រាជធានីភ្នំពេញ៖ មន្ត្រីក្រសួងមហាផ្ទៃម្នាក់ទៀត ឈ្មោះ ជី ពេជ្រឆារ៉ា ត្រូវបានរកឃើញឆ្លងជំងឺកូវីដ១៩ ក្រោយពីមន្ត្រីរូបនេះ បានទៅហាងលក់សម្លៀកបំពាក់ Zando នៅបឹងកេងកង ក្នុងរាជធានីភ្នំពេញ…
រាជធានីភ្នំពេញ៖ មន្ត្រីក្រសួងមហាផ្ទៃម្នាក់ទៀត ឈ្មោះ ជី ពេជ្រឆារ៉ា ត្រូវបានរកឃើញឆ្លងជំងឺកូវីដ១៩ ក្រោយពីមន្ត្រីរូបនេះ បានទៅហាងលក់សម្លៀកបំពាក់ Zando នៅបឹងកេងកង ក្នុងរាជធានីភ្នំពេញ កាលពីថ្ងៃទី២៧ ខែវិច្ឆិកា ឆ្នាំ២០២០។ ការឆ្លងនេះ ស្ថិតក្នុងព្រឹត្តិការណ៍សហគមន៍ថ្ងៃ២៨វិច្ឆិកា។
មន្ត្រីក្រសួងមហាផ្ទៃរូបនេះ បានបន្តទៅធ្វើការនៅក្រសួងមហាផ្ទៃ រហូតដល់ថ្ងៃទី៣ ខែធ្នូ ទើបមានអាការៈមិនស្រួលខ្លួន ហើយបានធ្វើតេស្ត ក៏បានរកឃើញជំងឺកូវីដ១៩ នៅថ្ងៃទី៦ ខែធ្នូ ឆ្នាំ២០២០។ នេះបើតាមមន្ត្រីជាន់ខ្ពស់ក្រសួងមហាផ្ទៃ បានប្រកាសដំណឹងនេះ ជូនថ្នាក់ដឹកនាំក្រសួងមហាផ្ទៃ នៅយប់ថ្ងៃអាទិត្យនេះ។
មន្ត្រីជាន់ខ្ពស់ក្រសួងមហាផ្ទៃ ក៏បានប្រកាសឲ្យថ្នាក់ដឹកនាំ និងមន្ត្រីក្រសួងមហាផ្ទៃ ទៅធ្វើតេស្តនៅក្រសួងមហាផ្ទៃ ដោយចាប់ផ្តើមនៅម៉ោង ៨ព្រឹក ថ្ងៃចន្ទ ទី៧ ខែធ្នូ។
សូមរម្លឹកថា នៅព្រឹកថ្ងៃអាទិត្យ ទី៦ ខែធ្នូនេះ ក្រសួងសុខាភិបាល បានប្រកាសអំពាវនាវដល់អតិថិជនទាំងឡាយណា ដែលបានចូលទៅទិញសម្លៀកបំពាក់ នៅហាង Zando សាខាបឹងកេងកង នៅអំឡុងពេលចាប់ពីម៉ោង ១៩:៣០នាទីយប់ ដល់ពេលបិទហាង នាយប់ថ្ងៃទី២៧ ខែវិច្ឆិកា ឆ្នាំ២០២០ ត្រូវមកធ្វើតេស្តជាបន្ទាន់នៅវិទ្យាស្ថានជាតិសុខភាពសាធារណៈ ( រាល់ម៉ោងធ្វើការ ) ដើម្បីស្វែងរកវីរុសកូវីដ១៩ និងតម្រូវឲ្យធ្វើចត្តាឡីស័ក នៅផ្ទះ ឬនៅសណ្ឋាគារ ឬនៅតាមមណ្ឌលចត្តាឡីស័ក នៅតាមខេត្ត ឲ្យបានឲ្យគ្រប់ចំនួន ១៤ថ្ងៃ និងអនុវត្តន៍វិធានការការពារខ្លួន កុំឲ្យចម្លងទៅអ្នកដទៃ ឲ្យបានត្រឹមត្រូវជាទីបំផុត ហើយកុំដើរចេញក្រៅផ្ទះ ឬចេញពីមណ្ឌលចត្តាឡីស័ក ក្នុងអំឡុងធ្វើចត្តាឡីស័កនេះ ឲ្យសោះ ដើម្បីទប់ស្កាត់ការចម្លងវីរុសដ៏កាចសាហាវនេះ ពីម្នាក់ ទៅម្នាក់ និងកុំឲ្យមានការរាតត្បាតនៅក្នុងសហគមន៍។
ក្រសួងសុខាភិបាល ប្រកាសថា គិតពីថ្ងៃទី២៩វិច្ឆិកា មកដល់ថ្ងៃទី៥ ខែធ្នូ ក្រសួងសុខាភិបាល បានធ្វើតេស្តអ្នកប៉ះពាល់ក្នុងព្រឹត្តិការណ៍សហគមន៍២៨វិច្ឆិកា សរុបចំនួន ១០៧៧២នាក់។ ក្នុងចំនួននេះ មានអ្នកវិជ្ជមានវីរុសកូវីដ១៩ថ្មី យ៉ាងហោចណាស់ ៣០នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែ៕ មុត ស្រីពៅ
ចែករំលែកព័តមាននេះ