មណ្ឌលគិរី៖ បន្ទាប់ពីបានចូលនិវត្តន៍បានជិតមួយឆ្នាំ សំបូរជាឈ្មោះរបស់សត្វដំរីញីមួយក្បាល ដែលបានសាងកេរ្តិ៍ឈ្មោះល្បីល្បាញនៅរាជធានីភ្នំពេញ បច្ចុប្បន្នកំពុងតែរស់នៅយ៉ាងសុខសាន្តជាមួយសត្វដំរីដទៃ
មណ្ឌលគិរី៖ បន្ទាប់ពីបានចូលនិវត្តន៍បានជិតមួយឆ្នាំ សំបូរជាឈ្មោះរបស់សត្វដំរីញីមួយក្បាល ដែលបានសាងកេរ្តិ៍ឈ្មោះល្បីល្បាញនៅរាជធានីភ្នំពេញ បច្ចុប្បន្នកំពុងតែរស់នៅយ៉ាងសុខសាន្តជាមួយសត្វដំរីដទៃទៀតនៅជ្រលងភ្នំដំរី ស្ថិតក្នុងតំបន់ព្រៃការពារអភិរក្សជីវចម្រុះសីមា មានទីតាំងនៅភូមិពូត្រំ សង្កាត់រមនា ក្រុងសែនមនោរម្យ ក្រោមការថែទាំយ៉ាងយកចិត្តទុកដាក់ពីសំណាក់អង្គការថែទាំសត្វដំរី ហៅកាត់ថា ELIE និងខណ្ឌរដ្ឋបាលព្រៃឈើមណ្ឌលគិរី ។
លោកឃុន ឌីយ៉ូន នាយកអង្គការថែទាំសត្វដំរីបានឲ្យដឹងថា សត្វដំរីសំបូរបច្ចុប្បន្នមានអាយុ៥៧ឆ្នាំហើយ ដោយសត្វដំរីមួយក្បាលនេះ កាលពីពេលនាំយកមកដល់ក្នុងព្រៃដំបូងកាលពីចុងឆ្នាំ២០១៤ សង្កេតឃើញថា ហាក់មិនសូវចូលចិត្តជាមួយនឹងទេសភាពធម្មជាតិក្នុងព្រៃភ្នំនោះទេ ព្រោះតែគេធ្លាប់រស់នៅតែទីក្រុង ប៉ុន្តែមកដល់ពេលនេះសំបូរបានទម្លាប់ចំពោះការរស់នៅក្នុងព្រៃហើយ ថែមទាំងមានមិត្តភក្តិជាមួយសត្វដំរី៨ក្បាលផ្សេងទៀត ដែលរស់នៅក្នុងព្រៃជាមួយគេដែរ ។
លោកនាយកអង្គការថែទាំសត្វដំរីបានឲ្យដឹងទៀតថា សត្វដំរីសំបូរគឺមានរបួសត្រង់ជើងមុខខាងស្ដាំតាំងពីមុនសបូរចូលនិវត្តន៍ម្ល៉េះ ដោយរបួសនេះធ្វើឲ្យសំបូរមិនអាចដើរបានឆ្ងាយនោះទេ តែដោយមានការយកចិត្តទុកដាក់ក្នុងការព្យាបាលពីគ្រូពេទ្យ និងបានឲ្យហ្មដំរីម្នាក់ចាំថែទាំសំបូរគ្រប់ពេល ហើយឥឡូវនេះគេបានធូរស្បើយច្រើនហើយ ព្រមទាំងអាចដើររកចំណីឆ្ងាយៗខុសប្លែកកាលពីដំរីមួយក្បាលនេះមកដល់ព្រៃខេត្តមណ្ឌលគិរីដំបូង គឺទាមទារឲ្យហ្មដំរីដើររកចំណីមកឲ្យស៊ី ព្រោះគេមិនអាចដើរបាន ។
បច្ចុប្បន្ន សំបូរនៅតែអាចទាក់ទាញភ្ញៀវទេសចរបរទេសបានយ៉ាងច្រើនផងដែរ ប៉ុន្តែមិនមែនក្នុងរូបភាពឲ្យភ្ញៀវជិះទៀតទេ គឺភ្ញៀវទេសចរគ្រាន់តែអាចទស្សនាការរស់នៅក្នុងព្រៃរបស់ដំរីសបូរ និងសត្វដំរីដ៏ទៃទៀតតែប៉ុណ្ណោះ ។
លោក ឃុន ឌីយ៉ូន បានថ្លែងបញ្ជាក់ឲដឹងថា ដំរីសំបូរ និងដំរី៨ក្បាលផ្សេងទៀតនាពេលបច្ចុប្បន្ន ក៏បានរួមចំណែកជួយដល់សង្គមជាតិយើងមួយចំណែកដែរ ព្រោះចំណូលថវិកាដែលបានមកពីភ្ញៀវទេសចរក្នុងការទស្សនាដំរីសបូរ រួមទាំងដំរីដ៏ទៃទៀតនោះ គឺបានជួយផ្ដល់អាហារូបករណ៍ដល់សិស្សានុសិស្សក្រីក្រ និងបានផ្ដល់ការថែទាំសុខភាពដល់ប្រជាពលរដ្ឋ៣ភូមិក្នុងក្រុងសែនមនោរម្យ រួមមានភូមិពូលុង ភូមិពូតាំង និងភូមិពូត្រុំ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ