រាជធានីភ្នំពេញ ៖ សពសម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភា និងជាប្រធានគណបក្សប្រជាជនកម្ពុជា នៅព្រឹកថ្ងៃទី១៩ មិថុនា ត្រូវបានរំកិលដង្ហែចេញពីភូមិគ្រឹះរបស់សម្តេចមកកាន់ទីស្ថានមេរុ ដើម្បីប្រារព្ធពិធីបូជាតាមប្រពៃណីទំនៀមទម្លាប់ខ្មែរនៅមុខវត្តបទុមវតី
រាជធានីភ្នំពេញ ៖ សពសម្តេចអគ្គមហាធម្មពោធិសាល ជា ស៊ីម អតីតប្រធានព្រឹទ្ធសភា និងជាប្រធានគណបក្សប្រជាជនកម្ពុជា នៅព្រឹកថ្ងៃទី១៩ មិថុនា ត្រូវបានរំកិលដង្ហែចេញពីភូមិគ្រឹះរបស់សម្តេចមកកាន់ទីស្ថានមេរុ ដើម្បីប្រារព្ធពិធីបូជាតាមប្រពៃណីទំនៀមទម្លាប់ខ្មែរនៅមុខវត្តបទុមវតី ក្នុងខណ្ឌដូនពេញ ។ ការប្រារព្ធពិធីបូជាសពសម្តេចអគ្គមហាធម្មពោធិសាល ជាស៊ីម បានប្រព្រឹត្តទៅក្រោមព្រះរាជាធិបតីភាពដ៏ខ្ពង់ខ្ពស់ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ។
នៅក្នុងពិធីនេះដែរ មានការនិមន្ត យាង និងអញ្ជើញចូលរួមពីសម្តេចព្រះអគ្គមហាសង្ឃរាជាធិបតី ទេព វង្ស សម្តេចព្រះអភិសិរីសុគន្ធាមហាសង្ឃរាជាធិបតី បួរ គ្រី សម្តេចព្រះសង្ឃនាយក និងព្រះថេរានុត្ថេរៈជាច្រើនអង្គ សម្តេចវិបុលសេនាភក្តី សាយ ឈុំ ប្រធានព្រឹទ្ធសភានៃព្រះរាជាណាចក្រកម្ពុជា សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា និងលោកជំទាវ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំងសម្តេច ព្រះអង្គម្ចាស់ លោកលោកជំទាវ លោកឧកញ៉ា លោកស្រី មន្ត្រីរាជការ កងកម្លាំងប្រដាប់អាវុធ អង្គទូតនានាប្រចាំនៅកម្ពុជា តំណាងអង្គការជាតិ-អន្តរជាតិ ពុទ្ធបរិស័ទ ជនរួមជាតិ និងញាតិមិត្តជិតឆ្ងាយយ៉ាងច្រើនកុះករ ។
នៅក្នុងវិយោគកថា ដែលអានដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានខ្លឹមសារជាអាទិ៍ថា ទូលព្រះបង្គំយើងខ្ញុំទាំងអស់គ្នា មានទុក្ខក្រៀមក្រំ ខ្សឹកខ្សួល អួលអាក់ក្នុងចិត្តឥតឧបមា ដែលទូលព្រះបង្គំ យើងខ្ញុំបានដង្ហែជូនដំណើរសពសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ប្រធានគណបក្សប្រជាជនកម្ពុជា និងជាប្រធានគណៈអធិបតីកិត្តិយសក្រុមប្រឹក្សាជាតិរណសិរ្យសាមគ្គីអភិវឌ្ឍន៍មាតុភូមិកម្ពុជា មកកាន់ទីស្ថានបច្ឆាមរណៈនាពេលនេះ ជាកិច្ចលាគ្នាចុងក្រោយស្របតាមប្រពៃណីទំនៀមទម្លាប់ខ្មែរយើង ។
វិយោគកថាបន្តថា មរណភាពរបស់សម្តេចអគ្គមហាធម្មពោធិសាល ជា ស៊ីម ជាការបាត់បង់ឥស្សរជនជាន់ខ្ពស់ ជាថ្នាក់ដឹកនាំកំពូលមួយរូបរបស់ជាតិ ប្រជាជន និងគណបក្សប្រជាជនកម្ពុជា ដែលមួយជីវិតរបស់សម្តេចបានតស៊ូដើម្បីឯករាជ្យ ពិសេសបានពុះពាររាល់ឧបសគ្គដើម្បីសង្គ្រោះជាតិ កសាងសន្តិភាព ផ្សះផ្សា បង្រួបបង្រួមជាតិ ការពារ ស្តារ និងអភិវឌ្ឍន៍ជាតិមាតុភូមិរហូតមក ។ មរណភាពរបស់សម្តេចអគ្គមហាធម្មពោធិសាល ជា ស៊ីម ក៏ជាការបាត់បង់បិតា ជីតា ឪពុកធំ ឪពុកមា និងកល្យាណមិត្ត ដែលប្រកបដោយព្រហ្មវិហារធម៌ដ៏ខ្ពង់ខ្ពស់បំផុត ។ ដោយសេចក្តីរន្ធត់សោកស្តាយអាឡោះអាល័យ ក្រៀមក្រំរកទីបំផុតគ្មាននោះ ទួលព្រះបង្គំជាខ្ញុំ ខ្ញុំព្រះករុណា សូមព្រះរាជានុញ្ញាត និងអនុញ្ញាតថ្វាយប្រគេន និងជម្រាបជូនពីដំណើរជីវិតសង្ខេបរបស់សម្តេចអគ្គមហាធម្មពោធិសាល ជា ស៊ីម ដូចតទៅ ៖
១-អំពីស្ថានភាពគ្រួសារ ៖ សម្តេចអគ្គមហាធម្មពោធិសាល ជា ស៊ីម (នាមដើម យិន សយ) កើតនៅថ្ងៃទី១៥ វិច្ឆិកា ឆ្នាំ១៩៣២ ក្នុងគ្រួសារកសិករ នៅភូមិពពេល ឃុំអម្ពិល ស្រុករមាសហែក ខេត្តស្វាយរៀង ។ បិតាឈ្មោះ យិន សៅ និងមាតាឈ្មោះ ប៉ែន នៅ ។ សម្តេចមានបងប្អូនបង្កើត៧នាក់ ហើយទាំងអស់គ្នាបានទទួលអនិច្ចកម្មអស់ហើយ ។
តាំងពីកុមារភាពរហូតមកដល់ពេញវ័យ អាស្រ័យដោយការគោរពប្រពៃណីខ្មែរ និងដើម្បីសម្តែងកតញ្ញូតាធម៌ ចំពោះមាតាបិតា នៅឆ្នាំ១៩៤៥ ត្រូវបានលោកឪពុក អ្នកម្តាយ នាំបុត្រវ័យជំទង់ជាទីស្រទ្បាញ់ ឱ្យចូលសាងផ្នួសជាសាមណេរនៅវត្តអម្ពិល ឃុំអម្ពិល ស្រុករមាសហែក ខេត្តស្វាយរៀង ។ តាំងពីបានសំណាក់នៅក្នុងវត្តហើយ សាមណេរ យិន សយ បានយកចិត្តទុកដាក់ខិតខំប្រឹងប្រែងឧស្សាហ៍ព្យាយាមរៀនព្រះធម៌ ធម្មវិន័យ អក្សរសាស្ត្រ លេខនព្វន្ត ។ល។ ហើយមានការយល់ដឹង និងចេះចាំយ៉ាងជ្រាលជ្រៅនូវក្បួនច្បាប់ព្រះពុទ្ធសាសនា សមជាពហុស្សូត ក្នុងពុទ្ធសាសនមណ្ឌលគ្រានោះ ព្រមទាំងមានការគោរពគ្រូបាធ្យាយជានិច្ច មិនថាយប់មិនថាថ្ងៃ រហូតដល់បញ្ចប់ការសិក្សា និងទទួលបានសញ្ញាបត្រពុទ្ធិកមធ្យមសិក្សានៅឆ្នាំ១៩៥២ ។
សម្តេចបានរៀបអាពាហ៍ពិពាហ៍ជាមួយយុវតី ញ៉ែម សឿន នៅឆ្នាំ១៩៥៥ ។ លោកជំទាវ ញ៉ែម សឿន ប្រសូតនៅថ្ងៃទី១៥ មករា ឆ្នាំ១៩៣៨ នៅភូមិកន្លែងជ្រៅ ឃុំក្របៅ ស្រុកកំចាយមារ ខេត្តព្រៃវែង ហើយបានទទួលមរណភាពនៅថ្ងៃទី៣ កក្កដា ឆ្នាំ២០០៩ ។ សម្តេចនិងលោកជំទាវ ញ៉ែម សឿន មានបុត្រាបុត្រីចំនួន៧នាក់ ក្នុងនោះប្រុស៤នាក់ ស្រី៣នាក់ ។
២-ប្រវត្តិនៃការតស៊ូនិងបេសកកម្មបម្រើ សង្គ្រោះ និងអភិវឌ្ឍជាតិមាតុភូមិ ៖ តាំងពីអាយុពេញវ័យមក សម្តេច ជា សុីម បានចូលរួមក្នុងចលនាតស៊ូដើម្បីឯករាជ្យមាតុភូមិកម្ពុជា ។ ក្នុងបេសកកម្មប្រវត្តិសាស្ត្រសង្គ្រោះជាតិ និងក្នុងឋានៈតួនាទីជាអនុប្រធានរណសិរ្សសាមគ្គីសង្គ្រោះជាតិកម្ពុជា សម្តេចបានរួមជាមួយសម្តេច ហេង សំរិន សម្តេច ហ៊ុន សែន និងឥស្សរជនមួយចំនួនទៀត ដឹកនាំការតស៊ូរំដោះជាតិនិងប្រជាពលរដ្ឋឱ្យរួចផុតពីរបបប្រល័យពូជសាសន៍ ប៉ុល ពត នៅថ្ងៃទី៧ មករា ១៩៧៩ ។
ក្រោយថ្ងៃរំដោះ៧ មករា ភ្លាម សម្តេចបានរួមជាមួយថ្នាក់ដឹកនាំនិងប្រជាជនកម្ពុជា ជ្រោងទង់ស្តារ និងកសាងប្រទេសជាតិឡើងវិញ ដើម្បីបំបាត់នូវផលវិបាកធ្ងន់ធ្ងរដែលរបបប្រល័យពូជសាសន៍បានបន្សល់ទុក និងខិតខំរាំងខ្ទប់កុំឱ្យរបបព្រៃផ្សៃនេះវិលត្រឡប់មកវិញបាន ។ នៅពេលនោះ សម្តេចបានទទួលតួនាទីជាសមាជិកក្រុមប្រឹក្សាប្រជាជនបដិវត្តន៍កម្ពុជា និងជារដ្ឋមន្ត្រីក្រសួងមហាផ្ទៃ នៃសាធារណរដ្ឋប្រជាមានិតកម្ពុជា ។
ចាប់ពីឆ្នាំ១៩៨១មក សម្តេចបានត្រូវជ្រើសតាំងជាប្រធានរណសិរ្សសាមគ្គីកសាងមាតុភូមិកម្ពុជា ជាតំណាងរាស្ត្រមណ្ឌលព្រៃវែង និងជាប្រធានរដ្ឋសភានៃសាធារណរដ្ឋប្រជាមានិតកម្ពុជា ។ សម្តេចបានធ្វើជាសាស្ត្រាចារ្យនៅសាលានយោបាយជាច្រើន ដើម្បីបណ្តុះបណ្តាលធនធានមនុស្ស ។
នាថ្ងៃទី១៧ ខែតុលា ឆ្នាំ១៩៩១ សម័យប្រជុំពេញអង្គលើកទី១៤ នៃគណៈកម្មាធិការកណ្តាលគណបក្សប្រជាជនកម្ពុជា បានសម្រេចជ្រើសតាំងសម្តេចជាប្រធានគណបក្សប្រជាជនកម្ពុជា ហើយសម្តេចបានដឹកនាំគណបក្សក្នុងតំណែងនេះ រហូតដល់ជីវិតចុងក្រោយរបស់សម្តេច ។
សម្តេចបានរួមជាមួយថ្នាក់ដឹកនាំទាំងអស់ខិតខំប្រឹងប្រែងដោះស្រាយបញ្ហាជាតិរហូតឈានដល់កិច្ចព្រមព្រៀងទីក្រុងប៉ារីស ឆ្នាំ១៩៩១ ស្តីពីដំណោះស្រាយនយោបាយនៅកម្ពុជា ។ តាមរយៈការបោះឆ្នោតជាសាកលក្រោមការរៀបចំរបស់អាជ្ញាធរបណ្តោះអាសន្ននៃអង្គការសហប្រជាជាតិប្រចាំនៅកម្ពុជា (UNTAC) នាខែឧសភា ឆ្នាំ១៩៩៣ សម្តេចបានជាប់ឆ្នោតជាតំណាងរាស្ត្រមណ្ឌលភ្នំពេញ បន្ទាប់មកត្រូវបានជ្រើសតាំងជាប្រធានរដ្ឋសភានៃព្រះរាជាណាចក្រកម្ពុជា ។ សម្តេចត្រូវជាប់ឆ្នោតម្តងទៀត ជាតំណាងរាស្ត្រមណ្ឌលភ្នំពេញ នៅពេលបោះឆ្នោតជាតិលើកទី២ នាថ្ងៃទី២៦ ខែកក្កដា ឆ្នាំ១៩៩៨ ។
សម្តេចត្រូវបានព្រះករុណាព្រះបាទសម្តេចព្រះនរោត្តម សីហនុ សព្វព្រះរាជហឫទ័យតែងតាំងជាប្រធានព្រឹទ្ធសភានៃព្រះរាជាណាចក្រកម្ពុជា សម្រាប់នីតិកាលទី១ នៅថ្ងៃទី១១ មីនា ឆ្នាំ១៩៩៩ ។ តាមរយៈការបោះឆ្នោតអសកលនាថ្ងៃទី២២ មករា ឆ្នាំ២០០៦ សម្តេចត្រូវបានជ្រើសតាំងជាសមាជិកព្រឹទ្ធសភាភូមិភាគទី១ក្រុងភ្នំពេញបន្ទាប់មកត្រូវបានជ្រើសតាំងជាប្រធានព្រឹទ្ធសភានីតិកាលទី២ ។
នៅថ្ងៃទី២៩ មេសា ឆ្នាំ២០០៦ សម្តេចត្រូវបានជ្រើសតាំងជាប្រធានគណៈអធិបតីកិតិ្តយសក្រុមប្រឹក្សាជាតិរណសិរ្សសាមគ្គិអភិវឌ្ឍន៍មាតុភូមិកម្ពុជា ។
តាមរយៈការបោះឆ្នោតជ្រើសតាំងសមាជិកព្រឹទ្ធសភានីតិកាលទី៣ នាថ្ងៃទី២៩ មករា ឆ្នាំ២០១២ សម្តេចត្រូវបានជាប់ឆ្នោតជាសមាជិកព្រឹទ្ធសភាមណ្ឌលភូមិភាគភ្នំពេញម្តងទៀត និងបន្ទាប់មក ត្រូវបានជ្រើសតាំងជាប្រធានព្រឹទ្ធសភានីតិកាលទី៣ ។
៣-អំពើគោរមងារ សញ្ញាបត្រ និងគ្រឿងឥស្សរិយយស
-នៅថ្ងៃទី៩ ខែវិច្ឆិកា ឆ្នាំ១៩៩៣ សម្តេចត្រូវបានព្រះករុណាព្រះបាទសម្តេច ព្រះនរោត្តម សីហនុ ព្រះមហាក្សត្រនៃព្រះរាជាណាចក្រកម្ពុជា ប្រោសព្រះរាជទាននូវគោរមងារជា «សម្តេច» ។
-នៅថ្ងៃទី២ ខែមីនា ឆ្នាំ១៩៩៨ សម្តេចទទួលបានសញ្ញាបត្របណ្ឌិតកិត្តិយសទស្សនវិជ្ជាផ្នែកវិទ្យាសាស្ត្រនយោបាយពីសាកលវិទ្យាល័យនៃរដ្ឋកាលីហ្វ័រនីញ៉ា សហរដ្ឋអាមេរិក ។
-នៅថ្ងៃទី២៧ ខែកញ្ញា ឆ្នាំ២០០៧ សម្តេចទទួលបានសញ្ញាបត្របណ្ឌិតកិត្តិយសទស្សនវិជ្ជាផ្នែកអភិវឌ្ឍន៍សមាហរណសាស្ត្រពីសាកលវិទ្យាល័យ ឧប៊ុនរ៉ាតថានី នៃព្រះរាជាណាចក្រថៃ ។
-នៅថ្ងៃទី១២ ខែតុលា ឆ្នាំ២០០៧ សម្តេចត្រូវបានព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ប្រោសប្រទានដំឡើងឋានន្តរស័ក្តិថ្នាក់នាយឧត្តមសេនីយ៍ផុតលេខផ្កាយមាស៥ នៃកងយោធពលខេមរភូមិន្ទ ។
-នៅថ្ងៃទី១៥ កក្កដា ២០១០ សម្តេចបានទទួលសញ្ញាបត្របណ្ឌិតកិត្តិយសទស្សនវិជ្ជាផ្នែកស្រាវជ្រាវវិស័យកសិកម្មពីវិទ្យាស្ថានស្រាវជ្រាវវប្បធម៌ពិភពលោកនៃសាធារណរដ្ឋប្រជា
មានិតចិន ។
-នៅថ្ងៃទី១៣ កញ្ញា ២០១០ សម្តេចទទួលបានសញ្ញាបត្របណ្ឌិតកិត្តិយសទស្សនវិជ្ជាផ្នែកភាពជាអ្នកដឹកនាំជាន់ខ្ពស់នៃកិច្ចការព្រឹទ្ធសភាពីសាកលវិទ្យាល័យឌីអូផិនសឺមីណារី រដ្ឋកាលីហ្វ័រនីញ៉ា សហរដ្ឋអាមេរិក ។
-នៅថ្ងៃទី៣០ មីនា ២០១១ សម្តេចត្រូវបានព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ប្រោសប្រទានគោរមងាជា «កិត្តិព្រឹទ្ធបណ្ឌិត» នៃរាជបណ្ឌិត្យសភាកម្ពុជា ។
សម្តេចអគ្គមហាធម្មពោធិសាល ជា ស៊ីម ធ្លាប់បានទទួលគ្រឿងឥស្សរិយយសសំខាន់ៗដូចខាងក្រោម ៖
-មុនីសារាភ័ណ្ឌ ថ្នាក់មហាសេរីវឌ្ឍន៍ នៅថ្ងៃទី១៦ ធ្នូ ១៩៩២
-ព្រះរាជាណាចក្រកម្ពុជា ថ្នាក់មហាសេរីវឌ្ឍន៍ នៅថ្ងៃទី៣០ មេសា ២០០១
-សុវត្ថារា ថ្នាក់មហាសេរីវឌ្ឍន៍ នៅថ្ងៃទី២៩ កញ្ញា ២០០១
-ការពារជាតិ មាស២ ប្រាក់២ សំរឹទ្ធិ២ នៅថ្ងៃទី១៥ តុលា ២០០១
-សេនាជ័យសិទ្ធិ នៅថ្ងៃទី១៥ តុលា ២០០១
-ជាតូបការ នៅថ្ងៃទី៧ មីនា ២០០៣
-ឯករាជ្យជាតិ នៅថ្ងៃទី៧ មីនា ២០០៣
-គ្រឿងឥស្សរិយយសមាសថ្នាក់ខ្ពស់បំផុតរបស់សាធារណរដ្ឋប្រជាធិបតេយ្យប្រជាមានិតឡាវ នៅថ្ងៃទី២៧ វិច្ឆិកា ២០០៨
-គ្រឿងឥស្សរិយយសខ្ពស់បំផុតសម្រាប់ជនបរទេសពីព្រះចៅអធិរាជជបុ៉ន Grand Cordon of the Order of the Rising Sun នៅថ្ងៃទី៣ វិច្ឆិកា ២០១៣ ។
សម្តេចអគ្គមហាធម្មពោធិសាល ជា ស៊ីម ជាទីគោរព និងជាទីអាឡោះអាល័យ យើងខ្ញុំទាំងអស់គ្នាជាសមាជិក សមាជិកា ព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការគ្រប់ជាន់ថ្នាក់ រួមជាមួយបុត្រធីតា បងប្អូនសាច់ញាតិសាច់សាលោហិតទាំងប្រុស ទាំងស្រី បានរៀបចំចាត់ចែងធ្វើបុណ្យទក្ខិណានុប្បទាន ឧទ្ទិសមគ្គផលជូនដល់វិញ្ញាណក្ខន្ធរបស់សម្តេចតាមប្រពៃណីព្រះពុទ្ធសាសនាច្រើនថ្ងៃកន្លងមកហើយ ហើយពេលនេះជានាទីចុងក្រោយដែលសម្តេច និងយើងខ្ញុំទាំងអស់គ្នា ព្រមទាំងបុត្រា បុត្រី ចៅប្រុស ចៅស្រី របស់សម្តេចខានជួបមុខគ្នាជារៀងរហូត ។
វិនិយោគកថាបន្តថា ប៉ុន្មាននាទីទៀតនេះសពសម្ដេចនឹងរលាយបាត់សូន្យពីយើងខ្ញុំទាំងអស់គ្នាហើយ យើងខ្ញុំសូមគោរពអញ្ជើញវិញ្ញាណក្ខន្ធសម្ដេចទៅកាន់សុគតិភពជាទីបរមសុខជារៀងរហូតតទៅ ។ ប៉ុន្តែអ្វីដែលបន្សល់ទុកនៅហើយមិនរលត់សូន្យបង់តាមរូបកាយរបស់សម្ដេចនោះគឺសេចក្ដីល្អ អំពើជាកុសល សេចក្ដីថ្លៃថ្នូរ សកម្មភាពតស៊ូ អំណត់ព្យាយាម ភាពម៉ឺងម៉ាត់ក្នុងការងារ ភក្ដីភាព និងឧត្តមភាព ។ ស្នាដៃដ៏ធំធេងរបស់សម្ដេចចំពោះជាតិ សាសនា ព្រះមហាក្សត្រ ចំពោះសង្គមជាតិ ចំពោះព្រះពុទ្ធសាសនា និងចំពោះប្រជាពលរដ្ឋ ។ គុណធម៌ដ៏ឧត្តុង្គឧត្តមនេះនឹងមិនអាចបាត់បង់ឡើយ ហើយនឹងស្ថិតនៅជាអមតៈអស់កាលជាដរាបតរៀងទៅ ។
យើងខ្ញុំទាំងអស់គ្នា សូមប្ដេជ្ញាថែរក្សានិងពង្រឹងនូវឧត្តមគតិជាតិ មនសិការស្នេហាជាតិ វីរភាពនិងបទពិសោធន៍របស់សម្ដេចឱ្យស្ថិតស្ថេរនិងរីកចម្រើនជានិច្ចនិរន្តរ៍ ។
បន្ទាប់មក សម្ដេចក្រឡាហោម ស ខេង ក៏បាននាំព្រះអគ្គីពីសម្ដេចអគ្គមហាសង្ឃរាជទាំងពីរគណៈដង្ហែមកថ្វាយព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដើម្បីព្រះអង្គថ្វាយព្រះភ្លើងបូជាសពសម្ដេចអគ្គមហាធម្មពោធិសាល ជា ស៊ីម ៕
ចែករំលែកព័តមាននេះ