកូនបាន គាត់ក៏ចាប់មុខរបរឡើងត្នោតរហូតដល់សព្វថ្ងៃ ប៉ុន្តែសំណាងអាក្រក់នៅថ្ងៃទី 21 ខែធ្នូ ឆ្នាំ 2020 ពេលដែលគាត់កំពុងតែឡើងត្នោតដល់ចុងទៅហើយ ស្រាប់តែគាត់ងងឹតមុខ ធ្លាក់ពីលើដើមត្នោតមកដី ក្រោយពេលដឹងខ្លួន គឺគាត់ស្ថិតលើគ្រែនៅផ្ទះ ឃើញមានប្រពន្ឋកំពុងរឹតពន្លៃលើខ្លួនប្រាណបាត់ទៅហើយ។
ដោយឡែក បើតាមប្រភពពីស្ត្រីជាប្រពន្ធរបស់អតីតសេនាជនពិការខាងលើបានឱ្យដឹងថា នៅថ្ងៃកើតហេតុនោះ ពេលបាយថ្ងៃត្រង់ ដោយសារបាត់ប្ដីយូរពេក គាត់ក៏ដើរទៅរក នៅជួរដើមត្នោតក្រោយផ្ទះចម្ងាយប្រមាណ១០០ម៉ែត្រ ស្រាប់តែឃើញប្ដីគាត់សន្លប់នៅនឹងគល់ត្នោតបាត់ទៅហើយ និងមានបាក់មែកជ្រៃមកជាមួយផង ដែលគាត់សន្និដ្ឋានថា ប្តីគាត់ធ្លាក់ពីចុងត្នោតទើលើមែកជ្រៃ ហើយទើបបាក់មែកជ្រៃមកបន្តទៀត ទើបប្តីគាត់អាចនៅមានដង្ហើម។ ខណៈនោះ គាត់បានស្រែកឱ្យអ្នកជិតខាងជួយគ្រាហ៍ ប្តីគាត់យកមកដាក់ឱ្យនៅផ្ទះ និងបានរកថ្នាំបុរាណ ព្រមទាំងហៅគ្រូពេទ្យឯកជននៅតាមភូមិ មកជួយព្យាបាលផងដែរ។
តាមប្រភពពីស្ត្រីជាប្រពន្ធបានបន្តថា ពេលនេះប្តីរបស់គាត់នៅចុកត្រគាកខាងឆ្វេងនិងចុកទ្រូង ពិបាកដកដង្ហើមនិងមិនអាចងើបអង្គុយបានឡើយ ។ គាត់គ្មានលទ្ធភាព យកប្តីគាត់ទៅមន្ទីរពេទ្យនោះទេ ហេតុនេះហើយរូបគាត់និងគ្រួសារ សូមលើកដៃសំពះ អំពាវនាវដល់បងប្អូនសប្បុរសជន ជិតឆ្ងាយមេត្តាជួយគ្រួសារគាត់ផង ។
គួររំលឹកផងដែរថា ៖ កាលពី៣ឆ្នាំមុន កោះសន្តិភាពធ្លាប់ចុះផ្សាយម្ដងហើយពីភាពក្រីក្រលំបាកវេទនារបស់អតីតសេនាជនពិការតស៊ូឡើងត្នោតចិញ្ចឹមប្រពន្ឋកូន ហើយក៍ទទួលបានការឧបត្ថម្ភពីសប្បុរសជនដោយទទួលបានផ្ទះមួយខ្នងទំហំ3ម៉ែត្រ គុណនឹង4ម៉ែត្រផងដែរ រហូតមកដល់ពេលនេះ អតីតសេនាជនជំនាន់រដ្ឋកម្ពុជាដែលពិការមួយរូបខាងលើតស៊ូឡើងត្នោតដើម្បីចិញ្ចឹមគ្រួសាររស់មួយគ្រាៗនោះ ស្រាប់តែជួបគ្រោះថ្នាក់ធ្លាក់ពីលើចុងត្នោតបែបនេះតែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ