អ្នកចោលសំរាមតាមទីសាធារណៈក្នុងខេត្តព្រះសីហនុ ត្រូវផាកពិន័យពី២ម៉ឺនរៀល ទៅ៤០ម៉ឺនរៀល
ខេត្តព្រះសីហនុ ៖ លោក គួច ចំរើន អភិបាលនៃគណៈអភិបាលខេត្តព្រះសីហនុ កាលពីព្រឹកថ្ងៃទី២៣ ខែវិច្ឆិកា ឆ្នាំ២០២០ បានចេញធានការ…
ខេត្តព្រះសីហនុ ៖ លោក គួច ចំរើន អភិបាលនៃគណៈអភិបាលខេត្តព្រះសីហនុ កាលពីព្រឹកថ្ងៃទី២៣ ខែវិច្ឆិកា ឆ្នាំ២០២០ បានចេញធានការ ត្រូវផាកពិន័យជាប្រាក់ពី ២ម៉ឺនរៀល ទៅ៤០ម៉ឺនរៀល ចំពោះអ្នកដែលបោះចោលសំរាមផ្ដេសផ្ដាស នៅតាមទីសាធារណៈ ។
លោកអភិបាលខេត្តព្រះសីហនុ ចេញវិធានការបែបនេះ នៅក្នុងពេលដែលលោកដឹកនាំមន្ត្រីមន្ទីរ អង្គភាពជំនាញ រដ្ឋបាលក្រុងព្រះសីហនុ និងតំណាងក្រុមហ៊ុនហ៊ុន ចុះពិនិត្យវឌ្ឍនភាព នៃហេដ្ឋារចនាសម្ព័ន្ធការស្ថាបនាផ្លូវ ៣៤ខ្សែ ប្រព័ន្ធលូ អូ ប្រឡាយ អាងប្រព្រឹត្តកម្ម ការសាងសង់បន្ទប់ទឹកសាធារណ: តាមបណ្តោយឆ្នេរអូរឈើទាល ការរៀបចំក្រាលថ្មក្រានិត នៅតាមចិញ្ចើមផ្លូវជុំវិញតោពីរ ក្នុងក្រុងព្រះសីហនុ ។
ក្នុងឱកាសចុះពិនិត្យនោះលោក គួច ចំរើន បានធ្វើការណែនាំដល់បណ្ដាក្រុមហ៊ុនសាងសង់ផ្លូវ ត្រូវយកចិត្តទុកដាក់ ដោយទទួលខុស ត្រូវខ្ពស់ក្នុងការពន្លឿនការងារឱ្យបានឆាប់រហ័ស ធានាបានបរិមាណ និងគុណភាព សោភ័ណភាព ដោយមិនត្រូវទុកសំណល់ការដ្ឋាន នៅលើដងផ្លូវ ធ្វើឱ្យបាត់បង់សោភណ័ភាព នោះឡើយ ។
ដោយសង្កេតឃើញកន្លងមក បញ្ហាចោលសំរាមពាសវាលពាសកាល នៅតែកើតមាន អភិបាលខេត្តព្រះសីហនុ ក៏បានធ្វើការអំពាវ នាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលមកលេងកម្សាន្តតាមតំបន់ឆ្នេរ និងតាមរមនីយដ្ឋាននានា ក្នុងខេត្តព្រះសីហនុ ចូលរួមសហការថែ រក្សាបរិស្ថាន អនាម័យ ។
ទន្ទឹមនឹងនោះលោក គួច ចំរើន ក៏បានធ្វើការណែនាំដល់ក្រុមការងារ និងមន្ត្រីជំនាញ ឲ្យសរសេរអក្សរលើថ្មម៉ាប ដាក់តាមសួនច្បារ តំបន់ឆ្នេរ “ហាមបោះចោលសំរាម” ។ ហើយប្រសិនបើមានករណីរំលោភបំពាន (នៅតែបោះចោលសំរាម) និងត្រូវផាកពិន័យ តាមអនុក្រឹត្យលេខ១១៣ មាត្រា៤៣ ស្តីពីការផាកពិន័យអន្តរកាល ចាប់ពី ២០.០០០រៀល ទៅ ៤០០.០០០រៀល មិនលើកលែងឡើយ ៕
ចែករំលែកព័តមាននេះ