រាជរដ្ឋាភិបាលបានប្រកាសចេញនូវវិធានការបន្ថែមនៅជុំទី៧ ដើម្បីអន្តរាគមន៍ជួយដល់វិស័យកាត់ដេរ វិស័យទេសចរណ៍ វិស័យអាកាសចរណ៍ អ្នកផ្តល់កម្ចីក្នុងស្រុក និងក្រៅស្រុក ព្រមទាំងវិធានការទ្រទ្រង់កំណើនសេដ្ឋកិច្ចក៏ដូចជាជួយដល់ពលរដ្ឋក្រីក្រដោយ សារឥទ្ធិពលនៃវិបត្តិកូវីដ១៩ ។ វិធានការបន្ថែមរបស់រាជរដ្ឋាភិបាល នៅជុំទី៧ ដែលបានប្រកាសចេញកាលពីថ្ងៃទី២៣ ខែធ្នូ ឆ្នាំ២០២០រួមមាន ការបន្តឧបត្ថម្ភ និងបើកសាច់ ប្រាក់ក៏ដូចជា ការលើកលែងពន្ធលើក្រុមហ៊ុននានាជាដើម ។
សេចក្តីប្រកាសរបស់រាជរដ្ឋាភិបាលបង្ហាញថា រាជរដ្ឋាភិបាលសម្រេចដាក់ចេញនូវវិធានការបន្ថែមជុំទី៧ នៅពេលនេះ ក្នុងគោលបំណងបន្តដាក់ចេញ និងអនុវត្តវិធានការរក្សាលំនឹងអាជីវកម្ម ខណៈដែលកម្ពុជា កំពុងបន្តប្រឈមនឹងវិបត្តិនៃជំងឺកូវីដ១៩ ក៏ដូចជាទ្រទ្រង់ និងស្តារអាជីវកម្ម និងធុរកិច្ចឲ្យងើបឡើងវិញ ដើម្បីចូលរួមជំរុញកំណើន សេដ្ឋកិច្ច នៅក្នុងបរិការណ៍ក្រោយពីវិបត្តិនៃជំងឺកូវីដ១៩ ព្រមទាំងបន្តជួយទំនុកបម្រុងដល់ជីវភាព ប្រចាំថ្ងៃរបស់គ្រួសារក្រីក្រ និងងាយរងគ្រោះតាមរយៈកម្មវិធីឧបត្ថម្ភសាច់ប្រាក់ ដើម្បីឆ្លងកាត់ដំណាក់កាលដ៏លំបាកបំផុតនៃវិបត្តិជំងឺកូវីដ១៩ ។
ការបន្ថែមវិធានការរបស់រាជរដ្ឋាភិបាល ដើម្បីទប់ទល់នឹងកូវីដ នៅពេលនេះរួមមាន៖ វិធានការបន្តជួយវិស័យកាត់ដេរ វាយនភណ្ឌស្បែកជើង ផលិតផលធ្វើដំណើរ កាបូប និងវិស័យទេសចរណ៍ មានជាអាទិ៍បន្តផ្តល់ប្រាក់ឧបត្ថម្ភ៤០ដុល្លារអាមេរិក ក្នុង១ខែ សម្រាប់កម្មករនិយោជិតម្នាក់ សម្រាប់រយៈពេល៣ខែបន្ថែមទៀត ពីខែមករា ដល់ខែមីនា ឆ្នាំ២០២១។ ការបន្តលើកលែងការបង់ពន្ធប្រចាំខែគ្រប់ប្រភេទ ចំពោះសណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុនភ្នាក់ងារទេសចរណ៍ ។
រាជរដ្ឋាភិបាល ក៏បានប្រកាសបន្តវិធានការជួយវិស័យអាកាសចរណ៍ ដោយបន្តលើកលែងការបង់ពន្ធអប្បបរមា សម្រាប់រយៈពេល៣ខែបន្ថែមទៀត ពីខែមករា ដល់ខែមីនា ឆ្នាំ២០២១ ជូនដល់ក្រុមហ៊ុនអាកាសចរណ៍ ដែលបានចុះបញ្ជីនៅកម្ពុជា រួមទាំងការបន្តពន្យារការបង់ប្រាក់ជំពាក់កម្រៃអាកាសចរស៊ីវិលសម្រាប់រយៈពេល៣ខែបន្ថែមទៀតពីខែមករា ដល់ខែមីនា ឆ្នាំ២០២១ ។
រាជរដ្ឋាភិបាលក៏បានប្រកាសពីវិធានការជួយរោងចក្រ សហគ្រាស និងអាជីវកម្ម ក៏ដូចជាជួយសម្រួលដល់ជីវភាពរស់នៅរបស់កម្មករនិយោជិត។ នោះគឺរាជរដ្ឋាភិបាល បន្តអនុញ្ញាតឲ្យរោងចក្រ សហគ្រាស និងអាជីវកម្មក្នុងគ្រប់វិស័យ ពន្យារពេលទូទាត់ប្រាក់រម្លឹកប្រាក់ បំណាច់អតីតភាពការងារ មុនឆ្នាំ២០១៩ និងការទូទាត់ប្រាក់បំណាច់អតីតភាពការងារ សម្រាប់ឆ្នាំ២០២០ និងឆ្នាំ២០២១ ទៅឆ្នាំ២០២២ ។
ចំណែកវិធានការទ្រទ្រង់កំណើន ក៏ត្រូវបានរាជរដ្ឋាភិបាល សម្រេចបន្តលើកលែងពន្ធ ប្រថាប់ត្រា សម្រាប់អ្នកទិញផ្ទះ ដែលមានតម្លៃទាបជាង ឬស្មើ៧ម៉ឺនដុល្លារអាមេរិក ដោយគិតពីខែមករា ឆ្នាំ២០២១ ដល់ដំណាច់ខែធ្នូ ឆ្នាំ២០២១ ពីក្រុមហ៊ុនអភិវឌ្ឍន៍លំនៅឋានដែលចុះបញ្ជីត្រឹមត្រូវ ។ រាជរដ្ឋាភិបាល ក៏បានប្រកាសអំពាវនាវដល់ក្រុមហ៊ុនអភិវឌ្ឍន៍លំនៅដ្ឋានទាំងអស់ ឲ្យចូលរួមជាមួយរាជរដ្ឋាភិបាល ក្នុងការបញ្ចុះថ្លៃផ្ទះ ទៅតាមលទ្ធភាព ដែលអាចធ្វើទៅបាន ។
ក្រៅពីនោះ រាជរដ្ឋាភិបាលក៏បានប្រកាស បន្ធូរបន្ថយ ការអនុវត្តពន្ធកាត់ទុកលើការប្រាក់ សម្រាប់អ្នកផ្តល់កម្ចីក្នុងស្រុក និងក្រៅស្រុក (Withholding Tax ) ដែលរួមមានការទម្លាក់អត្រាពន្ធកាត់ទុកលើកម្ចីរបស់ធនាគារ និងស្ថាប័នមីក្រូហិរញ្ញវត្ថុជាដើម។
រាជរដ្ឋាភិបាល ក៏បានប្រកាស ពីការបន្តអនុវត្តកម្មវិធីឧបត្ថម្ភសាច់ប្រាក់ជូន គ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធប្រឆាំងជំងឺកូវីដ១៩ សម្រាប់រយៈពេល៣ខែបន្ថែមទៀត គឺពីខែមករា ដល់ខែមីនា ឆ្នាំ២០២១ ។
វិធានការបន្ថែមរបស់រាជរដ្ឋាភិបាល នៅជុំទី៧ ក្នុងរយៈពេល៣ខែបន្ថែមទៀតនេះ ត្រូវបានដាក់ចេញ បើទោះបីជាស្ថានភាពជំងឺកូវីដ១៩ នៅកម្ពុជាយើងបានធូរស្រាល ហើយនៅលើពិភពលោក ក៏មានការផ្សាយពីវ៉ាក់សាំងប្រឆាំងកូវីដ១៩ ។ ប៉ុន្តែទោះបីជាមានវ៉ាក់សាំងបង្ការ ក៏ដោយក៏មិនមែនមានន័យថា យើងទាំងអស់គ្នា អាចវិលត្រឡប់ទៅប្រក្រតីភាពវិញ ក្នុងរយៈពេលដ៏ខ្លីបានឡើយ ។
ចូរនឹកឃើញថា ចាប់តាំងពីមានការរីករាលដាលជំងឺកូវីដ១៩ កាលពីខែមករា ដើមឆ្នាំ២០២០ មកដល់ពេលនេះ កម្ពុជាយើងបានគ្រប់គ្រង ប្រកបដោយប្រសិទ្ធភាព ទោះបីជាមានការឆ្លងកូវីដ ក្នុងព្រឹត្តិការណ៍ថ្ងៃ២៣វិច្ឆិកា និងព្រឹត្តិការណ៍ឆ្លងសហគមន៍ថ្ងៃ២៨វិច្ឆិកា ដែលជាការឆ្លងចូលដល់កម្រិតសហគមន៍ជាលើកទី១ នៅកម្ពុជាយើងក៏ដោយ ។
ជាការពិត ករណីឆ្លងជំងឺកូវីដ១៩ នៅក្នុងសហគមន៍ជាលើកដំបូង នៅកម្ពុជា បានបណ្តាលឲ្យប្រជាជន ព្រួយបារម្ភ ភ័យខ្លាចយ៉ាងខ្លាំង។ ប៉ុន្តែរាជរដ្ឋាភិបាល បានដាក់ចេញនូវវិធានការមុតស្រួចជាបន្តបន្ទាប់ ដើម្បីឆ្លើយតបឲ្យបានទាន់ពេលវេលា និងព្យាយាមកុំឲ្យកូវីដ រាតត្បាតចូលក្នុងសហគមន៍ដល់កម្រិត ដែលមិនអាចគ្រប់គ្រងបាន ។ ជាលទ្ធផល គិតមកដល់ពេលនេះ កម្ពុជាគ្មានករណីស្លាប់ ឬឈានដល់ការដាក់ប្រទេសក្នុងគ្រាមានអាសន្ន ព្រមទាំងមិនមានការបិទជាតំបន់ ឬបិទប្រទេសទាំងមូលនោះឡើយ ។
ម្យ៉ាងទៀត កាលពីថ្ងៃអាទិត្យ ទី២០ ខែធ្នូ ឆ្នាំ២០២០ ក៏មានការព្រួយបារម្ភពីការឆ្លងរាលដាលជំងឺកូវីដ១៩ ចេញពីប្រទេសថៃ ឆ្លងដែនចូលមកកម្ពុជា។ រាជរដ្ឋាភិបាល បានចាត់វិធានការជាបន្ទាន់ តាមរយៈការរឹតបន្តឹងតាមច្រកព្រំដែន ដែលមានការត្រួតពិនិត្យសុខភាព ការធ្វើតេស្ត និងធ្វើចត្តាឡីស័ក នៅតំបន់ព្រំដែន រួមទាំងការត្រៀមឡានយោធា ដឹកអ្នកចេញមកពីថៃ យកទៅធ្វើចត្តាឡីស័កយ៉ាងហ្មត់ចត់ តាមភូមិឃុំថែមទៀតផង។
ក្នុងរយៈពេលប៉ុន្មានថ្ងៃមកនេះ មិនមានប្រជាជនកម្ពុជាណាម្នាក់ ឆ្លងដែនមកពីថៃ រកឃើញឆ្លងជំងឺកូវីដ១៩ឡើយ ។ទោះបីជាស្ថានភាពកូវីដ នៅផ្ទៃក្នុងប្រទេសយើង អាចគ្រប់គ្រងបាន ហើយមិនមានការឆ្លងរាលដាលបន្ថែមទៀតក្តី ប៉ុន្តែឥទ្ធិពលកូវីដ នៅបន្តអូសបន្លាយច្រើនខែតទៅទៀត ។ ដូច្នេះវិធានការការពារសាមញ្ញៗ នៅតែទាមទារឲ្យប្រជាពលរដ្ឋយើង បន្តប្រកាន់យក តាមរយៈការពាក់ម៉ាស់ លាងដៃនិងរក្សាគម្លាតយ៉ាងតិច ១,៥ម៉ែត្រពីគ្នាជាដើម ។
រីឯរាជរដ្ឋាភិបាល ក៏បានគិតគូរវែងឆ្ងាយ តាមរយៈដាក់ចេញនូវគោលនយោបាយជាច្រើន ដូចរៀបរាប់ខាងលើ ដើម្បីអន្តរាគមន៍ជួយដល់វិស័យកាត់ដេរ វិស័យទេសចរណ៍ វិស័យអាកាសចរណ៍ អ្នកផ្តល់កម្ចីក្នុងស្រុក និងក្រៅស្រុក ព្រមទាំងវិធានការទ្រទ្រង់ កំណើនសេដ្ឋកិច្ច ក៏ដូចជាជួយដល់ពលរដ្ឋក្រីក្រ ដោយសារឥទ្ធិពលនៃវិបត្តិកូវីដ១៩ ។ វិធានការទាំងនេះ ត្រូវបានរាជរដ្ឋាភិបាល ប្រកាន់យកចាប់តាំងពីការរាលដាលជំងឺកូវីដ១៩ នៅកម្ពុជា កាលពីខែមករា ៕ អត្ថបទដោយ៖ មុត ស្រីពៅ
ចែករំលែកព័តមាននេះ