ខេត្តស្វាយរៀង ៖ លោកឧត្តមសេនីយ៍ទោកឹង ឃន ស្នងការនគរបាលខេត្តស្វាយរៀង បានសម្រេចដកបញ្ឈរជើងនគរបាលចរាចរណ៍ចំនួន៤នាក់ ដែលបានប្រើអំពើហិង្សាលើអ្នកបើកបររថយន្តល្មើសច្បាប់ចរាចរណ៍ ដែលករណីអំពើហិង្សារវាងមន្ត្រីនគរបាលចរាចរណ៍និងអ្នកបើកបររថយន្តល្មើសច្បាប់នេះបានកើតឡើងកាលពីព្រឹកថ្ងៃទី២២ ខែវិច្ឆិកា ឆ្នាំ២០២០ នៅចំណុចភូមិត្របែក ឃុំស្វាយជ្រុំ ស្រុកស្វាយជ្រុំ ខេត្តស្វាយរៀង ។
បើតាមអ្នកនាំពាក្យស្នងការដ្ឋាននគរបាលខេត្តស្វាយរៀង កាលពីថ្ងៃទី២៣ ខែវិច្ឆិកា កន្លងទៅនេះ បានឱ្យដឹងថា នគរបាលចរាចរណ៍បានដាក់គោលដៅត្រួតពិនិត្យល្បឿន លើផ្លូវជាតិលេខ១ចន្លោះគីឡូម៉ែត្រលេខ១១៦-១១៧ បានពិនិត្យឃើញរថយន្តមួយគ្រឿង ពាក់ផ្លាកលេខ ភ្នំពេញ 2BI-6754 បើកបរដោយឈ្មោះលាស់ពុធ ធា ភេទប្រុស អាយុ៣០ឆ្នាំ មុខរបរអ្នកបើកឡានតាក់ស៊ី ដោយប្រើប្រាស់ល្បឿន ៩៦គីឡូម៉ែត្រក្នុង១ម៉ោង។
យោងតាមសេចក្តីបំភ្លឺព័ត៌មានបានបញ្ជាក់ថា សមត្ថកិច្ចបានឃាត់រថយន្តនេះ ប៉ុន្តែអ្នកបើកបរបានបើករត់គេចចូលតាមផ្លូវលំ ទើបសមត្ថកិច្ចដេញតាមរួចអញ្ជើញអ្នកបើកបរ អោយមកប៉ុស្តិ៍រដ្ឋបាល តែអ្នកបើកបរមិនព្រមមកតាមសមត្ថកិច្ចទេ រហូតមានការប៉ះទង្គិចជាអំពើហិង្សាតែម្តង។
ក្រោយមកអ្នកបើកបរបានយល់ព្រមទទួលការផាកពិន័យតាមច្បាប់។ចំណែកសមត្ថកិច្ចបាន សុំទោសនិងសម្របសម្រួលគ្នាជាមួយអ្នកបើកបរ ក៏ប៉ុន្តែមានការបង្ហោះលើបណ្តាញសង្គមហ្វេសប៊ុកអំពីករណីនគបាលចរាចរណ៍ប្រើអំពើហិង្សាលើអ្នករត់តាក់ស៊ី ខណៈខំបើករថយន្តគេចពីការផាកពិន័យរបស់សមត្ថកិច្ច ហើយមិនព្រមទៅតាមការអញ្ជើញរបស់សមត្ថកិច្ចធ្វើឲ្យប៉ះទង្គិចពាក្យសំដីគ្នារហូតមានអំពើហិង្សា។
ទោះបីយ៉ាងណា បញ្ហានេះលោកឧត្តមសេនីយ៍ទោ កឹង ឃន ស្នងការនគរបាលខេត្តស្វាយរៀង បានសម្រេចដកបញ្ឈរជើងនគរបាលចរាចរណ៍៤នាក់ដើម្បីដាក់វិន័យតាមវិន័យរបស់កងកម្លាំងនគរបាលជាតិ៕ (កែសម្រួលដោយ ៖ ធីតា)
ចែករំលែកព័តមាននេះ