ខេត្តកំពង់ចាម ៖ សង្វៀនបើកបញ្ជល់មាន់ និងវង់អាប៉ោងលេងលួចលាក់ដែលខុសច្បាប់មួយកន្លែងនៅក្នុងចម្ការស្វាយចន្ទី ត្រូវបានកម្លាំងសមត្ថកិច្ចព្រហ្មទណ្ឌកម្រិតស្រាលខេត្តឆ្មក់បង្ក្រាបដោយបានធ្វើឡើង កាលពីវេលាម៉ោង៣រសៀល ថ្ងៃទី៦ ធ្នូ ២០២០ នៅឃុំអូរម្លូ…
ខេត្តកំពង់ចាម ៖ សង្វៀនបើកបញ្ជល់មាន់ និងវង់អាប៉ោងលេងលួចលាក់ដែលខុសច្បាប់មួយកន្លែងនៅក្នុងចម្ការស្វាយចន្ទី ត្រូវបានកម្លាំងសមត្ថកិច្ចព្រហ្មទណ្ឌកម្រិតស្រាលខេត្តឆ្មក់បង្ក្រាបដោយបានធ្វើឡើង កាលពីវេលាម៉ោង៣រសៀល ថ្ងៃទី៦ ធ្នូ ២០២០ នៅឃុំអូរម្លូ ស្រុកស្ទឹងត្រង់ ។
ដោយឃាត់ខ្លួនអ្នកញៀនល្បែងមាន់បានចំនួន៣នាក់ រួមនឹងវត្ថុតាងមួយចំនួនត្រូវបានដកហូតផងដែរ ។
លោកឧត្តមសេនីយ៍ទោឯម កុសល ស្នងការនគរបាលខេត្តបានឲ្យដឹងថា បន្ទាប់ពីទទួលបានព័ត៌មានពីប្រជាពលរដ្ឋនៅចំណុចខាងលើមានបើកល្បែងបញ្ជល់មាន់លួចលាក់ហើយមនុស្សតែងតែពាក់ពពូននាំគ្នាទៅលេង ភ្លាមៗនោះរូបលោកបានបញ្ជាដល់កម្លាំងជំនាញរបស់ផែនការងារនគរបាលព្រហ្មទណ្ឌ សហការជាមួយកំលាំងរបស់អធិការដ្ឋាននគរបាលស្រុកស្ទឹងត្រង់ ដឹកនាំដោយនាយការិយាល័យនគរបាលព្រហ្មទណ្ឌកម្រិតស្រាលខេត្ត ដោយបានបើកកិច្ចប្រតិបត្តិការចុះបង្ក្រាបក្រោមការដឹកនាំសម្របសម្រួលបញ្ជាផ្ទាល់ពីលោកសុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តចាប់អ្នកលេងបានមួយចំនួន និងខ្លះទៀតបានរត់គេចខ្លួនមុនពេលកម្លាំងសមត្ថកិច្ចទៅដល់ ។
លោកស្នងការនគរបាលខេត្តបន្តថា ការចុះបង្ក្រាបករណីលួចលេងល្បែងស៊ីសងខុសច្បាប់នៅចំណុចដីចំការស្វាយចន្ទី ស្ថិតនៅភូមិសំរោង ឃុំអូរម្លូរ ស្រុកស្ទឹងត្រង់ ខេត្តកំពង់ចាម ជាលទ្ធផលយើងបង្ក្រាបចាប់ឃាត់ខ្លួនបានមុខសញ្ញាចំនួន០៣នាក់ គឺ ៖
១-ឈ្មោះ ហង់ នី ភេទប្រុស អាយុ៣៨ឆ្នាំ ជាតិខ្មែរ នៅភូមិគីឡូតិ៍១៣ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម
២-ឈ្មោះ ផន វណ្ណា ភេទប្រុស អាយុ៥៤ឆ្នាំ ជាតិខ្មែរ នៅភូមិជីក្រែង ឃុំបឹងល្វា ស្រុកសន្ទុក ខេត្តកំពង់ធំ
៣-ឈ្មោះ ហោ សេងហា ភេទប្រុស អាយុ៣៧ឆ្នាំ ជាតិខ្មែរ នៅភូមិអូរក្រញូង ឃុំបឹងល្វា ស្រុកសន្ទុក ខេត្តកំពង់ធំ ។
ដោយដកហូតវត្ថុតាងមួយចំនួនរួមមាន មាន់ជល់ងាប់ចំនួន០៤ក្បាល ជញ្ជីងថ្លឹងមាន់ចំនួន០១ ស៊ុក្រុងមាន់ចំនួន១០ ស្គុតរុំខ្នាយមាន់ចំនួន០៦ដុំ កន្ត្រកដាក់មាន់ចំនួន០៤ កន្ធន់ទ្រចានអាប៉ោងចំនួន០១ ផ្ទិលគ្របចានអាប៉ោងចំនួន០១ ក្រណាត់សង្វៀនមាន់ពណ៌ខ្មៅចំនួន០១ ម៉ូតូចំនួន០៨គ្រឿង (រក្សាទុកនៅប៉ុស្តិ៍នគរបាលរដ្ឋបាលអូរម្លូរ ស្រុកស្ទឹងត្រង់ ខេត្តកំពង់ចាម) ។
បច្ចុប្បន្នជនសង្ស័យរួមនឹងវត្ថុតាង ត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ចាម ដើម្បីសាកសួរ និងកសាងសំណុំរឿងតាមនីតិវិធី តាមបញ្ជារបស់លោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម ។
សមត្ថកិច្ចបានឲ្យដឹងទៀតថា ក្រោមការយកចិត្តទុកដាក់ពីសំណាក់លោកស្នងការនគរបាលខេត្តក៏ដូចជា ឯកឧត្តមអភិបាលខេត្ត ឲ្យមានវិធានការបង្ក្រាបបទល្មើសល្បែងស៊ីសងនៅកន្លែងផ្សេងទៀតដើម្បីពង្រឹងភូមិឃុំមានសុវត្ថិភាព៕
ចែករំលែកព័តមាននេះ