វិស័យឯជនថៃនឹងសង់រោងចក្រឱ្យបានច្រើនសម្រាប់ជួល
បាងកក ៖ ក្រុមហ៊ុនផ្តល់សេវាកម្មជួលឃ្លាំងនិងរោងចក្រឈានមុខរបស់ថៃ Ticon Industrial Connection Public Co.Ltd., បានចាប់ដៃជាមួយទីភ្នាក់ងារអភិវឌ្ឍន៍ឧស្សាហកម្មYokohama
បាងកក ៖ ក្រុមហ៊ុនផ្តល់សេវាកម្មជួលឃ្លាំងនិងរោងចក្រឈានមុខរបស់ថៃ Ticon Industrial Connection Public Co.Ltd., បានចាប់ដៃជាមួយទីភ្នាក់ងារអភិវឌ្ឍន៍ឧស្សាហកម្មYokohamaរបស់ជប៉ុន នៅក្នុងការសាងសង់រោងចក្រខ្នាតតូចឲ្យបានច្រើនសម្រាប់ជួលឲ្យប្រតិបត្តិករនៃសហគ្រាសជប៉ុន។
លោកViraphan Phunket ប្រធានក្រុមហ៊ុនបានបញ្ជាក់ថា បណ្តាអគារឬរោងចក្រជាច្រើនអាចនឹងត្រូវបានសាងសង់ឡើងលើផ្ទៃដីទំហំ១0៧រ៉ៃ(១៧ហិកតា)នៅប្លុកតំបន់សុវណ្ណភូមិដែលស្ថិតក្រោមឈ្មោះYokohama Factory Zone។ ជាងនេះទៅទៀតតំបន់ថ្មីនោះអាចនឹងផ្តោតលើរោងចក្រផលិតរថយន្ត គ្រឿងអេឡិចត្រូនិក និងផលិតផលបា្លស្ទិក ។
គម្រោងនេះគ្របដណ្តប់លើផ្ទៃដីទំហំ៦៧.៤០០ម៉ែត្រការ៉េ ដែលប្រើប្រាស់នូវការវិនិយោគចំនួន៣០០លានបាត ឬស្មើនឹង៨,៩៥លានដុល្លារ ។ ម្យ៉ាងទៀត ៦០%នៃតំបន់នេះគឺបានទាក់ទាញការវិនិយោគពីបណ្តាក្រុមហ៊ុនជប៉ុនចំនួន៥រួចមកហើយ ដែលជាអ្នកបោះទីតាំងនៅទីនោះ ។
ចំណែកក្រុមហ៊ុនពីរផ្សេងទៀតក៏បានកក់កន្លែងរបស់ពួកគេនៅតំបន់នោះរួចហើយដែរ ខណៈរោងចក្រ១០ទៀតនឹងសាងសង់ជាបន្តបន្ទាប់ក្នុងត្រីមាសទី៣ឆ្នាំនេះ ។
ទោះជាយ៉ាងណា ការអភិវឌ្ឍនៃតំបន់នេះទាំងមូលត្រូវបានគេរំពឹងថានឹងត្រូវបានបញ្ចប់នៅឆ្នាំក្រោយ ៕
ចែករំលែកព័តមាននេះ