ខេត្តតាកែវ ៖ បើតាមសេចក្តីរាយការណ៍បានឱ្យដឹងថា មានអគ្គិភ័យមួយបានឆាបឆេះតូបលក់ចាប់ហួយមួយរបស់អាជីវករក្នុងផ្សារកំពុងជ្រៃយ៉ាងសន្ធោសន្ធៅ តែដោយសារមានការជួយពន្លត់ទាន់ពេលពីសំណាក់ប្រជាពលរដ្ឋ ក៏ដូចជាអាជ្ញាធរមូលដ្ឋានផងនោះ ទើបមិនធ្វើឱ្យភ្លើងឆេះតូបរាលដាលដល់តូបផ្សេងៗនោះទេ ប៉ុន្តែអណ្តាតភ្លើងបានឆាបឆេះអស់ទំនិញក្នុងតូបគ្មានសល់អ្វីឡើយធ្វើឱ្យម្ចាស់តូបយំមិនចេញដោយភាពសោកស្តាយដែលទំនិញត្រូវអណ្តាតភ្លើងឆេះបំផ្លាញខ្ទេចអស់។
សេចក្តីរាយការណ៍បន្តថា ហេតុការណ៍ភ្លើងឆាបឆេះតូបលក់ដូរខាងលើនេះ បានធ្វើឱ្យមានការភ្ញាក់ផ្អើលកាលពីវេលាម៉ោង៩និង៣០នាទីយប់ ថ្ងៃទី២១ ខែវិច្ឆិកា ឆ្នាំ២០២០ នៅក្នុងផ្សារកំពុងជ្រៃ ស្ថិតក្នុងឃុំស្មោង ស្រុកទ្រាំង ខេត្តកាកែវ។
បើតាមលោក អ៊ុំ ចំរើន អភិបាលរងស្រុកទ្រាំង បានឱ្យដឹងថា ម្ចាស់តូបខាងលើឈ្មោះ ម៉ម សុខុន ភេទប្រុស និងមានប្រពន្ធឈ្មោះ ប៉ែន ចក់ ជាអាជីវករលក់ដូរនៅផ្សារកំពុងជ្រៃ បានទទួលរងគ្រោះឆ្លងចរន្តអគ្គិសនី (ទុស្សេខ្សែភ្លើង) ឆាបឆេះតូប និងអីវ៉ាន់លក់ដូរអស់ខ្ទេចខ្ទីគ្មានសល់ឡើង។
លោកអភិបាលរងស្រុកបានឱ្យដឹងទៀតថា ចំពោះករណីអគ្គិភ័យឆេះបំផ្លាញតូបលក់ចាប់ហួយខាងលើនេះ គឺបណ្តាលមកពីទុស្សេខ្សែភ្លើងក្នុងតូប ហើយដោយសារមានការជួយអន្តរាគមន៍ទាន់ពេលវេលាពីសំណាក់ប្រជាពលរដ្ឋរស់នៅជុំវិញផ្សារដែលបានយកទឹកពន្លត់ ទើបអណ្តាតភ្លើងបានឆាបឆេះបំផ្លាញតែ១តូបនោះទេ ហើយមិនបណ្តាលឱ្យរីករាលដាលដល់តូបក្បែៗនោះឡើយ ។
លោកអភិបាលរងស្រុកបន្តទៀតថា ប៉ុន្តែបើគិតជាទឹកប្រាក់នៃការខូចខាតពីអគ្គិភ័យឆេះបំផ្លាញអីវ៉ាន់ក្នុងតូបនោះ គឺអស់ប្រមាណជាង៥.០០០ដុល្លារឯណោះ តែយ៉ាងណាលោកក៏សូមអរគុណដល់បងប្អូនប្រជាពលរដ្ឋយើងទាំងអស់គ្នាដែលចេះសាមគ្គីគ្នាជួយពន្លត់ភ្លើងបានទាន់ពេលវេលា តែបើមិនជួយពន្លត់ទាន់ពេលវេលានោះទេ គឺមិនដឹងថា ភ្លើងឆាបឆេះបំផ្លាញតូបលក់ដូរក្នុងផ្សារកំពុងជ្រៃអស់ប៉ន្មានតូបនោះទេ ។
បើតាមការឱ្យដឹងពីប្រជាពលរដ្ឋដែលជួយពន្លត់ភ្លើងឆេះតូបខាងលើបានឱ្យដឹងថា បន្ទាប់ពីភ្លើងឆាបឆេះតូបនេះ ពួកគាត់បានខលហៅឡានពន្លត់អគ្គិភ័យរបស់នគរបាលស្រុកទ្រាំង ឱ្យមកជួយអន្តរាគមន៍ពន្លត់ដែរ តែពេលខលហៅគឺមិនមាននរណាម្នាក់លើកទូរស័ព្ទឡើយ។ បើសិនយ៉ាងនេះ តើឱ្យប្រជាពលរដ្ឋសង្ឃឹងអីទៀតទៅ សូមលោកស្នងការនគរបាលខេត្តជួយគិត និងមើលអធិការនគរបាលស្រុកទ្រាំងផង ។ ហើយករណីនេះ កុំតែបានប្រជាពលរដ្ឋសាមគ្គីគ្នាជួយពន្លត់បានទាន់ពេលវេលាទេ កុំអីតូបលក់ដូរក្នុងផ្សារកំពុងជ្រៃនេះនឹងត្រូវអគ្គិភ័យឆេះបំផ្លាញគ្មានសល់ឡើយ។
ចំណែកលោកវរសេនីយ៍ទោ ជៀវ សុខា អធិការងខាងពន្លត់អគ្គីភ័យ បានឱ្យដឹងតាមទូរស័ព្ទថា នៅមានភ្លើងឆេះតូបក្នុងផ្សារកំពុងជ្រៃនោះខាងលើ ប៉ុស្តិ៍រដ្ឋបាលឃុំព្រៃស្លឹកបានខលហៅសុំជំនួយពីរថយន្តពន្លត់អគ្គិភ័យដែរ ប៉ុន្តែលុះបានមួយសន្ទុះ ខណៈពេលដែលលោកកំពុងរៀបចំចេញរថយន្តទឹកនោះ ខាងប៉ុស្តិ៍រដ្ឋបាលក៏បានខលប្រាប់មកវិញថា មិនបាច់មកទេ ព្រោះរឿងភ្លើងឆេះតូបខាងលើនេះ ត្រូវបានប្រជាពលរដ្ឋជួយពន្លត់បានទាំងស្រុងហើយ ដោយលឺបែបនេះ លោកក៏មិនបានចេញរថយន្តទឹកនោះទេ។
ចែករំលែកព័តមាននេះ