ខេត្តកំពង់ចាម ៖ ផ្លូវក្រាលកៅស៊ូមួយខ្សែ មានដាំដើមលឿងរាជ ដែលរីកស្រស់ស្អាតពេលចេញផ្កាម្តងៗ ស្ថិតនៅភូមិបឹងបាសាក់ សង្កាត់សំបួរមាស ក្រុងកំពង់ចាម បែរជាត្រូវមនុស្សមួយចំនួនបានយកសំរាមមកចាក់ចោលបណ្តាលឱ្យជះក្លិនអាសោចិ៍ ដែលធ្វើឱ្យប៉ះពាល់ដល់អ្នកធ្វើដំណើរតាមដងផ្លូវ ហើយក្រុមអ្នកទាំងនោះ ត្រូវបានគេសង្ស័យថា ជាមុខសញ្ញាដដែលៗ។ ជាមួយគ្នានោះ អាជ្ញាធរបានធ្វើការព្រមានថា បើចាប់បាន ដោយមិនរាងចាលត្រូវផាកពិន័យ៤០ម៉ឺនរៀល និងបង្ហោះតាមបណ្ដាញសង្គម ដើម្បីឱ្យសាធារណជនឃើញមុខមាត់ទៀតផង។
អ្នកស្រី ឃាង ស៊ីផាន ចៅសង្កាត់សំបួរមាស ប្រាប់ឲ្យដឹងនៅព្រឹកថ្ងៃទី១៨ ខែធ្នូ ២០២០ថា នៅតាមផ្លូវក្រាលកៅស៊ូមួយខ្សែ ក្នុងនោះមួយផ្នែកជាប់នឹងភូមិបឹងបាសាក់ និងមួយផ្នែកទៀតជាប់នៅភូមិព្រែកដើមចាន់ ក្នុងសង្កាត់សំបួរមាស គឺអាជ្ញាធរបានយកចិត្តទុកដាក់ដោយជំរុញឲ្យប្រជាពលរដ្ឋដែលមានផ្ទះនៅសង្ខាងផ្លូវត្រូវសំអាតបរិស្ថាននៅក្នុងបរិវេណផ្ទះ និងតាមដងផ្លូវអោយបានស្អាត សម្រាប់ជាសោភ័ណភាពផងដែរ។
ចៅសង្កាត់សំបួរមាស បានបន្តឲ្យដឹងទៀតថា ទោះបីជាអាជ្ញាធរបានហាមថាមិនឲ្យចាក់សំរាមនៅតាមផ្លូវខ្នងទំនប់ ព្រមទាំងដាក់ស្លាកសញ្ញា «ហាមចាក់សំរាម» ប៉ុន្តែមានមនុស្សមួយចំនួនតូចនៅតែបំពាន ដោយដឹកសំរាមតាមម៉ូតូយកមកទម្លាក់ចោល ភាគច្រើនគឺនៅពេលល្ងាច និងព្រឹកព្រលឹមតែម្តង ពេលដែលមិនទាន់មានមនុស្សធ្វើដំណើរឆ្លងកាត់តាមដងផ្លូវនេះ។
ចៅសង្កាត់សំបួរមាស បន្តទៀតថា ហើយមនុស្សមួយចំនួនតូចនោះ គឺគេបានចាក់សំរាមនៅក្បែរស្លាកហាមចាក់សំរាមនោះតែម្តង គឺជាការបញ្ឈឺចិត្តដល់អាជ្ញាធរមូលដ្ឋាន ។ ដោយឃើញសំរាមគរច្រើន និងជះក្លិនស្អុយ លោកស្រីបានចំណាយថវិកាឱ្យគេទិញប្រេងយកមកដុតសំរាមទាំងនោះចោល។ ទោះជាបែបនេះក្តី មនុស្សគ្មានមាយាទនៅតែយកសំរាមមកចាក់ចោលនៅទីនេះដដែល ហើយអាជ្ញាធរបានរៀបចំឱ្យមានកម្លាំងឃ្លាំមើលដើម្បីចាប់អ្នកចាក់សំរាម ក្នុងករណីចាប់បានត្រូវផាកពិន័យ១០ម៉ឺនរៀល តែបើបុគ្គលនោះមិនរាងចាល នៅតែបន្តយកសំរាមមកចាក់ចោលត្រង់ទីតាំងនេះទៀត បើចាប់បាននឹងផាក ពិន័យ៤០ម៉ឺនរៀលតែម្តង។
អ្នកស្រី ស៊ីផាន ចៅសង្កាត់សំបួរមាស បញ្ជាក់បន្ថែមថា សូមឲ្យប្រជាពលរដ្ឋដែលមានផ្ទះនៅក្បែរទីតាំងគេចាក់សំរាមនោះ ជួយតាមដានមើល បើឃើញប្រញាប់រាយការណ៍មកអាជ្ញាធរជាបន្ទាន់ ដើម្បីមានវិធានការចាប់អ្នកនោះផាកពិន័យអោយចាស់ដៃតែម្ដង។
ដោយមិនអស់ចិត្ត អាជ្ញាធរនឹងត្រូវយកទៅផ្សព្វផ្សាយតាមបណ្ដាញសង្គម Facebook ចែករំលែកពីម្នាក់ទៅម្នាក់ ដើម្បីឲ្យឃើញបុគ្គលដែលគ្មានមាយាទ យកសំរាមមកចាក់ចោលនៅលើចញ្ចើមផ្លូវសាធារណៈ។
លោកស្រីសូមអំពាវនាវដល់ប្រជាពលរដ្ឋ មេត្តាបញ្ឈប់យកសំរាមមកចាក់ចោលនៅទីតាំងនេះទៀត សូមទុកដាក់សំរាមឲ្យបានត្រឹមត្រូវ ព្រោះមានក្រុមហ៊ុនស៊ិនទ្រីដើរប្រមូលសំរាមតាមខ្នងផ្ទះ៕
ចែករំលែកព័តមាននេះ