រាជធានីភ្នំពេញ ៖ ករណីអ្នកសង្ស័យពុលដោយសារថ្នាំបាញ់នៅចំការឪឡឹកនៅខេត្តកំពង់ឆ្នាំង លោកជំទាវវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល បានជម្រាបជូននៅម៉ោង៨និង៣៨នាទីយប់ថ្ងៃទី២៧ វិច្ឆិកា ២០២០នេះ អោយដឹងថា តាមរបាយការណ៍ ស្តីពីករណីសង្ស័យពុលទឹក ដែលមានសារធាតុគីមីពុល នៅភូមិជីប្រ៉ង ឃុំជៀប ស្រុកទឹកផុស ខេត្តកំពង់ឆ្នាំង សរុបជនរងគ្រោះចំនួន១៣នាក់ ស្រី៨នាក់ និងប្រុស៥នាក់ ដែលមានអាយុពី៤ឆ្នាំ ដល់៥៣ឆ្នាំ ដោយមានស្លាប់ចំនួន ២នាក់ ស្រីទាំងពីរនាក់ និងអ្នកសម្រាកនៅសង្គ្រោះបន្ទាន់មន្ទីរពេទ្យខេត្តកំពង់ឆ្នាំង មានចំនួន១០នាក់ ក្នុងនោះមានបុរសម្នាក់ មានសភាពធ្ងន់ ។
តាមរបាយការណ៍ពីមន្ទីរសុខាភិបាលខេត្តកំពង់ឆ្នាំង ក៏បានរាយការណ៍ដែរថា តាមការសាកសួរ អ្នកភូមិជីប្រ៉ង ទាំងចាស់ និងក្មេង បានទៅច្រូតស្រូវនៅព្រៃអូរគគីរ ឃុំជៀប ចាប់ពីថ្ងៃទី២៣ ខែវិច្ឆិកា ឆ្នាំ២០២០ រហូតដល់ថ្ងៃ២៥ ខែវិច្ឆិកា ឆ្នាំ២០២០ ។ នាពេលព្រឹកថ្ងៃទី២៤ ម៉ោងប្រហែល១១ថ្ងៃត្រង់ ពួកគាត់បានអស់ទឹកសម្រាប់បរិភោគ ក៏បានទៅដងទឹកអណ្តូង ដែលគេជីក នៅតាមវាលស្រែ យកទឹកសម្រាប់ប្រើប្រាស់ និងយកមកចែកគ្នាបរិភោគ ពេលបាយថ្ងៃត្រង់ (សូមបញ្ជាក់ថា ពេលព្រឹកនោះ មានគេឃើញកសិករ ដាំឪឡឹកក្បែរនោះ បានយកធុងថ្នាំលាយ និងលាងធុងថ្នាំនៅទីនោះ មុននិងក្រោយបាញ់ថ្នាំឪឡឹកគាត់) ។
ក្រោយពីពិសារទឹកនោះ បន្តិចមក មានស្ត្រីម្នាក់ ចេញសញ្ញាក្អួតចង្អោរ តែមិនមានអ្នកចាប់អារម្មណ៍ថា ពុលថ្នាំ ស្មានថា ខ្យល់ចាប់ និងជាបន្តបន្ទាប់មានអ្នកអស់កម្លាំង ឈឺក្បាល ទន់ដៃជើង ពិបាកដកដង្ហើម និងមានរហូតដល់ស្លាប់ ២នាក់ ហើយអ្នកធ្ងន់ម្នាក់ បញ្ជូនទៅសម្រាកព្យាបាល នៅមន្ទីរពេទ្យខេត្តកំពង់ឆ្នាំង និងតាមដានជាបន្ត១០នាក់ផ្សេងទៀត នៅថ្ងៃនោះ ភ្លាមៗ ។
បច្ចប្បន្ន ស្ថាបភាពអ្នកពុលទាំង១០នាក់ មានសភាពបានធូរស្រាលបានចេញត្រឡប់ ទៅផ្ទះសម្បែងរៀងៗខ្លួន នៅថ្ងៃទី២៧ នេះរួចហើយ តែស្ត្រីម្នាក់អាយ៥៣ឆ្នាំ ក៏បានធូរស្បើយពីការពុលនេះហើយ តែត្រូវនៅបន្តព្យាបាលដោយសារគាត់មានជំងឺសួត ដែលក្រុមគ្រូពេទ្យបានពិនិត្យឃើញ ។
គួរជម្រាបដែរថា ២នាក់បាត់បង់ជីវិត និង១០នាក់កំពុងសង្គ្រោះ ក្រោយផឹកទឹកក្នុងស្រែ ៕
ចែករំលែកព័តមាននេះ