រាជធានីភ្នំពេញ៖ បុរសជនជាតិចិនម្នាក់ ស្រវឹងស្រាបានបើករថយន្តទាំងដេកលក់ រេចង្កូត ជ្រុលទៅបុកទូរលក់ទឹកក្រឡុក បណ្តាលឲ្យរងការខូចខាត ហើយរថយន្ដបន្តទៅបុកនឹងបង្គោលស្លាកសញ្ញាចរាចរណ៍ បាក់សង្កត់​ទៅលើរថយន្ដតូយូតាព្រុសមួយគ្រឿង ដែលម្ចាស់ចតស្ងៀមទុកនៅមុខផ្ទះ បណ្តាលឲ្យរងការខូចខាតបន្ថែមទៀត​។​ ហេតុការណ៍នេះ បានកើតឡើង នៅវេលាម៉ោង ១រំលងអធ្រាត្រឈានចូលថ្ងៃទី​២៣ ខែធ្នូ ឆ្នាំ២០២០ ចំនុចស្តុបទំនប់ទឹក ផ្លូវ២១៧ កែងផ្លូវ៤៣២ សង្កាត់ទំនប់ទឹក ខណ្ឌបឹងកេងកង​​។ 

​​អ្នកលក់ដូរនៅទីនោះ បានអោយដឹងថា មុនពេលកើតហេតុ គេបានឃើញបុរសជាជនជាតិចិនម្នាក់ មិនដឹងថា ចេញពីផឹកនៅកន្លែងណានោះទេ គឺបានបើករថយន្តម៉ាក ឡង់គ្រីស័រ ពណ៌ស្ករ ពាក់ស្លាកលេខ ភ្នំពេញ 2J 7758 បានធ្វើដំណើរតាមបណ្ដោយផ្លូវ២៧១ ក្នុងទិសដៅ ពីត្បូងទៅជើង លុះមកដល់ចំនុចកើតហេតុ ដែលជាកន្លែងមានភ្លើងស្តុប ក៏ស្រាប់តែអ្នកបើកបររថយន្ត បានឈប់រថយន្ដមួយសន្ទុះធំ  ហើយពេលនោះដែរ ក៏ស្រាប់តែរថយន្ត បានបើកតិចៗទៅមុខ ទាំងសភាពអ្នកបើកបរដេកលក់តែម្ដង បណ្ដាលឲ្យរថយន្តរេចង្កូតជ្រុលទៅបុកនឹងទូរលក់ទឹកក្រឡុក​​របស់ពួកគាត់ បណ្តាលឲ្យរងការខូចខាតអស់ ហើយរថយន្តបង្កមិនទាន់អស់ល្បឿន ក៏បន្តទៅបុក និងបង្គោលស្លាកសញ្ញាចរាចរណ៍ បណ្ដាលអោយបាក់ទ្រេតសង្កត់ទៅលើរថយន្ដ តូយូតាព្រុស ពណ៌ទឹកប្រាក់ ដែលម្ចាស់ចតស្ងៀមទុកនៅមុខផ្ទះ បណ្តាលឲ្យរងការខូចខាតផ្នែក​ខាង​ក្រោយ ចំហៀងខាងស្ដាំ​បន្ថែមទៀត​។ 

ប្រភពបានបន្តទៀតថា បន្ទាប់ពីបុកកល់រថយន្តទៅមុខលែងរួចហើយ អ្នកបើកបរក៏បានដេកលក់ នៅក្នុងរថយន្តតែម្ដង​ រហូតទាល់តែផ្អើលដល់​អ្នកសារព័ត៌មាន​ទៅថត ក៏ដូចជាសមត្ថកិច្ចទៅដល់គោះទ្វារ ទើបបុរសជាជនជាតិចិន​ដឹងខ្លួនវិញ ហើយចុះពីលើរថយន្ត ទាំងសភាពងឿងឆ្ងល់​ រហូតទាល់តែសមត្ថកិច្ច​ចង្អុលអោយមើលការបើករថយន្តបុក​របស់របរគេ ទើបខាងជនជាតិចិន ភ្ញាក់​ខ្លួនវិញ ហើយបានទូរស័ព្ទហៅតំណាង មកសម្របសម្រួលគ្នាផងដែរ​។ 

ក្រោយពេលកើតហេតុ ដោយសារតែ​ប៉ះពាល់ដល់សម្បត្តិរបស់រដ្ឋ រថយន្តបង្ក រួមទាំងអ្នកបើកបរ ត្រូវបានសមត្ថកិច្ចជំនា​ ចរាចរណ៍ក្រុងភ្នំពេញ បានចុះទៅធ្វើការ​វាស់វែង អូស​យកទៅរក្សាទុកនៅការិយាល័យនគរបាលចរាចរណ៍ជើងគោក​នៃស្នងការដ្ឋាន​នគរបាល រាជធានីភ្នំពេញ ដើម្បីរង់ចាំ​ដោះស្រាយ៕  ដោយ៖ យឹម ឈឿន​