រាជធានីភ្នំពេញ ៖ យោងតាមការលើកឡើងរបស់ អ្នកជំនាញម្នាក់បាននិយាយថា តាមការពិតមូលដ្ឋានគ្រឹះនៃការងារ វាដូចជាមូលដ្ឋានគ្រឹះនៃអាជីវកម្មផងដែរ នៅក្នុងនោះលោកបានលើកយកមូលដ្ឋានគ្រឹះសំខាន់ៗ ៣ មកបកស្រាយ ដែលមូលដ្ឋានគ្រឹះនេះគឺអាចកសាងជាជណ្តើរដ៏មាំសម្រាប់ការឈានទៅរកភាពជោគជ័យក្នុងអាជីពការងាររបស់យើង ។
លោក ប៉ិច បូឡែន ជាអគ្គនាយកក្រុមហ៊ុន Westline Education Group Co.,Ltd បានប្រាប់ឲ្យដឹងនូវមូលដ្ឋានគ្រឹះទាំង ៣ ថា «មនុស្សម្នាក់ៗគួរមានមូលដ្ឋានទាំងនេះ ជាពិសេសយុវវ័យ ឬអ្នកកំពុងបំរើការងារក្នុងកន្លែងណាមួយ ដែលកំពុងកសាងជណ្តើរការងាររបស់ខ្លួន»។
លោក ប៉ិច បូឡែន បានលើកយកមូលដ្ឋានគ្រឹះទាំង ៣ ដែលយើងគួរធ្វើការពិចារណាដើម្បីអនុវត្តព្រោះវាអាចជាជណ្តើរសម្រាប់យើងគ្រប់គ្នាឡើងទៅគោលដៅជោគជ័យ ដែលក្នុងនោះមូលដ្ឋានគ្រឹះទាំង ៣ មានដូចនេះថា ៖១) ផ្នត់គំនិត ៖ ទាក់ទងនឹងការគិតនេះ មនុស្សភាគច្រើន មិនបានសំឡឹងឱ្យឃើញឆ្ងាយនោះទេ ទិដ្ឋភាពតែមួយប៉ុន្តែយើងក្រឡែកឃើញខុសគ្នា ការគិតខុសគ្នា និងការបកស្រាយខុសគ្នាផងដែរ។ អ៉ីចឹងមានន័យថា ទិដ្ឋភាពដូចគ្នា ប៉ុន្តែម្នាក់គិតថាវានឹងលំបាក រីឯម្នាក់ទៀតគិតថាវាស្រួលទៅវិញ ដូចនេះរបៀបនៃការគិតនឹងសំខាន់ណាស់ ហើយប្រសិនបើយើងក្រឡែកទៅឃើញតែបញ្ហា និងផ្តេកផ្តួលនៅតែលំបាកចិត្តនឹង មិនអាចដើរទៅផ្លូវដែលវែងឆ្ងាយនោះទេ។ ដោយឡែកសម្រាប់អ្នកដែលគិតវិជ្ជមានវិញ គឺក្នុងស្ថានភាពដូចគ្នា ប៉ុន្តែគេបែរជាគិតឃើញឳកាសទៅវិញ។ តាមបទពិសោធន៍របស់ខ្ញុំ មនុស្សខ្លះមានបំណងចង់ចាប់យកអ្វីមួយ ឬបើកអាជីវកម្មណាមួយ ច្រើនតែមិនបានគិតវែងឆ្ងាយនោះទេ។
២) អត្តចរិត ៖ មនុស្សដែលមានអត្តចរិតរឹងមុំា ការចេះដាក់ខ្លួនរបស់មនុស្សណាម្នាក់ ឬក៏អាចពាក់ព័ន្ធទៅនឹងការដឹងគុណនរណាម្នាក់ ពាក់ព័ន្ធនឹងស្មារតីជាមួយនឹងការតស៊ូ មិនងាយបោះបង់ អត្តចរិតបែបនឹងដែលអ្នកខ្លះគេត្រូវការ វាជារឹសគល់មួយដែលអ្នកដទៃគេមើលមិនឃើញទេ ហើយពេលខ្លះវាបង្ហាញអត្តសញ្ញាណនរណាម្នាក់ ទាល់តែអ្នកនោះជិតស្និទ្ធម៉ង ទើបបានស្គាល់គាត់។ អញ្ចឹងឧទាហរណ៍ថា មានមិត្តភក្ត្រគាត់ជាអ្នកឧស្សាហ៍ព្យាយាមរៀនសូត្រ ចរិតដែលដាក់ខ្លួនដែលមិនគិតថាខ្លួនឯងចេះគ្រប់សពទាំងអស់ ចឹងវាជាចរិតដែលមានអ្នកចូលចិត្តច្រើន ដូចនេះយើងនឹងមានឳកាសច្រើនក្នុងការរៀនសូត្រពីគេ។
មួយវិញទៀតអត្តចរិតដែលមិនចូលចិត្តបៀតបៀនគេ តែក៏មិនបណ្តោយឱ្យគេមកបៀតបៀនខ្លួនឯងបានដែរ ដូចនេះរឿងទាំងអស់នឹងវាពាក់ព័ន្ធចរិកលក្ខណៈមួយ ដែលវាលើសពីអាកប្បកិរិយាខាងក្រៅ ព្រោះពេលខ្លះអាកប្បកិរិយាខាងក្រៅអាចមានការសំដែងឡើង ប៉ុន្តែអាកប្បកិរិយាខាងក្នុងដែលមុំាទុំា មានស្មារតីនៃការតស៊ូហើយពេលខ្លះជួបឧបសគ្គច្រើន អ្នកខ្លះដកថយ ប៉ុន្តែគាត់មិនដកថយនោះទេ គាត់នៅតែទៅមុខ គាត់នៅតែគ្រាញ់ននាល ចរិតដែលតាំងពីដើមរហូតដល់ចុងចញ្ចប់មិនរត់ចោលការងារ នេះជាប្រភេទមនុស្សដែលថៅកែមួយៗគេត្រូវការណាស់។
៣) គោលដៅ និងក្តីសុបិន្ត ៖ នៅពេលដែលគាត់មិនមានគោលដៅក្នុងការធ្វើការ អញ្ចឹងសកម្មភាពនៃការធ្វើរបស់គាត់ គាត់មិនសូវយកចិត្តទៅលើផែនការអនាគត គាត់មិនខ្វល់អ្វីដែលគាត់ធ្វើក្នុងបច្ចុប្បន្នកាល ហើយគាត់កាន់តែមិនរៀនសូត្រ ហើយគាត់ក៏មិនសោកស្តាយទៅនឹងអតីតកាលទេ។ ចំពោះអ្នកដែលមានបុព្វហេតុគោលដៅច្បាស់លាស់ ពួកគេនឹងមានសន្ទុះចិត្តមួយ អ្នកធ្វើការភាគច្រើនទៅមិនឆ្ងាយទេ ប្រសិនបើសទ្ធិផលការងាររបស់គាត់ច្រើនតែផ្សារភ្ជាប់ជាមួយនឹងការលើកទឹកចិត្តពីអ្នកដទៃ ប៉ុន្តែមនុស្សដែលឆ្នើមដែលពូកែ គេមិនរងចាំការលើកទឹកចិត្តពីអ្នកដទៃនោះទេ គេមានបុព្វហេតុសន្ទុះចិត្តមួយនឹង គេមានហេតុផល ថាហេតុអ្វីបានជាគេត្រូវធ្វើអានឹង ដូចនេះពេលខ្លះអ្នកដទៃមើលមិនឃើញទេ ប៉ុន្តែអ្នកនឹងមានគោលដៅច្បាស់លាស់មួយដើម្បីកេរ្តិ៍ឈ្មោះរបស់គាត់ ដើម្បីមហិច្ចតាសម្រេចគោលដៅនោះ។ ជាទូទៅមនុស្សដែលមានគោលដៅនឹងក្តីសុបិន្តវែងឆ្ងាយរបស់ខ្លួនឯង តែងតែមានកំលាំងចិត្តពីខាងក្នុង អានឹងបានហៅថាជាចរន្តឬជាកំលាំងចិត្តដ៏អស្ចារ្យ ប្រសិនជាអ្នកណាការគ្រាន់តែពឹងទៅលើតែស្នាមញញឺមឬពាក្យសម្តីដែលគេសរសើទេ វាបានយូរទេ៕
ចែករំលែកព័តមាននេះ