ខេត្តព្រះវិហារ ៖ គិតចាប់ពីថ្ងៃទី១៨ មកដល់ថ្ងៃទី២២ ខែធ្នូ ឆ្នាំ២០២០នេះអាកាសធាតុនៅខេត្តព្រះវិហារនៅតែបន្តចុះត្រជាក់អប្បរមា ១៣អង្សារ និងមានខ្យល់ធ្លាក់ខ្លាំងនៅបណ្តោយជួរភ្នំដងរែក តំបន់ប្រាសាទព្រះវិហារ ព្រំដែនកម្ពុជាថៃ ។
មន្ត្រីប្រចាំការលើខ្នងភ្នំប្រាសាទព្រះវិហារបានឲ្យដឹងថា រយៈពេលជិត១សប្តាហ៍ រហូតមកដល់ព្រឹកនេះ អាកាសធាតុនៅលើកំពូលភ្នំដងរែកតំបន់ប្រាសាទព្រះវិហារនៅតែបន្តចុះត្រជាក់ខ្លាំង នៅពេលព្រឹកព្រលឹម ចន្លោះពី១៣ អង្សារសេ ទៅ១៨អង្សារសេនឹងមានខ្យល់ធ្លាក់ខ្លាំង ។ ទោះជាបែបនេះក្តីក៏ពុំទាន់មានការប្រឈមចំពោះសុខភាព ដោយសារអាកាសធាតុត្រជាក់នេះដែរ ព្រោះកងកម្លាំងនៅប្រចាំការតាមបន្ទាត់ព្រំដែន បានទទួលអាវរងា និងថ្នាំបង្ការបស់សម្តេចតេជោ ដែលបានចែកជូនរួចជាស្រេចកន្លងទៅ ដើម្បីទប់ទល់នឹងអាកាសធាតុ នៅរដូវត្រជាក់នេះ ។
យោងតាមការព្យាករណ៍របស់ក្រសួងធនធានទឹក និងឧតុនិយម បានបង្ហាញថានៅថ្ងៃទី២៣-២៤ ខែធ្នូខាងមុខនេះ ភាគខាងជើងនៃប្រទេសកម្ពុជា ទទួលឥទ្ធិពលពីទ្រនុងសម្ពាធខ្ពស់ និងភាគខាងត្បូងនៃប្រទេសកម្ពុជា ទទួលឥទ្ធិពលពីសម្ពាធទាបសកម្មក្រវាញលើកទី២៣ និងនៅថ្ងៃទី២៥-២៩ ខែធ្នូ ប្រទេសកម្ពុជានឹងទទួលឥទ្ធិពលខ្យល់មូសុងឥសាន្តមធ្យម ដែលស្ថានភាពបែបនេះ នៅតាមបណ្តាខេត្ត ជាប់ជួរភ្នំដងរែក និងខ្ពង់រាបឥសាន្ត មានសីតុណ្ហភាព អប្បរមា ១៧-២០អង្សារនិងសីតុណ្ហភាព អតិបរមាមានចាប់ពី២៤-២៧អង្សារ ៕
ចែករំលែកព័តមាននេះ