ខេត្តបន្ទាយមានជ័យ៖ បុរសម្នាក់ ធ្លាប់ជាប់ពន្ធនាគារ ០៥ឆ្នាំម្តងហើយ ពាក់ព័ន្ធគ្រឿងញៀន ពេលនេះ មិនរាងចាល ទើបតែចេញពីពន្ធនាគារបាន ៧ខែ ក៏ត្រូវ​​នគរ​បាល​ស្រាវ​ជ្រាវចាប់ខ្លួន និងវត្ថុតាងគ្រឿងញៀនទៀត។ នគរបាល បានរៀបចំសំណុំរឿង បញ្ជូនបុរសនោះ ទៅសាលាដំបូងខេត្ត កាលពីរសៀលថ្ងៃទី០១ ខែធ្នូ ឆ្នាំ២០២០។​

​លោក​វរសេនីយ៍ទោ ស្រី សុខុម នាយការិយាល័យ​នគរបាលប្រឆាំងគ្រឿងញៀន បានឲ្យដឹងថា​ នៅថ្ងៃទី៣០ខែវិច្ឆិកា ឆ្នាំ២០២០ វេលាម៉ោង ១១ និង ១៥ នាទី ព្រឹក កម្លាំងផែនការងារប្រឆាំងគ្រឿងញៀនបានចុះបង្រ្កាបករណីជួញដូរគ្រឿងញៀនខុសច្បាប់នៅចំណុចផ្ទះជនសង្ស័យ ជាប់របងវត្តសមាធិផល ស្ថិតនៅក្នុង​ភូមិ៤ សង្កាត់ព្រះពន្លា ក្រុងសិរីសោភ័ណ្ឌ។ ប្រតិបត្តិការនោះ ក្រុមការងារចម្រុះ បានឃាត់ខ្លួនជនសង្ស័យម្នាក់ ឈ្មោះ សាញ់ សុខា អាយុ ៥២ឆ្នាំ។ បុរសនេះ ជាមុខសញ្ញាចាស់ ធ្លាប់ជាប់ពន្ធនាគាររយៈពេល ០៥ ឆ្នាំ ពីបទជួញដូរគ្រឿងញៀនខុសច្បាប់។

ជាមួយនឹងការបង្រ្កាបនេះ ក្រុមការងារចម្រុះ ដឹកនាំផ្ទាល់ដោយ​លោកវរសេនីយ៍ឯក ធិន ស៊ិនដេត ស្នងការរង ផែនការងារប្រឆាំងគ្រឿងញៀន និងដោយមានការសម្រប​សម្រួលពីលោក លឹម ប៊ុនសុភ័ក្រ ព្រះរាជអាជ្ញារង អមសាលាដំបូង​ខេត្តបន្ទាយមានជ័យ បាន​ឆែកឆេរលំនៅដ្ឋានជនសង្ស័យ រុករកវត្ថុតាង ឃើញមានថ្នាំប្រភេទគ្រាប់ Wyចំនួន ៣២ គ្រាប់ ម្សៅក្រាមពណ៌សថ្លា ចំនួន ១៣ កូនថង់តូច បំពង់ជក់ ១ ដែកកេះ ៥ ដើម និងសំបកកូនថង់ផ្លាស្ទិកមួយចំនួន។

​​លោកនាយការិយាល័យ បានបញ្ជាក់ថា នៅចំពោះមុខសមត្ថកិច្ច ជនសង្ស័យបានសារភាពថា ​ពិតជាបានរក្សាទុកថ្នាំញៀនប្រភេទម៉ាកកក និងថ្នាំគ្រាប់ពណ៌ក្រហម ដែលទិញក្នុងតំលៃសរុបចំនួន២០ម៉ឺនរៀល។ ខ្លួនក៏ធ្លាប់ជាប់ពន្ធនាគាររយៈពេល ០៥ឆ្នាំ ពីបទជួញដូរគ្រឿងញៀន។ បន្ទាប់ពីចេញពីពន្ធនាគារ ខ្លួនតែងប្រើប្រាស់ថ្នាំញៀន ប្រភេទម៉ាទឹកក និងប្រភេទថ្នាំគ្រាប់ពណ៌ក្រហម ដោយប្រើ ២ដង ក្នុង ១ខែ ហើយថ្នាំញៀន ដែលខ្លួនប្រើប្រាស់ គឺទិញពីឈ្មោះ ហាប់ ភេទប្រុស អាយុប្រហែល ៣២ឆ្នាំ៕ ដោយ៖ ណុប រក្សា