ព្រះរាជដំណាក់ខេត្តស្ទឹងត្រែង ត្រៀមអនុវត្តគម្រោង នាពេលខាងមុខ
ខេត្តស្ទឹងត្រែង ៖ លោក លី មីណា អភិបាលក្រុងស្ទឹងត្រែង បានបង្ហាញថា ក្រោមការដឹកនាំដ៏ឈ្លាសវៃរបស់លោក សរ សុពុត្រា…
ខេត្តស្ទឹងត្រែង ៖ លោក លី មីណា អភិបាលក្រុងស្ទឹងត្រែង បានបង្ហាញថា ក្រោមការដឹកនាំដ៏ឈ្លាសវៃរបស់លោក សរ សុពុត្រា អភិបាលខេត្តស្ទឹងត្រែង នៅថ្ងៃចន្ទ ទី៩ មីនា ២០២៦ ឯកឧត្តម ឆាំង យុ រដ្ឋមន្ត្រីអមខុទ្ទកាល័យព្រះមហាក្សត្រ នាយកមជ្ឍមណ្ឌលឯក
សារកម្ពុជា DC-Cam និងជានាយកវិទ្យាស្ថានស្លឹករឹត ចុះពិនិត្យទីតាំងព្រះរាជដំណាក់ចាស់ ត្រៀមអនុវត្តគម្រោង នាពេលខាងមុខ ។
ព្រះរាជតំណាក់ខេត្តស្ទឹងត្រែង គឺជាសំណង់ប្រវត្តិសាស្ត្រដ៏សំខាន់មួយ ដែលឆ្លុះបញ្ចាំងពីការយកចិត្តទុកដាក់របស់អង្គព្រះមហាក្សត្រខ្មែរ ចំពោះខេត្តភាគឦសាន នៃប្រទេសកម្ពុជា ។
ព្រះរាជតំណាក់នេះ មានទីតាំងស្ថិតកណ្តាលក្រុងស្ទឹងត្រែង ជាប់នឹងមាត់ទន្លេសេកុង ដែលជាកន្លែងមានខ្យល់អាកាសបរិសុទ្ធ និងមានទេសភាពស្រស់ត្រកាល។ ដែលត្រូវបានកសាងឡើង ដើម្បីទុកជាព្រះរាជស្នាក់នៅ សម្រាប់ព្រះមហាក្សត្រ និងព្រះរាជវង្សានុវង្ស ក្នុងអំឡុងពេលដែលទ្រង់យាងបំពេញព្រះរាជកិច្ច ឬចុះសាកសួរសុខទុក្ខប្រជារាស្ត្រនៅក្នុងខេត្តនេះ ។
ក្នុងសម័យ ព្រះករុណា ព្រះបាទសម្តេចព្រះ នរោត្តម សីហនុ (ព្រះបរមរតនកោដ្ឋ) ព្រះរាជតំណាក់នេះ មានសកម្មភាពខ្លាំងខ្លាបំផុត។ ព្រះអង្គតែងតែយាងមកកាន់ខេត្តស្ទឹងត្រែង ដើម្បីពិនិត្យមើលសមិទ្ធផលនានា ក្នុងការស្ថាបនាជាតិ។ ផ្សារភ្ជាប់ទំនាក់ទំនងផ្ទាល់ជាមួយប្រជានុវង្សនៅតំបន់ដាច់ស្រយាល។ ក្នុងសម័យកាលរបស់ព្រះបរមរតនកោដ្ឋ មិនមែនគ្រាន់តែជាខេត្តដាច់ស្រយាលនោះទេ ប៉ុន្តែជាតំបន់យុទ្ធសាស្ត្រ នៃការអភិវឌ្ឍន៍។ ព្រមទាំងការទទួលបដិសណ្ឋារកិច្ចកម្រិតខ្ពស់។ ព្រះអង្គតែងប្រើប្រាស់ព្រះរាជតំណាក់នេះ ដើម្បីទទួលស្វាគមន៍មហាមិត្តបរទេស ឬរដ្ឋបុរសសំខាន់ៗ ដែលយាងនិងអញ្ជើញមកទស្សនកិច្ចក្នុងតំបន់ឦសាន ដើម្បីបង្ហាញពីសន្តិសុខ និងការរីកចម្រើន នៃខេត្តតាមព្រំដែន។ ទន្ទឹមនោះ ព្រះអង្គតែងយាងចេញពីព្រះរាជតំណាក់ ដើម្បីជួបសំណេះសំណាលផ្ទាល់ជាមួយ កូនចៅ (ប្រជារាស្ត្រ) នៅទីធ្លាមុខតំណាក់ ឬសួនច្បារសាធារណៈ ដែលបង្កើតនូវភាពស្និទ្ធស្នាលបំផុតរវាងអង្គម្ចាស់ជីវិតតម្កល់លើត្បូង និងរាស្ត្រសាមញ្ញ។ ព្រះអង្គបានប្រើប្រាស់ទីនេះ ជាទីបញ្ជាការស្រាល ដើម្បីតាមដានការសាងសង់ហេដ្ឋារចនាសម្ព័ន្ធ ដូចជាមន្ទីរពេទ្យ សាលារៀន និងផ្លូវថ្នល់ជាដើម ។
សំណង់ព្រះរាជតំណាក់ខាងលើមានរចនាបថខ្មែរទំនើប សំណង់នេះឆ្លុះបញ្ចាំងពីឥទ្ធិពល នៃស្ថាបត្យកម្មក្នុងទសវត្សរ៍ឆ្នាំ៦០ ជាស្នាដៃគំនូសប្លង់ដោយស្ថាបត្យកម្មលោកវ៉ាន់ ម៉ូលីវ៉ាន់ (Vann Molyvann Era Style) ដែលផ្តល់អាទិភាពលើពន្លឺធម្មជាតិ និងប្រព័ន្ធខ្យល់ចេញចូល។ មានរានហាលធំទូលាយសម្រាប់ទទួលខ្យល់អាកាសពីមាត់ទន្លេ។ ទីធ្លាហ៊ុំព័ទ្ធ ទៅដោយសួនច្បារ និងដើមឈើធំៗ ដែលផ្តល់ភាពត្រជាក់ត្រជុំផងដែរ។
ក្រោយឆ្លងកាត់សម័យសង្គ្រាមស៊ីវិល ព្រះរាជតំណាក់នេះ ត្រូវបានខូចខាត ប៉ុន្តែត្រូវបានរាជរដ្ឋាភិបាល និងអាជ្ញាធរខេត្ត បច្ចុប្បន្ន ធ្វើការជួសជុល និងថែរក្សាយ៉ាងដិតដល់។ បច្ចុប្បន្ន ព្រះរាជតំណាក់នេះមិនត្រឹមតែជាកន្លែងសម្រាប់ទទួលព្រះមហាក្សត្រប៉ុណ្ណោះទេ ប៉ុន្តែក៏ជា និមិត្តរូប នៃអធិបតេយ្យភាព និងជាកេរដំណែលប្រវត្តិសាស្ត្រ ដែលបង្ហាញពីវត្តមានរបស់អង្គព្រះមហាក្សត្រខ្មែរនៅគ្រប់ទិសទីនៃមាតុភូមិ។
គេរំពឹងថា សំណង់ព្រះរាជតំណាក់ខាងលើ និងប្រែក្លាយមុខមាត់ថ្មី លើកស្ទួយវិស័យទេសចរណ៍ និងកេរ្តិ៍ដំណែលវប្បធម៌ប្រវត្តិសាស្ត្រសម្រាប់ខេត្តស្ទឹងត្រែងដ៏លេចធ្លោនាពេលបច្ចុប្បន្ន ៕
ចែករំលែកព័តមាននេះ