ទឹកជ្រោះកាទៀងនៅកណ្តាលព្រៃភ្នំត្រជាក់កាយ ត្រជាក់ភ្នែក

ថ្ងៃទី ១៥ ខែ ឧសភា ឆ្នាំ ២០១៥

ម៉ោង ០៩:៣៤

ខេត្តរតនគិរី ៖ ទឹកជ្រោះកាទៀងស្ថិតនៅក្នុងភូមិកាទៀង ឃុំឡាបាំងពីរ ស្រុកលំផាត់ មានចម្ងាយប្រមាណ៩គីឡូម៉ែត្រ ពីក្រុងបានលុង នៃខេត្តរតនគិរី ។
មុនធ្វើដំណើរទៅដល់រមណីយដ្ឋានទឹកជ្រោះកាចាញមានផ្លូវបំបែកខាងស្តាំដៃតាមរបងរោងចក្រកៅស៊ូក្រែប នាភាគខាងត្បូង គឺជាផ្លូវលំឆ្ពោះទៅកាន់រមណីយដ្ឋាននោះ ដែលមានចម្ងាយប្រមាន៣គីឡូម៉ែត្រប៉ុណ្ណោះ ។

រមណីយដ្ឋានទឹកជ្រោះកាទៀង ស្ថិតនៅកណ្តាលព្រៃភ្នំ មានដើមឈើ ធំៗអាចផ្តល់ជាម្លប់យ៉ាងត្រជាក់ត្រឈឹងត្រឈៃដល់អ្នកទេសចរដែលទៅដល់ទីនោះ ។ ដើម្បីគយគន់សម្រស់ដ៏ត្រកាលនៃទឹកធ្លាក់ឱ្យកៀក អ្នកទេសចរត្រូវធ្វើដំណើរចុះតាមកាំជណ្តើរឈើជាច្រើនកាំទៅក្រោម ។ នៅជាប់ខ្សែទឹកធ្លាក់នោះមានរូងថ្មធំ ដែលអាចឱ្យអ្នកទេសចរដើរចូលទៅខាងក្នុងបាន ហើយមើលទិដ្ឋភាពល្អ ប្លែកៗពីធម្មជាតិកាត់តាមស្រទាប់ខ្សែទឹកដែលកំពុងហូរធ្លាក់យ៉ាងត្របាញ់ ។

ចំណែកនៅខាងលើក្បែរចំណុចទឹកធ្លាក់មានកន្លែងជិះដំរីសម្រាប់ការដើរកម្សាន្តតាមព្រៃជុំវិញទីនោះ ។ មិនតែប៉ុណ្ណោះ នៅទីនោះមានផលិតផលធ្វើពីដៃដោយសហគមន៍ជនជាតិគ្រឹងជាច្រើនមុខ ដាក់តាំងលក់មានដូចជា កាផា ឃ្លោក ស្នា គង ក្រណាត់ប៉ឹង និងសំពត់តាមបែបប្រពៃណីជនជាតិភាគតិចជាដើម ៕