ខេត្តកំពង់ឆ្នាំង ៖ រថយន្តធុនតូចមួយគ្រឿងត្រូវបានអណ្តាតភ្លើងឆាបឆេះយ៉ាងសន្ធោសន្ធៅ បណ្តាលឱ្យខូចខាតទាំងស្រុង ដោយសារតែឆ្លងចរន្តអគ្គិសនី ហេតុការណ៍នេះបានបង្កឱ្យមានការភ្ញាក់ផ្អើលកាលពីម៉ោង6និង30នាទីព្រឹក ថ្ងៃទី16 ខែវិច្ឆិកា ឆ្នាំ២០២០ នៅតាមបណ្តោយផ្លូវជាតិលេខ 5 ចន្លោះគីឡូម៉ែត្រលេខ 120 និង 121 ស្ថិតក្នុងភូមិស្នោ ឃុំសំខុនរ៉ង ស្រុកបរិបូណ៌។
បើយោងតាមសមត្ថកិច្ចនគរបាលនៅនឹងកន្លែងកើតហេតុបានឲ្យដឹងថា រថយន្តខាងលើម៉ាក វីស្តូ ពណ៌លឿង ពាក់ស្លាកលេខភ្នំពេញ 2t 8781 បើកបរដោយ ឈ្មោះ ម៉េង សាមឌី អាយុ33ឆ្នាំ មានទីលំនៅភូមិកែវឡាត ឃុំពន្លៃ ស្រុកបរិបូណ៍។
សមត្ថកិច្ចបន្តថា មុនពេលកើតហេតុ បុរសខាងលើបានបើករថយន្តរបស់ខ្លួនឆ្ពោះទៅទិសខាងជើង លុះមកដល់ចំណុចកើតហេតុ ក៏ស្រាប់តែរថយន្តរបស់បុរសរូបនេះបានឆ្លងចរន្តអគ្គិសនី រហូតក្លាយជាអណ្តាតភ្លើងឆាបឆេះយ៉ាងសន្ធោសន្ធៅតែម្តង ធ្វើឱ្យរថយន្តទាំងមូលរងការខូចខាតទាំងស្រុង ។
សមត្ថកិច្ចបន្តថា ក្នុងហេតុការណ៍ខាងលើនេះ ពុំមាននរណារងរបួសនោះទេ ចំណែករថយន្តពន្លត់អគ្គិភ័យរបស់អធិការនគរបាលស្រុកបរិបូណ៌ មិនអាចទៅជួយសង្គ្រោះទាន់ពេលបានដែរ៕
ចែករំលែកព័តមាននេះ