ខេត្តសៀមរាប ៖ ពិធីបួងសួង និងអន្ទងព្រលឹង គឺជាពិធីមួយដ៏សំខាន់មិនអាចខ្វះបានឡើយ បានប្រារព្ធឡើងនៅវត្តទេពប្រណម្យ ក្នុងបរិវេណប្រាសាទអង្គរធំ ក្នុងខេត្តសៀមរាប ដើម្បីបន់ស្រន់សុំសេចក្តីសុខ សេចក្តីចម្រើន…
ខេត្តសៀមរាប ៖ ពិធីបួងសួង និងអន្ទងព្រលឹង គឺជាពិធីមួយដ៏សំខាន់មិនអាចខ្វះបានឡើយ បានប្រារព្ធឡើងនៅវត្តទេពប្រណម្យ ក្នុងបរិវេណប្រាសាទអង្គរធំ ក្នុងខេត្តសៀមរាប ដើម្បីបន់ស្រន់សុំសេចក្តីសុខ សេចក្តីចម្រើន ប្រគេនថ្វាយដល់សម្តេចអគ្គមហាសង្ឃរាជាធិបតី កិត្តិឧទ្ទេសបណ្ឌិតទេព វង្ស សម្តេចមហាសង្ឃរាជនៃព្រះរាជាណាចក្រកម្ពុជា ខណៈមានព្រះរោគាពាធ ។
ការបួងសួង និងអន្ទងព្រលឹង គឺសូមឲ្យព្រលឹងព្រះអង្គចូលនៅក្នុងព្រះកាយរបស់ព្រះអង្គ ឲ្យបានដឹងព្រះកាយឡើងវិញ និងបានរួចចាក់ផុតពីទុក្ខភ័យទាំងឡាយ ទាំងពួង ដែលកំពុងតែយាយីដោយព្រះរោគាព្យាធិនៃព្រះកាយរបស់ព្រះអង្គ ។ សូមឲ្យទទួលបានតែសេចក្តីសុខសប្បាយ និងផុតទុក្ខសោក រោគា ឧបទ្រឌចង្រៃ សូមឲ្យវិនាសចេញពីព្រះកាយរបស់ព្រះអង្គ ។
ពិធីបួងសួង អន្ទងព្រលឹងនេះបានធ្វើនៅពីរកន្លែងផ្សេងគ្នា ពេលព្រឹកធ្វើនៅលោកតារាជ មុខប្រាសាទអង្គរវត្ត និងពេលរសៀលធ្វើនៅវត្តទេពប្រណម្យ ក្នុងបរិវេណប្រាសាទអង្គរធំ ក្រោមការរៀបចំរបស់ព្រះគុណ្ណវិឌោ សន សារិទ្ធ ព្រះសមុខអនុគណក្រុងសៀមរាប និងជាព្រះគ្រូចៅអធិការវត្តព្រឹន្ទ ។ មានការចូលរួមរបស់ឯកឧត្តមទេព សំអាន អគ្គនាយករងហិរញ្ញវត្ថុនិងភស្តុភារក្រសួងការពារ ព្រមទាំងមន្ត្រីរាជការ ព្រះសង្ឃ សិស្សគុណ និងពុទ្ធបរិស័ទជាច្រើនកុះករ កាលពីថ្ងៃទី៨ ខែវិច្ឆិកា ឆ្នាំ២០២០ ។
បន្ទាប់ពីធ្វើកិច្ចទៅតាមបែបព្រះពុទ្ធសាស នា និងព្រហ្មញ្ញសាសនារួចមក លោកអាចារ្យបានប្រកាសអំពាវនាវដល់ពពួកទេវតា អារុក្ខអារក្ស អ្នកសច្ចំបាំងបទ និងវត្ថុសក្ដិសិទ្ធិក្នុងលោកនាឱកាសនោះ ដើម្បីអញ្ជើញយាងឲ្យទៅសណ្ឋិតនៅក្នុងពិធីបួងសួងនេះ ជាប្រយោជន៍សម្រាប់ប្រគេនថ្វាយ ព្រះពរសព្ទសាធុការ និងប្រោះព្រំ សន្ដោសដល់ព្រះជន្មាយុសង្ខារ និងអន្ទងព្រលឹងសុំព្រះព្រលឹងព្រះអង្គយាងនិមន្តចូលព្រះរូបព្រះរាងកាយរបស់សម្តេចសង្ឃរាជទេព វង្ស សូមឲ្យរួចចាកផុតពីទុក្ខភ័យទាំងឡាយទាំងពួង ដែលកំពុងតែយាយីដោយព្រះរោគាព្យាធិនៃព្រះកាយរបស់ព្រះអង្គ សូមឲ្យទទួលបានតែសេចក្តីសុខសប្បាយ និងរួចផុតពីទុក្ខសោករោគាឧបទ្រឌចង្រៃ សូមឲ្យវិនាសចេញពីព្រះកាយរបស់ព្រះអង្គ ដែលព្រះអង្គកំពុងសម្រាកព្យាបាលព្រះរាជសុខភាព ។
ពិធីដែលបានរៀបចំនោះ គឺបានបង្ហាញអំពីវប្បធម៌ ប្រពៃណីរស់នៅរបស់ប្រជាជនខ្មែរ ដែលបានបង្កប់ជ្រៅនៅក្នុងជំនឿ និងសង្គម ។ ពិធីបួងសួងក៏ដូចជាពិធីក្រុងពលីដែរ គឺជាពិធីដែលស្ថិតក្នុងជំនឿតាមបែបព្រលឹង ដែលប្រជាជនខ្មែរយើងមានជំនឿថា នៅលើលោកនេះអ្នកខ្លាំងពូកែដែលបានចែកឋានទៅ ពិតជាបានប្រើប្រាស់ព្រលឹងរបស់ខ្លួន នៅតាមថែរក្សាកូនចៅជំនាន់ ក្រោយៗ និងមើលការខុសត្រូវដោយឫទ្ធានុភាពជួយគាំទ្រកូនចៅដែលឲ្យប្រព្រឹត្តតែអំពើល្អ និងមានមនសិការស្នហាជាតិ ស្រឡាញ់ការពារទឹកដីមាតុភូមិ កេរដំណែលដូនតាដោយពិតប្រាកដ ។ក្នុងពិធីបួងសួងនោះបានធ្វើពិធីអន្ទងព្រលឹង ឬហៅព្រលឹង បានចូលមករាងការរបស់ព្រះអង្គ ដើម្បីឲ្យព្រះអង្គបានឆាប់ជាផ្សះស្បើយពីព្រះរោគា បំពេញព្រះរាជកិច្ចដឹកនាំវិស័យព្រះពុទ្ធសាសនា ។
ការប្រារព្ធពិធីនានាតាមបែបព្រហ្មញ្ញសាសនា ដូចជាការអង្គុយសមាធិកស្វែងរកព្រលឹង ដែលបានចាកចេញពីព្រះកាយព្រះអង្គ ហើយបានទៅស្នាក់នៅតាមព្រៃព្រឹក្សានោះ ក៏បានធ្វើពិធីជញ្ជាត់ព្រលឹង ដើម្បីឲ្យចូលព្រះរូបកាយព្រះអង្គ ដែលបានប្រារព្ធធ្វើទៅតាមបែបជំនឿប្រពៃណីបានបន្សល់ទុកពីបុរាណកាលរៀងមក ។ ពិធីនេះដែរក៏បានបង្ហាញអំពីបេះដូងដ៏ទូលំទូលាយរបស់ជនជាតិខ្មែរ រក្សាប្រពៃណីជំនឿនៃជាតិសាសន៍របស់ខ្លួនតាំងតែពីសម័យកាលដ៏រុងរឿងនៃអាណាចក្រអង្គរ រហូតដល់បច្ចុប្បន្ន ៕
ចែករំលែកព័តមាននេះ