ខេត្តបាត់ដំបង ៖ អ្នកភូមិនានានៅក្នុងស្រុកបាណន់ដែលនិយមដើររើសខ្យងលក់ មិនថា រដូវប្រាំង ឬរដូវវស្សា បានអះអាងថា ក្នុងរយៈពេលនេះ អ្នកភូមិបានដើររើសខ្យងតាមស្រែ និងតាមបឹង…
ខេត្តបាត់ដំបង ៖ អ្នកភូមិនានានៅក្នុងស្រុកបាណន់ដែលនិយមដើររើសខ្យងលក់ មិនថា រដូវប្រាំង ឬរដូវវស្សា បានអះអាងថា ក្នុងរយៈពេលនេះ អ្នកភូមិបានដើររើសខ្យងតាមស្រែ និងតាមបឹង មួយថ្ងៃៗរកបានរាប់រយគីឡូក្រាម តែទីផ្សារខ្យងហាក់ធ្លាក់ថ្លៃបន្តិច ព្រោះមិនសូវមានឈ្មួញដើររកទិញ។
គេសង្កេតឃើញប្រជាកសិករដែលនិយមដើររើសខ្យងលក់ភាគច្រើននៅក្នុងឃុំតាគ្រាម និងឃុំស្នឹង ស្រុកបាណន់ ។ ជាពិសេស ប្រជាពលរដ្ឋដែលរស់នៅក្បែរតំបន់អាងកំពីងពួយតែម្ដង។ ប៉ុន្តែអ្នកភូមិបានអះអាងថា នៅក្នុងរដូវវស្សារបែបនេះ នៅក្នុងអាងកំពីងពួយ រកខ្យងមិនសូវបានទេ ព្រោះទឹកជ្រៅ តែគេរកបានច្រើននៅតាមវាសស្រែ ឬ តាមបឹងតូចៗដែលមានទឹករាក់។ រីឯពេលវេលា ដែលចេញដើររកខ្យងបានច្រើនបំផុត គឺនៅពេលយប់ដោយប្រើភ្លើងពិលឆ្លុះ។
អ្នកភូមិតាង៉ែន ឃុំតាគ្រាម ដែលនិយមដើររកខ្យងនេះច្រើនជាងគេបាននិយាយថា នេះជារដូវដែលសំបូរខ្យងបំផុត ដែលអ្នកភូមិម្នាក់ៗដើររើសបានរាប់រយគីឡូក្រាមក្នុងមួយថ្ងៃៗ តែតំលៃធ្លាក់ទាបជាងឆ្នាំមុនៗ ។ អ្នកស្រី រៀន អិត អាយុ៤៦ឆ្នាំ រស់នៅភូមិតាង៉ែន នៅលើទំនប់អាងកំពីងពួយ បាននិយាយថា កូនៗរបស់គាត់ជាអ្នកដើររកខ្យងនេះ។ ក្នុងមួយថ្ងៃអាចរកបានប្រហែលជាង១០០គីឡូក្រាម ហើយពេលស្ងោររួច ឆ្កឹះយកសាច់បានប្រហែលជាង១០គីឡូក្រាម។ គាត់បានប្រាប់ថា អ្នកភូមិតាង៉ែន ភាគច្រើនដើររកត្រី និង រើសខ្យងលក់ ក្រៅពីធ្វើស្រែបន្តិចបន្ទូច គ្រាន់បានកំរ៉ៃខ្លះចិញ្ចឹមជីវភាពគ្រួសារ។
ដោយឡែក អ្នកភូមិម្នាក់ទៀតបាននិយាយថា គាត់គ្មានអ្នកដើររើសខ្យងទេ តែគាត់បានទិញបន្តពីក្មេងៗនៅក្នុងភូមិដែលរកបាន រួចយកមកស្ងោរឆ្កឹះយកសាច់លក់បន្ត។ ស្ត្រីរូបនេះបានបញ្ជាក់ថា គាត់ទិញខ្យងឆៅទាំងសំបកពីក្មេងៗក្នុងតំលៃ៣៥,០០០រៀល ក្នុង១០០គីឡូក្រាម រួចយកទៅស្ងោរឆ្អិនឆ្កឹះបានសាច់ប្រហែល១០គីឡូប៉ុណ្ណោះ ហើយលក់ឲ្យឈ្មួញក្នុង១គីឡូបានតំលៃ៥៥,០០រៀល (ខ្យងសាច់)។ ដូច្នេះក្នុង១០០គីឡូទាំងសំបក គាត់ចំណេញបានចន្លោះពី១៥,០០០រៀលទៅ២០,០០០រៀលដែរ។
ដោយឡែក អ្នកជំនាញដើររើសខ្យងម្នាក់ គឺយុវជន ហ៊ុំ ជីវ៉ាត់ អាយុ១៧ឆ្នាំ ជាអ្នកភូមិតាង៉ែន ដែរបានប្រាប់កោះសន្តិភាពថា អ្នកដើររកខ្យងភាគច្រើន គឺចេញរកនៅពេលយប់ដោយប្រើភ្លើងពិលឆ្លុះ។ ជីវ៉ាត់ បានប្រាប់ពីមូលហេតុដែលគេនិយមដើររកខ្យងនៅពេលយប់ យ៉ាងដូច្នេះថា «ខ្ញុំនិងបងប្រុសខ្ញុំ តែងចេញដើររកខ្យងនៅពេលយប់ ព្រោះពេលថ្ងៃរកខ្យងមិនឃើញទេវាលិចនៅបាតទឹក លុះពេលយប់ខ្យងវាអណ្ដែតឡើងតោងដើរឈើឬដើមស្រូវ»។ យុវជនរូបនេះ បានបញ្ជាក់ថា ខ្លួននិងបងប្រុសតែងចេញរកខ្យងនៅម៉ោង១២យប់ រហូតទៀបភ្លឺទើបត្រឡប់មកផ្ទះវិញ ហើយអាចរកខ្យងបានប្រហែលជាង២០០គីឡូក្រាម។
ពេលព្រឹកព្រលឹម គេឃើញអ្នកភូមិតាង៉ែន ដែលរស់នៅលើទំនប់អាងកំពីងពួយ ស្ទើរគ្រប់គ្រួសារ កំពុងស្ងោរខ្យង និង ខ្លះទៀតកំពុងនាំគ្នាអង្គុយឆ្កឹះខ្យង ដែលជាមុខរបរមួយអាចរកចំណូលបានគួរសម បើទោះជាទីផ្សារខ្យងនេះមិនស្ថិតស្ថេរក្ដី។ បើតាមអ្នកភូមិបានប្រាប់ថា ខ្យងដែលអ្នកភូមិដើររើសយកមកស្ងោរលក់នេះ គេនិយមហៅ«ខ្យងជប៉ុន ឬ ខ្យងក្រហម» ។
ពូជខ្យងនេះ ហាក់កំពុងកើតមានស្ទើរគ្រប់ទីកន្លែង ក្នុងរយៈពេលជិត១០ឆ្នាំកន្លងទៅនេះ មិនថា នៅតាមបឹងឬនៅតាមស្រែនោះទេ។ ហើយពូជន៏ខ្យងនេះក៏ជាមុខសញ្ញាបំផ្លាញដំណាំកសិកម្មដ៏ខ្លាំងក្លាណាស់ដែរ។ ប៉ុន្តែទើបតែរយៈពេល២ឆ្នាំចុងក្រោយនេះទេ ដែលមានឈ្មួញចុះរកទិញខ្យងនេះ ដើម្បីនាំចេញទៅប្រទេសថៃ តែឈ្មួញរកទិញតែខ្យងឆ្អិនស្រាប់ ឆ្កឹះយកតែសាច់ប៉ុណ្ណោះ។
កាលពីឆ្នាំដំបូងដែលឈ្មួញចាប់ផ្ដើមចុះទិញ ខ្យងនេះលក់បានតំលៃជាង១០,០០០រៀល ក្នុងមួយគីឡូ ក្រាម (ខ្យងសាច់) តែក្រោយមកក៏ធ្លាក់ថ្លៃមកនៅក្រោម១០,០០០រៀល ហើយបន្តធ្លាក់ថ្លៃរហូតមកដល់ពេលនេះ ត្រិម៥៥,០០រៀលប៉ុណ្ណោះ ក្នុងមួយគីឡូ។ ពោល ខ្យងនេះចាប់ផ្ដើមធ្លាក់ថ្លៃ តាំងអំឡុងផ្ទុះជំងឺកូវីដ១៩ រហូតមក។
អ្នករើសខ្យងលក់ បាននិយាយថា សព្វថ្ងៃនេះខ្យងសំបូរណាស់ តែតំលៃទាប ។ ម្យ៉ាងទៀតដោយសារមិនសូវមានឈ្មួញចុះទិញផង ហើយខ្យងក៏សំបូរទៀត ទើបធ្វើឲ្យតំលៃខ្យងចុះថោកបែបនេះ តែគេរំពឹងថា វានឹងឡើងថ្លៃវិញ នៅពេលខ្យងខ្សត់ពីបឹងឬអស់ពីតាមស្រែ៕
ចែករំលែកព័តមាននេះ