រាជធានីភ្នំពេញ ៖ ស្ត្រីជាបុគ្គលិកហាងស្ទីមសោណាម្នាក់ ខណៈទៅធ្វើការបានឆ្លៀតដើរទៅរកទិញអីហូបសិន លុះទៅដល់គំនរសំរាមមួយ ស្រាប់តែនាងបានឮសំឡេងស្រែកយំ លុះនាងដើរចូលទៅមើល ក៏បានប្រទះឃើញទារិកាម្នាក់ទើបនឹងកើតមកថ្មីៗ ត្រូវជនមិនស្គាល់មុខច្រកចូលក្នុងថង់ខ្មៅមួយ ទាំងខ្លួនគ្មានក្រណាត់បិទបាំងរាងកាយឡើយ…
រាជធានីភ្នំពេញ ៖ ស្ត្រីជាបុគ្គលិកហាងស្ទីមសោណាម្នាក់ ខណៈទៅធ្វើការបានឆ្លៀតដើរទៅរកទិញអីហូបសិន លុះទៅដល់គំនរសំរាមមួយ ស្រាប់តែនាងបានឮសំឡេងស្រែកយំ លុះនាងដើរចូលទៅមើល ក៏បានប្រទះឃើញទារិកាម្នាក់ទើបនឹងកើតមកថ្មីៗ ត្រូវជនមិនស្គាល់មុខច្រកចូលក្នុងថង់ខ្មៅមួយ ទាំងខ្លួនគ្មានក្រណាត់បិទបាំងរាងកាយឡើយ និងបានយកទៅបោះចោលនៅគំនរសំរាមខាងលើ ។ មិនតែប៉ុណ្ណោះមានស្រមោចរោមខាំពេញខ្លួនថែមទៀតផង បន្ទាប់មកស្ត្រីខាងលើបានបានស្រែកប្រាប់អ្នកជិតខាងឲ្យទៅមើលរួច ទើបលើកយកទារិកាទៅប្រគល់ឲ្យម្ដាយមីងរបស់នាងយកទៅចិញ្ចឹម។
ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី២ ខែវិច្ឆិកា ឆ្នាំ២០២០ នៅចំណុចខាងក្រោយផ្សារតាំងកសាង ស្ថិតនៅក្នុងភូមិចំការឪឡឹក២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។ ខណៈនោះប្រជាពលរដ្ឋដែលទៅចោមរោមមើលបានលាន់មាត់ថា«តើនរណាអីក៏ចិត្តខ្មៅម្ល៉េះ! ច្រកកូនស្រីទើបនិងកើតមកថ្មីៗក្នុងថង់ខ្មៅយកទៅបោះចោលនៅគំនរសម្រាមបែបនេះ? »។
តាមប្រភពព័ត៌មានបានឲ្យដឹងថា ស្ត្រីដែលជាអ្នកប្រទះឃើញទារិកាខាងលើនោះឈ្មោះថន ស្រីម៉ាច អាយុ២៣ឆ្នាំ មុខរបរជាបុគ្គលិកហាងស្ទីមសោណា ក្បែរចំណុចកើតហេតុ មានស្រុកកំណើតនៅក្នុងភូមិអូរសាលា ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ។ ស្ត្រីរូបនេះបាននិយាយថា នៅមុនពេលកើតហេតុនាងបានទៅធ្វើការប៉ុន្តែពេលទៅដល់អត់បានចូលធ្វើការភ្លាមនោះទេ នាងបានដើរទៅរកទិញអីហូបនៅផ្សារតាំងកសាងសិន លុះពេលដើរទៅដល់ចំណុចកើតហេតុ ស្រាប់តែឮសំឡេងស្រែកយំ នាងក៏បានដើរទៅមើលឃើញទារិកានៅក្នុងថង់ខ្មៅខ្លួននលគកគ្មានក្រណាត់រុំបិទបាំងនោះឡើយ។
ប្រភពដដែលបានបន្តថា ទារិការនេះទើបនិងកើតមកថ្មីៗប៉ុណ្ណោះដោយមិនទាន់កាត់ផ្ចិតចោលនៅឡើយ ហើយអ្វីដែលគួរឲ្យសង្វេគថែមទៀតនោះខ្លួនប្រាណទារិកាពោរពេញទៅដោយសត្វស្រមោចរោមខាំថែមទៀតផង ។ បន្ទាប់មកនាងស្រែកហៅអ្នកជិតខាងឲ្យជួយមើល បន្ទាប់មកនាងបានលើកយកទារិកានេះយកទៅប្រគល់ឲ្យស្ត្រីម្នាក់ទៀតដែលត្រូវជាម្ដាយមីងរបស់នាងឈ្មោះ ប៉ាត កាន់ អាយុ៥០ឆ្នាំ ស្នាក់នៅជិតកន្លែងកើតហេតុនោះដែរដើម្បីយកទៅចិញ្ចឹមបីបាច់ថែរក្សាដូចជាកូនបង្កើត។
ដោយឡែកស្ត្រីឈ្មោះប៉ាត កាន់ បាននិយាយថាក្រោយពេលទទួលទារិកាពីក្មួយស្រីគាត់បាននាំយកទៅកាន់គ្លីនិកមួយនៅជិតនោះឲ្យក្រុមគ្រូពេទ្យកាត់ផ្ចិតចោលរួចបីយកទៅកាន់សាលាសង្កាត់កាកាបទី២និងប៉ុស្តិ៍នគរបាលកាកាបទី២ដើម្បីសុំយកទៅចិញ្ចឹម ។
ខណៈនោះសមត្ថកិច្ចនគរបាលនិងអាជ្ញាធរសង្កាត់បានជួយដឹងឮ ហើយក្រោយមកដោយសារតែប្អូនបង្កើតរបស់គាត់ម្នាក់ទៀតឈ្មោះទិត្យ សុគន្ធ អាយុ៣៥ឆ្នាំរស់នៅនៅភូមិអូរសាលា ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ រៀបការច្រើនឆ្នាំហើយតែអត់មានកូននិងគេសោះ ហើយកំពុងចង់បានកូនយកទៅចិញ្ចឹមស្រាប់ផងនោះ ទើបគាត់សម្រេចយកទារិកានេះទៅឲ្យប្អូនរបស់គាត់រូបនោះជាអ្នកចិញ្ចឹមបីបាច់ថែរក្សាបន្ត។
ប្រជាពលរដ្ឋបាននិយាយថាពួកគាត់ពុំដឹងថាតើនរណាគឺឪពុកម្ដាយរបស់ទារិកានេះទេ ហើយសង្ស័យថាពួកភ្លើតភ្លើនគេស្រឡាញ់គ្នាដោយលួចលាក់ប្រព្រឹត្តខុសគន្លងប្រពៃណីរហូតមានផ្ទៃពោះ ហើយខាងប្រុសដោះដៃចោលលុះពេលកូនកើតមកខ្លាចខ្មាសគេឬគ្មានលទ្ធភាពចិញ្ចឹមទើបសម្រេចចិត្តយកទៅបោះចោលដោយគ្មានមេត្តាបែបនេះ៕ (កែសម្រួលដោយ ៖ ធីតា)
ចែករំលែកព័តមាននេះ