ខេត្តកំពង់ចាម ៖ ប្រជាពលរដ្ឋ រួមនឹងកម្លាំងសមត្ថកិច្ចបាននាំគ្នាភ្ញាក់ផ្អើលយ៉ាងខ្លាំង ដោយសារដែលឃើញពស់ថ្លាន់មួយក្បាលបានវារចូលផ្ទះប្រជាពលរដ្ឋនៅភូមិបឹងស្នាយ សង្កាត់សំបួរមាស ក្រុងកំពង់ចាម នាព្រឹកថ្ងៃទី១៤ ខែធ្នូ ឆ្នាំ២០២០នេះ។…
ខេត្តកំពង់ចាម ៖ ប្រជាពលរដ្ឋ រួមនឹងកម្លាំងសមត្ថកិច្ចបាននាំគ្នាភ្ញាក់ផ្អើលយ៉ាងខ្លាំង ដោយសារដែលឃើញពស់ថ្លាន់មួយក្បាលបានវារចូលផ្ទះប្រជាពលរដ្ឋនៅភូមិបឹងស្នាយ សង្កាត់សំបួរមាស ក្រុងកំពង់ចាម នាព្រឹកថ្ងៃទី១៤ ខែធ្នូ ឆ្នាំ២០២០នេះ។ ជាមួយគ្នានោះ សមត្ថកិច្ចក៏បានហៅអ្នកជំនាញមកចាប់ពស់នោះ និងបានយកទៅលែងនៅព្រៃ ក្នុងទីតាំងភ្នំប្រុសភ្នំស្រី ស្រុកកំពង់សៀម ព្រមទាំងបួនសួងសុំសេចក្តីសុខក្នុងក្រុមគ្រួសារ និងសូមឱ្យជំងឺកូវីដ១៩បានឆាប់រលត់ទៅវិញ កុំឲ្យមកយាយីលើរាងកាយរបស់ពលរដ្ឋទៀត។
លោក គង់ ប៊ុនចាន់ វ័យជិត៥០ឆ្នាំ បានរៀបរាប់ឲ្យដឹងថា ដំបូងរូបលោកស្លៀកសម្លៀកបំពាក់រៀបនឹងចេញទៅធ្វើការនៅសាលាក្រុងកំពង់ចាម តែមិនទាន់នឹងបានទៅផង ត្រូវបានប្អូនថ្លៃស្រីប្រទះឃើញពស់ថ្លាន់មួយក្បាលវារចូលមកក្នុងបរិវេណផ្ទះ រួចទៅសម្ងំនៅក្បែរខ្នោះអណ្ដូងទឹក កៀនរបងខាងមុខ។ ក្រោយមករូបលោកមិនហ៊ានចាប់ពស់ថ្លាន់មួយក្បាលដែលមានទម្ងន់ប្រហែលជាង១០គីឡូក្រាមនោះទេ ក៏បានរាយការណ៍ទៅប្រាប់កម្លាំងនគរបាលអន្តរាគមន៍ ដែលឈរជើងយាមប្រចាំការនៅមិនឆ្ងាយពីផ្ទះរបស់លោកឱ្យមកជួយចាប់ពស់នោះ។
បុរសជាម្ចាស់ផ្ទះរៀបរាប់ឲ្យដឹងទៀតថា កម្លាំងនគរបាលជាច្រើននាក់ ដោយរួមមានទាំងកម្លាំងប៉ុស្តិ៍រដ្ឋបាលសង្កាត់សំបួរមាស បានចុះមកដល់ តែមិនមានអ្នកណាម្នាក់មានជំនាញខាងចាប់ពស់នោះឡើយ ក៏បានទូរស័ព្ទហៅអ្នកជំនាញចាប់ពស់ម្នាក់ដែលរស់នៅក្នុងភូមិបឹងស្នាយ ដើម្បីឲ្យមកជួយចាប់ ព្រមទាំងយកទឹកអប់បាញ់លើពស់នោះទៀត ដើម្បីសុំសេចក្តីសុខក្នុងក្រុមគ្រួសារ ព្រមទាំងបួងសួងសូមឱ្យជំងឺកូវីដ១៩ ឆាប់រលត់ទៅវិញចេញពីប្រទេសកម្ពុជា ហើយឱ្យប្រជាពលរដ្ឋរស់នៅក្នុងភាពសុខដុមរមនា។ បន្ទាប់មក កម្លាំងនគរបាលអន្តរាគមន៍បានច្រកពស់ថ្លាន់នោះដាក់ក្នុងការ៉ុង រួចយកទៅលែងនៅក្នុងព្រៃ ក្រោយភ្នំប្រុសភ្នំស្រី ស្រុកកំពង់សៀមតែម្តង ។
បុរសម្ចាស់ផ្ទះបានរំឭកថា កាលពីមួយសប្តាហ៍មុន អ្នកភូមិរបស់គាត់ក៏បានឃើញពស់ថ្លាន់មួយក្បាលវារចេញពីដីភូមិដែលមានព្រៃដុះទ្រុបទ្រុលមកក្រៅបានតែបន្តិច ក៏ត្រូវអ្នកភូមិឃើញ និងនាំគ្នាដេញវារត់ចូលទៅក្នុងបរិវេណដីភូមិរបស់គេម្នាក់ ដែលទុកចោល និងមានព្រៃដុះទ្រុបទ្រុល។ ក៏ស្រាប់តែនៅព្រឹកថ្ងៃទី១៤ ធ្នូនេះ ក៏មានពស់ថ្លាន់មួយក្បាលនេះបានវារចេញមកចូលក្នុងបរិវេណផ្ទះរបស់លោក (ប៊ុនចាន់) ទំនងជាចង់ចាប់មាន់អ្នកនៅក្បែរខាងរបស់លោកធ្វើជាចំណីហើយ តែក៏ត្រូវប្អូនថ្លៃរបស់គាត់ឃើញទាន់ ក៏នាំគ្នាគាត់ចាប់ពស់ថ្លាន់នេះ រួចយកទៅលែងសុំសុខសុំជ័យតែម្តង៕
ចែករំលែកព័តមាននេះ