អ្នកឆ្លងកូវីដ ថ្ងៃ២៨វិច្ឆិកា មិនទាក់ទងនឹងព្រឹត្តិការណ៍៣វិច្ឆិកាទេ តែប្រភពចម្លង នៅតែមិនទាន់ដឹង!
- ភ្នំពេញ
ភ្នំពេញ៖ ក្រសួងសុខាភិបាល បានប្រកាសថា ប្រភពមេរោគ ដែលពាក់ព័ន្ធទៅនឹង «ព្រឹត្តិការណ៍សហគមន៍ ២៨វិច្ឆិកា» អាចជាក្រុមវីរុស Clad 19B…
ភ្នំពេញ៖ ក្រសួងសុខាភិបាល បានប្រកាសថា ប្រភពមេរោគ ដែលពាក់ព័ន្ធទៅនឹង «ព្រឹត្តិការណ៍សហគមន៍ ២៨វិច្ឆិកា» អាចជាក្រុមវីរុស Clad 19B ដែលអាចមកពីតំបន់អាស៊ី អាហ្វ្រិក និងអូស្ត្រាលី ដែលបានចរាចរណ៍ចូលមកកម្ពុជា ក្នុងអំឡុងពេលកាលពីខែតុលា ឆ្នាំ២០២០ មកទល់នឹងពេលមានផ្ទុះករណីឆ្លង នៅថ្ងៃទី២៨ ខែវិច្ឆិកា ឆ្នាំ២០២០។ ក្នុងនោះ តាមការពិចារណាដោយហ្មត់ចត់ បង្ហាញថា ការឆ្លងវីរុសកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា គឺមិនមានការទាក់ទងនឹងព្រឹត្តិការណ៍ ៣វិច្ឆិកា នោះទេ។
យ៉ាងណាក៏ដោយ ក្នុងសេចក្តីប្រកាសព័ត៌មាន នៅយប់ថ្ងៃទី៣ ខែធ្នូ ឆ្នាំ២០២០ ក្រសួងសុខាភិបាល មិនទាន់ដឹងពីប្រភពចម្លងវីរុសកូវីដ១៩ ក្នុងព្រឹត្តិការណ៍សហគមន៍ ២៨វិច្ឆិកា នៅឡើយទេ ដោយក្រុមការងារកំពុងស្រាវជ្រាវបន្ថែម។
សូមរម្លឹកថា ព្រឹត្តិការណ៍សហគមន៍២៨វិច្ឆិកា សំដៅលើករណីភរិយាអគ្គនាយកពន្ធនាគារ ត្រូវបានរកឃើញកើតជំងឺកូវីដ១៩ នៅថ្ងៃទី២៨ ខែវិច្ឆិកា ហើយឆ្លងរាលដាលដល់ក្រុមគ្រួសារ និងអ្នកប៉ះពាល់ សរុបមកដល់ថ្ងៃទី២ ខែធ្នូ ឆ្នាំ២០២០ អ្នកវិជ្ជមានវិរុសកូវីដ១៩ កើនឡើងដល់ ១៩នាក់ និងអ្នកដែលបានធ្វើតេស្តរកមេរោគកូវីដ មានចំនួន ៨៧៦៦នាក់។
រីឯព្រឹត្តិការណ៍៣វិច្ឆិកា សំដៅលើដំណើរទស្សនកិច្ចរបស់រដ្ឋមន្ត្រីការបរទេសហុងគ្រី កាលពីថ្ងៃទី៣វិច្ឆិកា ហើយពេលចាកចេញពីកម្ពុជា ទើបរកឃើញកើតជំងឺកូវីដ។ កាលណោះ មានអ្នកបានធ្វើតេស្ត រកមេរោគកូវីដ១៩ និងបានធ្វើចត្តាឡីស័ក រយៈពេល ១៤ថ្ងៃ ក្នុងព្រឹត្តិការណ៍៣វិច្ឆិកា សរុប ៣២២៤នាក់ នៅ ១១រាជធានីខេត្ត។ ក្នុងនោះ រកឃើញអ្នកឆ្លងជំងឺកូវីដ១៩ ចំនួន ៤នាក់។
គិតត្រឹមម៉ោង ៧ព្រឹក ថ្ងៃទី៣ ខែធ្នូ ឆ្នាំ២០២០ នៅទូទាំងប្រទេស រកឃើញអ្នកឆ្លងជំងឺកូវីដ១៩ សរុប ៣៣១នាក់។ ក្នុងនោះ ៣០៤នាក់ បានជាសះស្បើយ និង ២៧នាក់ កំពុងសម្រាកព្យាបាលនៅមន្ទីរពេទ្យរដ្ឋ៕
ចែករំលែកព័តមាននេះ