ខេត្តសៀមរាប ៖ ផ្លូវចំនួន៣៨ខ្សែនៅក្រុងសៀមរាប ដែលគ្រោងចំណាយថវិកាជាតិ ចំនួន១៥០លានដុល្លារសម្រាប់ស្ថាបនា នឹងបើកការដ្ឋានជាផ្លូវការនៅចុងខែវិច្ឆិកាខាងមុខនេះ ក្រោមអធិបតីភាពសម្តេចតេជោនាយករដ្ឋមន្ត្រី ហុ៊ន សែន ។ គម្រោងស្ថាបនាផ្លូវទាំង៣៨ខ្សែនៅក្រុងសៀមរាបនេះ ត្រូវបានក្រុមកងវិស្វកម្មសម្តេចតេជោ ហ៊ុន សែន បញ្ចុះគ្រឿងចក្របើកហែកទ្រូងផ្លូវ និងធ្វើការសម្អាតនៅតាមដងផ្លូវចាប់តាំងពីថ្ងៃទី១៥ ខែវិច្ឆិកា ឆ្នាំ២០២០កន្លងមក មុនពិធីបើកការដ្ឋានស្ថាបនា ។
នេះជាប្រវត្តិសាស្ត្រថ្មីមួយសម្រាប់ប្រជាពលរដ្ឋខេត្តសៀមរាប ដែលបានទទួលសមទ្ធិផល សម្រាប់បងប្អូនតទៅថ្ងៃអនាគត ។ ម្យ៉ាងទៀតគម្រោងស្ថាបនាហេដ្ឋារចនាសម្ព័ន្ធផ្លូវទាំង៣៨ខ្សែនេះ ក៏ជាខ្សែសង្វាក់នៃវិស័យសេដ្ឋកិច្ច និងទេសចរណ៍នៅខេត្តសៀមរាប ក្រោយពេលផុតរលត់ទៅវិញនៃវិបត្តិជំងឺកូវីដ-១៩នៅលើពិភពលោក ហើយក៏ជាការលើកកម្ពស់សោភ័ណភាពនៃទីក្រុងប្រវត្តិសាស្ត្រដ៏ចំណាស់មួយនេះ ក្នុងការស្តារឡើងវិញវិស័យទេសចរណ៍ ក្រោយការបញ្ចប់វិបត្តិកូវីដ-១៩ ។
យោងតាមខ្លឹមសារនៃកិច្ចប្រជុំក្រុមការងារសម្របសម្រួលខេត្ត កាលពីពេលថ្មីៗកន្លងមកនេះ ឯកឧត្តម ទៀ សីហា អភិបាលខេត្ត បានគូសបញ្ជាក់ថា នៅពេលយើងកំពុងជួបវិបត្តិជំងឺកូវីដ-១៩ យើងក៏មិនបន្ធូរបន្ថយកិច្ចអភិវឌ្ឍន៍ប្រទេសឡើយ ហើយពេលនេះក៏ជាឱកាសមួយដ៏ល្អសម្រាប់ខេត្តសៀមរាប ក្នុងការរៀបចំស្តារឡើងវិញហេដ្ឋារចនាសម្ព័ន្ធផ្លូវថ្នល់ក្នុងក្រុងសៀមរាប ក្នុងការស្តារឡើងវិញលើវិស័យទេសចរណ៍នៅតំបន់អង្គរនេះ ។
ឯកឧត្តមអភិបាលខេត្តបានលើកឡើងថា ក្រោយពីផ្លូវទាំងនេះស្ថាបនារួចរាល់ នឹងផ្តល់ផលប្រយោជន៍យ៉ាងច្រើនដល់ប្រជាពលរដ្ឋក្នុងខេត្តសៀមរាបទៅថ្ងៃអនាគត ក៏ដូចជាប្រទេសជាតិទាំងមូលព្រោះថា នៅពេលស្ថានភាពកូវីដ-១៩ចប់ ភ្ញៀវទេសចរនឹងមកកម្សាន្តនៅប្រទេសកម្ពុជា ជាពិសេសនៅខេត្តប្រវត្តិសាស្ត្រ ដែលសម្បូរទៅដោយសម្បត្តិវប្បធម៌ដ៏សម្បូរបែបមួយនេះ ដែលមានប្រាង្គប្រាសាទដ៏ល្បីល្បាញ ។ នៅពេលភ្ញៀវចូលមកកាន់ខេត្តសៀមរាប គឺពេលនោះហើយគេនឹងឃើញពីការអភិវឌ្ឍថ្មីៗ មានផ្លូវស្អាតប្រកបដោយផាសុកភាពងាយស្រួយក្នុងការធ្វើដំណើរ ដែលជាកត្តាមួយរួមចំណែកទាក់ទាញភ្ញៀវទេសចរជាតិ-អន្តរជាតិឲ្យមកកម្សាន្តនៅខេត្តសៀមរាបនេះបាន
ច្រើនឡើងវិញ ។
គេមកកម្សាន្តនៅសៀមរាបគេបានទស្សនារមណីយដ្ឋានប្រវត្តិសាស្ត្រ រមណីយដ្ឋាធម្មជាតិជាច្រើនដ៏សម្បូបែប ហើយមានផ្លូវងាយស្រួលក្នុងការធ្វើដំណើរប្រកបដោយសុវត្ថិភាពខ្ពស់ទៅមកទៀតផង ។ឯកឧត្តមអភិបាលខេត្តបញ្ជាក់ថា ការអនុវត្តគម្រោងស្ថាបនាហេដ្ឋារចនាសម្ព័ន្ធផ្លូវចំនួន៣៨ខ្សែនៅក្រុងសៀមរាបនេះ គ្រោងបញ្ចប់ឲ្យបានរួចរាល់នៅឆ្នាំ២០២១ខាងមុខ ៕
ចែករំលែកព័តមាននេះ