ការផ្ទុះ និងរីកសាយជំងឺកូវីដ ១៩ បានធ្វើឲ្យមនុស្សជាច្រើនភ្ញាក់ផ្អើល និងទទួលរងផលប៉ះពាល់ ប៉ុន្តែសម្រាប់មនុស្សមួយចំនួន ពួកគេបានត្រៀមខ្លួនរួចជាស្រេចមុនពេលជំងឺនេះធ្ងន់ធ្ងរឡើង ដែលអនុញ្ញាតឲ្យពួកគេកាត់បន្ថយផលប៉ះពាល់ដល់ប្រាក់ចំណូល និងអាជីវកម្មផងដែរ។ មនុស្សទាំងនេះមិនចាំបាច់ជាមនុស្សដែលមានអំណាច…
ការផ្ទុះ និងរីកសាយជំងឺកូវីដ ១៩ បានធ្វើឲ្យមនុស្សជាច្រើនភ្ញាក់ផ្អើល និងទទួលរងផលប៉ះពាល់ ប៉ុន្តែសម្រាប់មនុស្សមួយចំនួន ពួកគេបានត្រៀមខ្លួនរួចជាស្រេចមុនពេលជំងឺនេះធ្ងន់ធ្ងរឡើង ដែលអនុញ្ញាតឲ្យពួកគេកាត់បន្ថយផលប៉ះពាល់ដល់ប្រាក់ចំណូល និងអាជីវកម្មផងដែរ។
មនុស្សទាំងនេះមិនចាំបាច់ជាមនុស្សដែលមានអំណាច ឬថវិកាច្រើនក្នុងសង្គមទេ តែមនុស្សដែលតាមដានព័ត៌មានទាំងក្នុងស្រុក និងក្រៅប្រទេសក៏អាចមានចំណេះដឹងគ្រប់គ្រាន់ក្នុងការត្រៀមខ្លួន និងធ្វើការសម្រេចចិត្តបានល្អៗដែរ ។ ខាងក្រោមគឺជាគន្លឹះមួយចំនួនក្នុងការអានព័ត៌មានដែលនឹងជួយដល់ការរកលុយរបស់អ្នក៖
១. កុំភ័យខ្លាច តែធ្វើជាមនុស្សពូកែឆ្ងល់វិញ
ការអានព័ត៌មានច្រើនអាចធ្វើឲ្យអ្នកងាយនឹងភ័យខ្លាចដែរព្រោះព័ត៌មានមិនល្អៗភាគច្រើនត្រូវបានផ្សព្វផ្សាយច្រើនជាងព័ត៌មានដែលល្អ។ ទោះជាវាគួរឲ្យភ័យខ្លាចពិតមែនក្តី អ្នកមិនត្រូវអនុញ្ញាតឲ្យខ្លួនធ្វើការសម្រេចចិត្តដោយយោងតាមអារម្មណ៍ភ័យខ្លាចនេះទេ។ ផ្ទុយមកវិញ អ្នកត្រូវតាំងខ្លួនជាមនុស្សពូកែឆ្ងល់ និងព្យាយាមរកចម្លើយពីប្រភពខុសៗគ្នា។ ប្រសិនបើអ្នករកមិនបានចម្លើយលើប្រព័ន្ធអ៊ីនធើណិតទេនោះ អ្នកអាចសួរអ្នកដែលមានជំនាញ និងព័ត៌មានបាន។
២. ការស្រាវជ្រាវ
មុនពេលធ្វើការសម្រេចចិត្តទាក់ទិននឹងលុយ អ្នកត្រូវតែធ្វើការស្រាវជ្រាវឲ្យបានច្បាស់លាស់ជាមុនសិន។ បើវាជាឱកាសវិនិយោគ អ្នកអាចស៊ើបសួរអ្នកមានបទពិសោធន៍ឲ្យបានច្បាស់សិនមុនពេលធ្វើការសម្រេចចិត្តវិនិយោគព្រោះប្រព័ន្ធអ៊ីនធើណិតបានផ្តល់ភាពងាយស្រួលសម្រាប់ការបោកប្រាស់ ហើយមនុស្សជាច្រើនក៏បានធ្លាក់ខ្លួនក្នុងអន្ទាក់នេះដែរ។
៣. អ្នកមិនចាំបាច់ត្រូវជឿអ្វីទាំងអស់ទេ
មិនមែនអ្វីទាំងអស់ដែលអ្នកមើលឃើញលើប្រព័ន្ធសង្គម ឬលើអ៊ីនធើណិតជាការពិតទេ។ ដើម្បីជៀសវាងការធ្លាក់ខ្លួនជឿប្រភពដែលផ្សព្វផ្សាយព័ត៌មានមិនពិត អ្នកគួរតែពិនិត្យមើលអ្នកផ្សព្វផ្សាយជាមុនសិនថាប្រភពព័ត៌មានចេញមកពីអ្នកផ្សព្វផ្សាយដែលគួរឲ្យជឿជាក់ទេ។ ប្រសិនបើអ្នកមិនជឿជាក់លើប្រភពហើយ អ្នកមិនគួរអានឬចែករំលែកបន្តទេ៕
ចែករំលែកព័តមាននេះ