អ្នកប្រជែងខាងប្រជាធិបតេយ្យ លោក ចូបៃដិន និយាយថា វាច្បាស់ណាស់ថា លោកកំពុងឈ្នះរដ្ឋគ្រប់គ្រាន់ ដើម្បីធ្វើជាប្រធានាធិបតីសហរដ្ឋអាមេរិក ។
លោកនិយាយបែបនេះ នៅពេលដែលសារព័ត៌មានបរទេសបានព្យាករណ៍ថា លោកកាន់តែខិតជិតដល់ការទទួលបាន២៧០សំឡេងដែលត្រូវការចាំបាច់ ដើម្បីក្លាយជាប្រធានាធិបតីអាមេរិក ។
សារព័ត៌មាន Fox News បានព្យាករណ៍ថា មកដល់ពេលនេះ លោកទទួលបាន ២៦៤ សំឡេងអង្គបោះឆ្នោតដោយនៅខ្វះតែ ៦សំឡេងទៀតប៉ុណ្ណោះ ។
ចំណែកលោកត្រាំទើបទទួលបាន ២១៤ សំឡេងប៉ុណ្ណោះ ។ លោកថ្លែងនៅក្នុងសុន្ទរកថា ខ្លីមួយមុនពេលការប៉ាន់ស្មានបានបង្ហាញថា លោកនឹងឈ្នះរដ្ឋមីឈីហ្គែនថា «នៅពេលការរាប់ត្រូវបានបញ្ចប់យើងជឿជាក់ថា យើងនឹងក្លាយជាអ្នកឈ្នះ» ។
លទ្ធផលចុងក្រោយនឹងត្រូវអាស្រ័យលើរដ្ឋប្រទាញប្រទង់ដែលមិនទាន់បានប្រកាសដូចជា រដ្ឋអារីហ្សូណា រដ្ឋ ចច ចៀរ រដ្ឋ វិនស្កូស៊ីន និងផេនស៊ីលវេនៀ ។
រហូតមកដល់ពេលនេះ លោក ត្រាំ ត្រូវបានគេព្យាករណ៍ថា នឹងឈ្នះរដ្ឋចំនួន២៣ រួមមានរដ្ឋតិចសាស់ រដ្ឋ អូហៃអូ និង រដ្ឋផ្លរីដា ។
លោក ប្រធានាធិបតី ត្រាំ ចោទប្រកាន់ការក្លែងបន្លំដោយមិនផ្តល់ភស្តុតាង ហើយនិយាយថា គាត់នឹងប្តឹងទៅតុលាការកំពូល ។
ក្រុមយុទ្ធនាការរបស់លោកបានចាប់ផ្តើមផ្លូវច្បាប់ ដើម្បីបញ្ឈប់ការរាប់នៅក្នុងរដ្ឋ ផេនសិលវេនៀ រដ្ឋ វីនស្កូសីន រដ្ឋចច ចៀរ និង រដ្ឋ មីឈីហ្គែន ។
ក្រុមយុទ្ធនាការរបស់លោក ចូ បៃដិន ហៅសេចក្តីថ្លែងការណ៍របស់លោកប្រធានាធិបតីត្រាំថា «គួរឱ្យស្អប់ខ្ពើម» ដោយបន្ថែមថា «ការរាប់នឹងមិនបញ្ឈប់ទេ» ៕
ចែករំលែកព័តមាននេះ