រាជធានីភ្នំពេញ ៖ ការធ្លាក់ឈាមក្រោយសម្រាលកូនគឺជាការធ្លាក់ឈាមដែលមានបរិមាណឈាមបាត់បង់លើសពីចំនួន៥០០មីល្លីលីត្រ ចំពោះស្ត្រីដែលសម្រាលកូនតាមទ្វារមាស និងលើសពី១០០០មីល្លីលីត្រចំពោះស្ត្រីដែលសម្រាលកូនដោយវះកាត់ ។ គេបែងចែកការហូរឈាមក្រោយសម្រាលជា២ផ្នែកធំៗ
១-ការធ្លាក់ឈាមក្រោយសម្រាលភ្លាមៗដែលគេគិតក្នុងរយៈពេល២៤ម៉ោង
២-គឺការធ្លាក់ឈាមក្រោយសម្រាលអូសបន្លាយគេគិតចាប់ពី២៤ម៉ោងឡើងទៅរហូតដល់៦សប្តាហ៍ក្រោយការសម្រាលកូន ។
ជុំវិញនៃការធ្លាក់ឈាមគេសង្កេតឃើញមូលហេតុមាន៤ដែលបណ្តាលឲ្យមានការធ្លាក់ឈាមក្រោយសម្រាលភ្លាមៗ
១-ស្ត្រីស្បូនខ្សោយមានន័យថាស្បូនមិនកន្ត្រាក់ឡើងវិញក្រោយពីទារកចេញពីមាត់ស្បូនគេសង្កេតឃើញមានប្រហែលជា៧០ភាគរយ
២-ការដាច់រហែកនៅតំបន់ទ្វារមាស តំបន់មាត់ស្បូន ឬក៏តំបន់ប៉េរីណេ ដែលគេសង្កេតឃើញប្រហែល២០ភាគរយ
៣-គឺមូលហេតុបណ្តាលមកពីការសល់សុក ការសល់កម្ទេចសុកនៅក្នុងស្បូនដែលគេសង្កេតឃើញមានប្រហែល១០ភាគរយ
៤-មូលហេតុចុងក្រោយដែលធ្ងន់ធ្ងរជាងនេះ គឺវិបត្តិដំណក់ឈាមដែលគេសង្កេតឃើញមានប្រហែល១ភាគរយ ។ នេះជាប្រសាសន៍របស់វេជ្ជបណ្ឌិត ជួង សុខណែត គ្រូពេទ្យឯកទេសរោគស្ត្រី និងសម្ភពនៅមន្ទីរពេទ្យកាល់មែ៉តបានឲ្យដឹង ។ លោកវេជ្ជបណ្ឌិត ជួង សុខណែត បានប្រាប់ទៀតថា ចំណែកកត្តាប្រឈមយើងមានកត្តាប្រឈមមួយចំនួនដែលគេមើលឃើញថា ស្ត្រីមានការធ្លាក់ឈាមក្រោយសម្រាលកូន ករណីស្ត្រីដែលមានស្បូនរីកធំក្នុងកំឡុងមានផ្ទៃពោះ ដូចករណីមានកូនភ្លោះ ទឹកភ្លោះច្រើន ករណីកូនរីកធំ និងករណីផ្សេងៗទៀតដូចជា ស្ត្រីដែលមានកូនច្រើនដង រំលូតកូន យកកូនចេញច្រើនដង ឬក៏មានដុំសាច់ក្នុងស្បូន ធ្វើឲ្យការកន្ត្រាក់ស្បូន ក្រោយពីយកកូនចេញធ្វើឲ្យវាកន្ត្រាក់មិនបានល្អ ។ នៅមានកត្តាជាច្រើនទៀតដូចជាស្ត្រីមានសភាពស្លេកស្លាំងនៅពេលកំពុងមានផ្ទៃពោះ មានបញ្ហាធ្លាក់ឈាមពីមុន ឬក៏មានជំងឺបន្ថែមទៀតដូចជាជំងឺព្រាយក្រឡាភ្លើងជាដើម ហើយគេសង្កេតឃើញឱសថមួយចំនួនក្នុងការប្រើប្រាស់កំឡុងពេលមានផ្ទៃពោះធ្វើឲ្យការកន្ត្រាក់ស្បូនមិនបានល្អក្រោយពេលសម្រាលទារកចេញមក ។ វិធីការពារឬបង្ការ គ្រូពេទ្យត្រូវផ្តល់ដំបូន្មានដល់ស្ត្រីមានផ្ទៃពោះឲ្យហូបថ្នាំដែលមានជាតិដែកយា៉ងតិចបំផុត៩០គ្រាប់ ក្នុងកំឡុងពេលមានផ្ទៃពោះ ។ ហើយទូន្មានកុំឲ្យឡើងទម្ងន់ខ្លាំងពេក កាលណាឡើងទម្ងន់ខ្លាំងក៏ជាឧបសគ្គមួយធ្វើឲ្យស្បូនខ្សោយនិងណែនាំឱ្យទៅពិនិត្យផ្ទៃពោះយ៉ាងតិច៣ដងទៅ៥ដង ដើម្បីគ្រូពេទ្យងាយស្រួលទប់ស្កាត់នូវកត្តាប្រឈមនានា ។
ចំណែកវិធីសាស្ត្រក្នុងការព្យាបាលករណីធ្លាក់ឈាមក្រោយសម្រាល បញ្ហាខ្លះគ្រូពេទ្យប្រើថ្នាំធ្វើឲ្យស្បូនកន្ត្រាក់ឡើងវិញ ដោយជោគជ័យធ្វើឲ្យអ្នកជំងឺចៀសផុតពីការកាត់ស្បូន តែករណីយខ្លះមិនអាចទទួលការព្យាបាលដោយប្រើថ្នាំដបានជ័យទេ ដូច្នេះអ្នកជំងឺប្រឈមនឹងការកាត់ស្បូនចោល ឬអាចឈានដល់ដំណាក់កាលបញ្ចូលឈាម ។
វេជ្ជបណ្ឌិត ជួង សុខណែត គ្រូពេទ្យឯកទេសរោគស្ត្រីនិងសម្ភពនៅមន្ទីរពេទ្យកាល់មែ៉តបានបញ្ជាក់ថា ចំពោះផលវិបាកពេលដែលស្ត្រីមានបញ្ហាធ្លាក់ឈាមគាត់អាចប្រឈមនឹងវិបត្តិដំណក់ឈាម ហើយយូទៅអាចស្លាប់ ឬមួយគាត់មិនស្លាប់ទេតែប្រឈមនឹងការកាត់ស្បូនពេលនោះ អ្នកជជំងឺនឹងអាចជួបវិបត្តិការមានកូនទៅថ្ងៃក្រោយ ។
នៅចុងឆ្នាំ២០១៤ដល់ដើមឆ្នាំ២០១៥ មន្ទីរពេទ្យកាល់មែ៉តបានទទួលការសម្រាលកូនចំនួន១០០២២ករណីហើយបានជួបអ្នកជំងឺដែលធ្លាក់ឈាម៤០ករណី ក្នុង៤០ករណីនេះ មានការកាត់ស្បូន១៤ករណី ចំណែកការស្លាប់វិញ ផ្នែកសម្ភពរបស់មន្ទីរពេទ្យកាល់ម៉ែតមិនដែលមាននោះទេ ។ តាមរយៈសារព័ត៌មានកោះសន្តិភាព វេជ្ជបណ្ឌិត ជួង សុខណែត បានអំពាវនាវដល់ស្ត្រីមានផ្ទៃពោះទាំងឡាយត្រូវតែទៅមន្ទីរពេទ្យដើម្បីឲ្យគ្រូពេទ្យពិនិត្យនិងតាមដានសុខភាពក្នុងកំឡុងពេលមានផ្ទៃពោះ ។ បើសិនជាស្ត្រីមានផ្ទៃពោះមានសភាពស្លេកស្លាំងត្រូវរួសរាន់មកកាន់មន្ទីរពេទ្យកាល់មែ៉ត ព្រោះបច្ចុប្បន្នមន្ទីរពេទ្យកាល់ម៉ែតមានឧបករណ៍ទំនើប និងថ្នាំព្យាបាលការធ្លាក់ឈាមក្រោយសម្រាលយ៉ាងមានប្រសិទ្ធភាព ៕
ចែករំលែកព័តមាននេះ