ខេត្តកំពង់ស្ពឺ ៖ រោងចក្រគ្មានយីហោមួយកន្លែង ស្ថិតនៅខាងជើងសាលាសង្កាត់រកាធំ ត្រូវបានប្រជាពលរដ្ឋរាយការណ៍ថា បានយកក្មេងៗ ដែលមិនទាន់គ្រប់អាយុទៅបំពេញការងារដោយជិះជាន់លើកម្លាំងពលកម្មកុមារ ។
ខេត្តកំពង់ស្ពឺ ៖ រោងចក្រគ្មានយីហោមួយកន្លែង ស្ថិតនៅខាងជើងសាលាសង្កាត់រកាធំ ត្រូវបានប្រជាពលរដ្ឋរាយការណ៍ថា បានយកក្មេងៗ ដែលមិនទាន់គ្រប់អាយុទៅបំពេញការងារដោយជិះជាន់លើកម្លាំងពលកម្មកុមារ ។
តាមប្រភពពីប្រជាពលរដ្ឋដែលនិយាយក្នុងលក្ខខណ្ឌមិនបញ្ចេញឈ្មោះឱ្យដឹងថា រោងចក្រដែលនៅតាមបណ្តោយខ្នងប្រឡាយទំនប់កំពិស ក្នុងភូមិរកាធំ សង្កាត់រកាធំ ក្រុងច្បារមន ឃើញសុទ្ធតែក្មេងៗជាង១០០នាក់ មិនទាន់គ្រប់អាយុចូលបម្រើការ ហើយមិនដឹងថា រោងចក្រនោះផលិតអ្វីពិតប្រាកដនោះដែរ តែអ្នកភូមិខ្លះសង្ស័យផលិតមួកសុវត្ថិភាព ។ អ្នកភូមិខ្លះទៀតនិយាយថា បើរោងចក្រមួយទាំងមូល មិនមានស្លាកយីហោដូចនេះ សង្ស័យគេផលិតគ្រឿងញៀន ក៏យើងមិនដឹងដែរ ។
តាមសម្តីប្រជាពលរដ្ឋបង្ហើបឱ្យដឹងថា ម្ចាស់រោងចក្រអត់មានស្លាកយីហោនេះ គឺជានគរបាលមួយរូបធ្វើការនៅក្រសួងមហាផ្ទៃ ដែលមានអំណាច ទើបហ៊ានឱ្យយកក្មេងៗមិនទាន់គ្រប់អាយុចូលធ្វើការបែបនេះ ។ ពាក់ព័ន្ធនឹងការលើកឡើងខាងលើនេះ អ្នកយកព័ត៌មានមិនអាចសុំការបកស្រាយពីប្រធានក្រុមហ៊ុនបានទេ ។
តាមសម្តីរបស់លោកចឹក បូរិន អនុប្រធានមន្ទីរការងារខេត្តកំពង់ស្ពឺបានឱ្យដឹងតាមទូរស័ព្ទថា រោងចក្រដែលគ្មានស្លាកយីហោនោះ គឺផលិតមួកសុវត្ថិភាព ហើយលោកមិនបានដឹងថា ម្ចាស់ក្រុមហ៊ុនយកក្មេងៗមិនទាន់គ្រប់អាយុចូលបម្រើការងារនោះទេ ហើយថាលោកនឹងឱ្យជំនាញចុះទៅអង្កេត និងពិនិត្យមើល បើមានក្មេងៗចូលបម្រើការងារពិតប្រាកដមែននោះ លោកមានជំនាញចេះធ្វើការហើយ ។
មជ្ឈដ្ឋានប្រជាពលរដ្ឋលើកឡើងថា រោងចក្រផលិតមួកមួយទាំងមូលមិនមានស្លាកយីហោ ហើយជំនាញទៀតសោត មិនដឹងថា មានក្មេងៗចូលបម្រើការងារជាង១០០នាក់ ។ សង្ស័យរឿងនេះ ខាងមន្ទីរការងារខេត្តកំពង់ស្ពឺ បានលាភសក្ការៈពីម្ចាស់ក្រុមហ៊ុន ហើយទើបបានស្ងាត់ឈឹងដូចចោរលួចសេះនោះ ។
អ្នកយកព័ត៌មានមិនអាចសុំការបកស្រាយពីប្រធានមន្ទីរការងារបានទេ ដោយមិនមានលេខទូរស័ព្ទទំនាក់ទំនង ។
ចែករំលែកព័តមាននេះ