ខេត្តស្ទឹងត្រែង ៖ បងប្អូនជនជាតិដើមភាគតិច (ការវែត) រស់នៅស្រុកសៀមប៉ាងខេត្តស្ទឹងត្រែង បន្ទាប់ពីការងារធ្វើស្រែចំការពួកគាត់បង្វែរមកដាំបន្លែ-រកសត្វចង្រិត-កង្កែប- ក្តាម-ខ្យង- រែកដើរលក់ រកប្រាក់ ចំណូលយកទៅបង្គ្រប់លើការចំណាយសម្រាប់ដោះស្រាយ…
ខេត្តស្ទឹងត្រែង ៖ បងប្អូនជនជាតិដើមភាគតិច (ការវែត) រស់នៅស្រុកសៀមប៉ាងខេត្តស្ទឹងត្រែង បន្ទាប់ពីការងារធ្វើស្រែចំការពួកគាត់បង្វែរមកដាំបន្លែ-រកសត្វចង្រិត-កង្កែប- ក្តាម-ខ្យង- រែកដើរលក់ រកប្រាក់ ចំណូលយកទៅបង្គ្រប់លើការចំណាយសម្រាប់ដោះស្រាយ ជីវភាពប្រចាំថ្ងៃជំនួសការចូលព្រៃទៅរកផលអនុផលព្រៃឈើ ។
អ្នកលក់ដូរនៅតាមទីប្រជុំជនស្រុកសៀមប៉ាង ខេត្តស្ទឹងត្រែង លោកផាន់ យុត្ត អភិបាលស្រុកបានទទួលស្គាល់ថា បន្លែដែលបងប្អូនជនជាតិភាគតិចរែកដើរលក់ប្រជាពលរដ្ឋយើងនិយមទិញយកទៅបរិភោគច្រើន ព្រោះវាជាបន្លែធម្មជាតិដែលពួកគាត់ដាំដុះទៅតាមលក្ខណគ្រួសារ ។
លោកបន្តថា អាជ្ញាធររីករាយសប្បាយចិត្តបានឃើញពួកគាត់ចេះលក់ដូររកប្រាក់ដោះស្រាយជីវភាព ហើយក្នុងនាមអាជ្ញាធរ លោក និងជំរុញឱ្យមន្ត្រីជំនាញកសិកម្ម រកដៃគូរដូចអង្កការអភិវឌ្ឍផ្នែកកសិកម្មមកជួយបណ្តុះបណ្តាលផ្នែកបច្ចេកទេសដាំដុះបន្លែបង្ការ ដើម្បីធ្វើឲ្យពួកគាត់មានជំនាញដាំដុះបានល្អ និងឱ្យទទួលបានផលច្រើន ។
ស្រី្តឈ្មោះ ខេន យ៉ាន រស់នៅភូមិទាក់ទាម ឃុំសន្តិភាព បានលើកឡើងថា នៅឆ្នាំ២០២០នេះ បងប្អូនជនជាតិភាគតិចច្រើនគ្នាបានកាត់បន្ថយការពឹងផ្អែកលើផលអនុផលព្រៃឈើ ហើយងាកមកប្រកបរបរដាំបន្លែបង្ការលក់វិញ ។ ស្រី្តរូបនេះបន្ថែមទៀតថាមុខ របរដាក់អង្រែកលើស្មាដើរលក់ដូរបងប្អូនជនជាតិគាត់ពុំសូវមានជំនាញទេ ដូចនេះ សូមអំពាវនាវឲ្យអតិថិជនជួយគាំទ្រ ទិញដូរបន្លែរបស់ពួកគាត់ផង ដើម្បីឲ្យបងប្អូនជនជាតិមានទឹកចិត្តក្នុងការដាំបន្លែ ហើយបានរួមគ្នាការពារធនធានធម្មជាតិ និងព្រៃឈើសហគមន៍ឲ្យបាននៅគង់វង្សផងដែរ ។
ស្រី្ត ណែង ឡៃ ជនជាតិ ខិ រស់នៅភូមិឃុំសេកុង ស្រុកសៀមប៉ាងដើរលក់បន្លែនេះដែរ បានបញ្ជាក់ថា បច្ចុប្បន្នបងប្អូនជនជាតិភាគច្រើន បានអនុវត្តតាមការណែនាំរបស់អាជ្ញាធរ ប្រឹងប្រែងដាំដំណាំរួមផ្សំ និងបន្លែបង្ការ ដើម្បីចង់ផ្លាស់ប្តូរមុខរបរចាកចេញពីការចូលព្រៃបរបាញ់សត្វ បេះផ្លែឈ ឬកាប់ព្រៃឈើជាដើម ។
ស្រី្តជនជាតិ ភាគតិចដដែលបន្តថា ទោះបីជាការខិតខំព្យាយាមកែប្រែមុខរបរនេះយ៉ាងណាក៏ដោយក៏បងប្អូនមួយចំនួននៅមិនទាន់បោះបង់ចោលទាំងស្រុងបានដែរដូចជា ដើររកឃ្មុំ-ក្តាម-ខ្យង-កង្កែប-ហ៊ីង -ចង្រិត-យកមកបរិភោគ និងនៅសេសសល់យកមកលក់ ។
ស្រី្តជនជាតិរូបនេះអះអាងថា ការរែកទូលដើរលក់ភោគផលឆ្នាំនេះ ស្រួលជាងឆ្នាំមុនៗ ព្រោះបានផ្លូវរឹងល្អ ស្រួលធ្វើដំណើរជាងកាលពី (ឆ្នាំ២០១៨ និង១៩) ដោយសារកាលនោះផ្លូវខែវស្សាភក់ដើរមិនរួច ។
សូមបញ្ជាក់ថា បងប្អូនជនជាតិដើមភាគតិចនៅស្រុកសៀមប៉ាង មានគ្រឹង-កាវែត-ខិ-បច្ចុប្បន្នបានផ្លាស់ប្តូរទំលាប់ច្រើនចេះលក់ដូរផលិតផលដែលជាមុខរបរបន្ទាប់បន្សំ ដើម្បីរកប្រាក់ចំណូលបង្គ្រប់បន្ថែមក្នុងការដោះស្រាយជីវភាពប្រចាំថ្ងៃក្រៅពីការធ្វើស្រែចំការ ៕
ចែករំលែកព័តមាននេះ