រាជធានីភ្នំពេញ៖ ជនសង្ស័យម្នាក់ធ្លាប់ខ្ចីម៉ូតូមិត្តភក្ដិជិះ ហើយបែកគំនិតជាចោរក៏ឆ្លៀតចម្លងសោទុកជាប់ខ្លួន លុះដល់ពេលឱកាសហុចឲ្យ ឃើញម្ចាស់ទុកប័ណ្ណផ្ញើរម៉ូតូនៅក្រោមកែប រួចចូលទៅធ្វើការរោងចក្របាត់ ជននេះក៏យកសោដែលចម្លងទុកនោះទៅចាក់បើកកែបយកប័ណ្ណផ្ញើរម៉ូតូប្រគល់ឲ្យសន្តិសុខយាមរោងចក្រ រួចលួចយកម៉ូតូខាងលើជិះគេចខ្លួនទៅបាត់ដោយសុវត្ថិភាព ។ ប៉ុន្តែ២ថ្ងៃក្រោយមកត្រូវអស់លក្ខណ៍ ព្រោះតែកាមរ៉ាសុវត្ថិភាពដែលបំពាក់នៅកន្លែងកើតហេតុថតជាប់រូបនិងសកម្មភាពរបស់ជនសង្ស័យរូបនោះយ៉ាងច្បាស់ បន្ទាប់មកក៏ត្រូវកម្លាំងនគរបាលតាមឃាត់ខ្លួនបាន ព្រមទាំងដកហូតម៉ូតូប្រគល់ជូនជនរងគ្រោះវិញផងដែរ ។
ហេតុការណ៍ខាងលើនោះបានកើតឡើងកាលពីវេលាម៉ោង ១៨និង០០នាទីល្ងាចថ្ងៃទី២៣ ខែធ្នូ ឆ្នាំ២០២៥ នៅក្នុងរោងចក្រកាត់ដេរសម្លៀកបំពាក់យីហោ«ហ្វីតលី» ដែលមានទីតាំងស្ថិតនៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ឲ្យដឹងថា ជនសង្ស័យរូបនោះឈ្មោះផាន សិលា អាយុ២១ឆ្នាំ ជនជាតិខ្មែរ មុខរបរ កម្មកររោងចក្រកាត់ដេរសម្លៀកបំពាក់«ហ្វីតលី» ស្នាក់នៅបន្ទប់ជួលជាន់ទី២ ស្ថិតនៅក្នុងភូមិព្រៃព្រីងខាងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ (ឃាត់ខ្លួននៅថ្ងៃទី២៥ ខែធ្នូ ឆ្នាំ២០២៥ វេលាម៉ោង ២០និង៣០នាទីយប់) ។ ដោយឡែកបុរសរងគ្រោះឈ្មោះ ណាន មករា អាយុ២៧ឆ្នាំ ជនជាតិខ្មែរ មុខរបរ កម្មកររោងចក្រកាត់ដេរជាមួយគ្នា មានទីនៅអចិន្ត្រៃយ៍ភូមិសន្ទៃ ឃុំព្រែកពោធិ ស្រុកស្រីសន្ធរ ខេត្តកំពង់ចាម សព្វថ្ងៃស្នាក់នៅ បន្ទប់ជួល ស្ថិតនៅក្នុងភូមិកន្ទោកជើង សង្កាត់កន្ទោក ខណ្ឌកំបូល ។ ចំណែកម៉ូតូដែលត្រូវជនសង្ស័យលួចនោះម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ ២០២៦ លេខតួ+លេខម៉ាស៊ីន ០៣៩៣៧៨២ ពាក់ស្លាកលេខ ភ្នំពេញ 1MB-6425 ។
នគរបាលដដែលបានប្រាប់បន្តថា ជនសង្ស័យនិងជនរងគ្រោះនោះគឺជាមិត្តភក្ដិនិងគ្នា កន្លងមកជនសង្ស័យធ្លាប់បានខ្ចីម៉ូតូជនរងគ្រោះជិះ ហើយដោយសារតែជាមិត្តភក្ដិជនរងគ្រោះបានឲ្យខ្ចីជិះ ពេលនោះជនសង្ស័យបែកគំនិតធ្វើចោរ ក៏បានលួចចម្លងសោទុកជាប់ខ្លួន ។ រហូតដល់ថ្ងៃកើតហេតុជនរងគ្រោះបានជិះម៉ូតូរបស់ខ្លួនទៅធ្វើការរោងចក្រកាត់ដេរខាងលើ លុះពេលទៅដល់រោងចក្រសន្តិសុខបានប្រគល់ប័ណ្ណផ្ញើរម៉ូតូចំនួន២ សន្លឹកឲ្យទៅជនរងគ្រោះ បន្ទាប់មកជនរងគ្រោះអត់បានទុកប័ណ្ណផ្ញើរម៉ូតូជាប់ខ្លួននោះទេ បែរជាទុកនៅក្រោមកែបម៉ូតូទៅវិញ រួចក៏ចូលទៅធ្វើការធម្មតា ។
នគរបាលខាងលើប្រាប់បន្ថែមទៀតថា ដោយឡែកជនសង្ស័យបានតាមមើលសកម្មភាពជនរងគ្រោះមិនាក់ភ្នែក ហើយបានដឹងនិងបានឃើញថាជនរងគ្រោះទុកប័ណ្ណផ្ញើរម៉ូតូនៅក្រោមកែបម៉ូតូបែបនេះ ជននោះអត់ចូលធ្វើការឡើយ ហើយពេលជនរងគ្រោះចូលទៅក្នុងអគាររោងចក្របាត់ ជនសង្ស័យក៏បានយកសោដែលចម្លងទុកជាប់ខ្លួនរហូតមកចាក់បើកកែបម៉ូតូយកប័ណ្ណផ្ញើរម៉ូតូនោះប្រគល់ឲ្យសន្តិសុខរួចលួចយលម៉ូតូខាងលើជិះគេចខ្លួនបាត់ដោយសុវត្ថិភាព ។ ខណៈនោះសន្តិសុខមិនបានដឹងថាជនសង្ស័យជាចោរនោះទេ ព្រោះតែមានប័ណ្ណផ្ញើរម៉ូតូត្រឹមត្រូវ លុះដល់វេលាម៉ោងចេញពីធ្វើការ ជនរងគ្រោះបានដើរទៅរកម៉ូតូដើម្បីជិះត្រលប់ទៅផ្ទះវិញ ស្រាប់តែបាត់មិនឃើញម៉ូតូ ក៏បានទៅរាយការណ៏ប្រាប់ដល់កម្លាំងនគរបាលប៉ុស្តិ៍ចោមចៅទី៣ឲ្យជួយអន្តរាគមន៍តែម្តង ។
នគរបាលបានបញ្ជាក់ថា ក្រោយពេលទទួលបានដំណឹងនេះនគរគរបាលប៉ុស្តិ៍ចោមចៅទី៣ បានទទួលពាក្យបណ្ដឹង និងធ្វើការស្រាវជ្រាវភ្លាមៗ ហើយរហូតដល់វេលាម៉ោង១៥និង ៣០នាទីរសៀល ថ្ងៃទី២៥ ខែធ្នូ ជនរងគ្រោះបានសហការជាមួយកម្លាំងនគរបាលប៉ុស្តិ៍ខាងលើឆែកមើលកាមេរ៉ាសុវត្ថិភាពដែលបំពាក់នៅកន្លែងកើតហេតុ ។ ពេលនោះទើបដឹងថា ម៉ូតូនោះត្រូវជនសង្ស័យជាអ្នកលួច បន្ទាប់មកនៅវេលាម៉ោង ២០និង៣០នាទីយប់ថ្ងៃ ខែ ឆ្នាំដដែល កម្លាំងនគរបាលឈានដល់ការចាប់ឃាត់ខ្លួនជនសង្ស័យ និងដកហូតម៉ូតូដែលលួចបាននោះនៅតាមផ្លូវបេតុង មុខបន្ទប់ជួល ស្ថិតនៅភូមិព្រៃព្រីងខាងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ បន្ទាប់មកទៀតបាននាំយកជននេះទៅកន់ប៉ុស្តិ៍នគរបាលរដ្ឋបាលចោមចៅទី៣ដើម្បីធ្វើការសាកសួរនិងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ