រាជធានីភ្នំពេញ ៖ សារសំឡេងរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ផ្ញើជូនបងប្អូនជនរួមជាតិ នាយប់ថ្ងៃទី០៤ ខែធ្នូ ឆ្នាំ ២០២០ អំពីស្ថានភាពជំងឺកូវីដ១៩ និងការណែនាំដល់ប្រជាពលរដ្ឋ និងមន្ត្រីរាជការដែលជាប់ពាក់ព័ន្ធ ដើម្បីទប់ស្កាត់នឹងបង្កាកុំអោយរីករាលដាលឆ្លងចូលសហគមន៍កាន់តែខ្លាំងឡើង ។
សម្តេចតេជោ ហ៊ុន សែន នាយករដ្ឋមន្ត្រី បានសម្រេចឲ្យបង្ហាញអត្តសញ្ញាណអ្នកជំងឺកូដ-១៩ បន្ទាប់ពីទទួលបានលទ្ធផលតេស្តកូវីដ-១៩ វិជ្ជមាន ភ្លាម តាមបណ្តាញផ្សព្វផ្សាយផ្លូវការរបស់ក្រសួងសុខាភិបាល ដើម្បីងាយស្រួលក្នុងការស្វែងរកអ្នកពាក់ព័ន្ធឲ្យបានឆាប់រហ័ស ដើម្បីបង្កលក្ខណៈឲ្យអ្នកមានការពាក់ព័ន្ធនឹងអ្នកជំងឺកូវីដ-១៩ ចេញមុខទាក់ទងមកក្រសួងសុខាភិបាល ឬអាជ្ញាធរពាក់ព័ន្ធ ។
សម្តេចតេជោ ក៏បានបញ្ជាក់ថា ត្រូវអនុវត្តវិធានការចត្តាឡីស័ករយៈពេល១៤ថ្ងៃ ពេញលេញ ចំពោះគ្រប់អ្នកដំណើរទាំងអស់ ដែលចូលមកព្រះរាជាណាចក្រកម្ពុជា ក្រោយពីបានធ្វើតេស្តពេលមកដល់កម្ពុជា ។
អ្នកដំណើរទាំងនោះ ក៏ត្រូវមានវិញ្ញាបនបត្របញ្ជាក់សុខភាព ចេញដោយអាជ្ញាធរសុខាភិបាលទទួលស្គាល់ដោយប្រទេសសាមី ដែលបញ្ជាក់ថា គ្មានកូវីដ-១៩ មានសុពលភាពរយៈពេល ៧២ម៉ោង មុនពេលចេញដំណើរ ។
សម្រេចតេជោ ហ៊ុន សែន ក៏បានសម្រេចផ្អាកជាបណ្តោះអាសន្ន នូវការអនុវត្តយន្តការធានា ចំពោះអ្នកដំណើរបរទេសជាវិនិយោគិន-ធុរជន បុគ្គលិកក្រុមហ៊ុន អ្នកជំនាញការ និងអ្នកបច្ចេកទេស ដែលទទួលបានការធានា ចូលមកប្រទេសកម្ពុជារយៈពេលតិចជាង១៤ថ្ងៃ រហូតដល់ស្ថានភាព នៃការរីករាលដាលជំងឺកូវីដ-១៩ មានភាពធូរស្រាល និងទទួលបានការឯកភាពដ៏ខ្ពង់ខ្ពស់ជាថ្មីពីសម្តេច ។
សម្តេចតេជោ នាយករដ្ឋមន្ត្រី អំពាវនាវ ដោយទទូចចំពោះអ្នកជំងឺកូវីដ-១៩ ក្នុងព្រឹត្តិការណ៍សហគមន៍ ២៨វិច្ឆិកា ត្រូវផ្តល់ចម្លើយជាក់លាក់ថា ក្នុងរយៈពេលកន្លងទៅនេះ បានធ្វើអ្វីខ្លះ ទៅកន្លែងណាខ្លះ និងជួបអ្នកណាខ្លះ ។
សម្តេចតេជោ ថាបញ្ហានេះ ជារឿងសំខាន់ជាពន្លឺក្នុងការរុករកឬសគល់នៃការឆ្លងចូលក្នុងសហគមន៍កម្ពុជា និងក៏ដើម្បីទប់ស្កាត់ការរីករាលដាលកាន់តែខ្លាំងចូលក្នុងសហគមន៍ដែរ ។
ជាមួយនោះដែរ សម្តេចតេជោ ហ៊ុន សែន ក៏បានបញ្ជាឲ្យអាជ្ញាធរ និងកម្លាំងសមត្ថកិច្ច តាមដានឲ្យច្បាស់លាស់ និងម៉ឺងម៉ាត់បំផុត ចំពោះអ្នកធ្វើចត្តាឡីស័ក ។
សារសំឡេង សម្តេចតេជោ ហ៊ុន សែន មានដូចខាងក្រោម ៖
ចែករំលែកព័តមាននេះ