ខេត្តក្រចេះ ៖ កម្លាំងអាវុធហត្ថស្រុកសំបូរ បានចាប់ឃាត់ខ្លួនយុវជនម្នាក់ដែលបានធ្វើសកម្មភាពដើរបោកប្រាស់គេ ក្នុងទំហំលុយរាប់ម៉ឺនដុល្លារដោយសន្យាថា ធានានាំចូលបម្រើការងារក្នុងក្របខណ្ឌយោធានៃបញ្ជារដ្ឋានទ័ពជើងគោក។ រហូតមកទល់ថ្ងៃទី១១ ខែវិច្ឆិកា នេះ ជននេះកពុងត្រូវបានឃាត់ខ្លួនមកសាកសួរនៅទីបញ្ជារដ្ឋានកងរាជអាវុធហត្ថខេត្ត ខណៈមនុស្សជាច្រើននាក់សុទ្ធសឹងតែរងគ្រោះ ដោយការឆបោករបស់ជនម្នាក់នេះ ក៏កំពុងតែមកដាក់ពាក្យបណ្តឹងនៅទីបញ្ជារអាវុធហត្ថស្រុកជាបន្តបន្ទាប់ផងដែរនោះ។
ប្រភពព័ត៌មាននិយាយថា យុវជនម្នាក់នេះឈ្មោះ ហ៊ាង កុសល្យ មានទីលំក្នុងឃុំសំបូរ ស្រុកសំបូរ ខេត្តក្រចេះ និងត្រូវបានកម្លាំងអាវុធហត្ថស្រុកសំបូរចាប់ខ្លួនកាលពីយប់ថ្ងៃទី៩ ខែវិច្ឆិកា ខណះជននេះបានគេចខ្លួនបាត់ពីផ្ទះអស់ជាច្រើនខែទើបវិលមកលំនៅឋានវិញ។ ប្រភពព័ត៌មាននិយាយទៀតថា សកម្មភាពរបស់យុវជនម្នាក់នេះបានធ្វើឡើងមានរយះពេលជាយូរមកហើយ។ ដោយយុវជនម្នាក់នេះ អះអាងថា គេជាអ្នករត់ការឲ្យចូលបម្រើរការងារក្នុងក្របខណ្ឌយោធា ។ និងបានបោកប្រាស់គេឯងយកលុយក្នុងម្នាក់ៗចាប់ពី៤ពាន់ដុល្លារឡើងទៅ ជាថ្នូរនិងការរត់ការឲ្យជាប់ពេញសិទ្ឋក្នុងក្របខណ្ឌ។
សេចក្តីរាយការណ៍បាននិយាយថា មានមនុស្សក្នុងភូមិនិងក្រៅភូមិរាប់សិបនាក់បានគ្រោះដោយសារ ឆបោករបស់ជនម្នាក់នេះ។ អ្នករងគ្រោះទាំងនោះសុទ្ឋតែបានប្រគល់ប្រាក់ទៅឲ្យគេយកទៅធ្វើមានបានចាយលុយហឺហារ ហើយចេះតែទន្ទឹងរង់ចាំការហៅឲ្យទៅបំបេញបែបបទឯកសារបម្រើរការងារដូចតាមការអះអាងសន្យារបស់គេ ក្នុងភាពមានជំនឿទុកចិត្ត។
សេចក្តីរាយការណ៍ដដែលនោះបានឲ្យដឹងថា ក្នុងអំឡុងរយៈពេលជិតមួយឆ្នាំមកហើយ ជនម្នាក់នេះមិនត្រឹមតែបោកបញ្ឆោតអ្នកក្នុងខេត្តទេ ដែលរងគ្រោះដោយសារការឆបោករបស់គេ សូម្បីតែអ្នកនៅតាមបណ្តារខេត្តផ្សេងក៏គេដឹងថា មានច្រើននាក់ទៀតត្រូវរងការបោកប្រាស់ពីជនម្នាក់នេះដែរ។ មន្ត្រីអាវុធហត្ថខេត្តនិយាយថា កម្លាំងអាវុធហត្ថបានឃាត់ខ្លួនជននេះ និងរថយន្តសេរីទំនើបរបស់គេមួយគ្រឿងមករក្សាទុក។ ជននេះកំពុងត្រូវបានសាកសួរ ដើម្បីបន្តនីតិវិធីទៅតុលាការ៕
ចែករំលែកព័តមាននេះ