រាជធានីភ្នំពេញ ៖ ជំនន់ទឹកស្ទឹងព្រែកត្នោតបានជន់លិចភូមិឋាន ផ្ទះសម្បែងរាប់ពាន់ខ្នងនៅក្នុងភូមិសាស្ត្រខណ្ឌដង្កោ រាជធានីភ្នំពេញ អស់រយៈពេលជាង១០ថ្ងៃកន្លងមកហើយរួមទាំងកំណាត់ផ្លូវជាតិនិងផ្លូវបេតុងព្រមទាំងផ្លូវលំនានាជាច្រើនទៀត ។ ប៉ុន្តែគិតមកត្រឹមថ្ងៃទី២៥ ខែតុលា ឆ្នាំ២០២០…
រាជធានីភ្នំពេញ ៖ ជំនន់ទឹកស្ទឹងព្រែកត្នោតបានជន់លិចភូមិឋាន ផ្ទះសម្បែងរាប់ពាន់ខ្នងនៅក្នុងភូមិសាស្ត្រខណ្ឌដង្កោ រាជធានីភ្នំពេញ អស់រយៈពេលជាង១០ថ្ងៃកន្លងមកហើយរួមទាំងកំណាត់ផ្លូវជាតិនិងផ្លូវបេតុងព្រមទាំងផ្លូវលំនានាជាច្រើនទៀត ។ ប៉ុន្តែគិតមកត្រឹមថ្ងៃទី២៥ ខែតុលា ឆ្នាំ២០២០ ទឹកបានស្រកច្រើនហើយ បណ្ដាលឱ្យភូមិឋាន និងផ្ទះសម្បែងមួយចំនួននៅបន្តលិច ព្រោះតែទំនាបខ្លាំង ចំណែកឯមួយចំនួនទៀតបានវិលទៅរកធម្មតាវិញ ហើយក៏មានមួយចំនួនទៀតទឹកស្រកចេញពីផ្ទះអស់ហើយ ប៉ុន្តែនៅតាមផ្លូវមុខផ្ទះនៅលិច និងនៅតាមផ្លូវចូលទៅកាន់ភូមិឬបុរី នៅតែលិចលង់ជ្រៅមិនអាចដើរ ឬជិះម៉ូតូនិងរថយន្តបានទេ ទាល់តែពីជិះទូកនិងអូប័រចូលទៅទើបបាននិយាយរួមទីតាំងលំនៅដ្ឋានពួកគាត់ដូចសង់នៅលើកោះដូច្នោះដែរ។
បើក្រឡេកទៅមើលកំណាត់ផ្លូវលេខ១០៤ ត្រង់ចំណុចខាងលិចរង្វង់កួរស្រូវ សង្កាត់រលួស ខណ្ឌង្កោ ដែលកាលពីថ្ងៃទី២៤ ខែតុលា ទឹកនៅលិចនិងហូរកាត់ផ្លូវខ្លាំងនៅឡើយរហូតវាយបោករថយន្តធុនតូច២គ្រឿងធ្លាក់ផ្លូវនិងរថយន្តដឹកស៊ីម៉ង់ត៌១គ្រឿងជាប់ផុងផងនោះ រហូតមកដល់ព្រឹកថ្ងៃទី២៥ ខែតុលា ទឹបានស្រកចេញពីស្ទើតែទាំងស្រុងហើយគ្រាន់តែនៅហូរកាត់ត្រង់ចំណុចដែលទឹកហូរច្រោះក្លាយទៅជារង្វះប៉ុណ្ណោះ ។ ប៉ុន្តែអ្វីដែលមើលឃើញគឺក្រោយពេលទឹកស្រកទៅកំណាត់ផ្លូវនេះបានរងការខូចខាតយ៉ាងដំណំ ដោយសារតែទឹកលិចនិងហូរកាត់យូរថ្ងៃបណ្ដាលឲ្យច្រោះបាក់គួរឲ្យស្ដាយបំផុតហើយរថយន្តនិងម៉ូតូពុំអាចធ្វើដំណើរឆ្លងកាត់បានឡើយ។
តាមប្រជាពលរដ្ឋបាននិយាយថា កំណាត់ផ្លូវលេខ១០៤ នេះតភ្ជាប់ពីផ្លូវជាតិលេខ២និងផ្លូវលេខ២១៧ ហៅផ្លូវចំការដូង ត្រង់ចំណុចរង្វង់មូលកួរស្រូវ ស្ថិតនៅក្នុងភូមិរលួស សង្កាត់រលួស ខណ្ឌដង្កោ រាជធានីភ្នំពេញ ឆ្ពោះទៅកាន់កំណាត់ផ្លូវជាតិលេខ៣ ត្រង់ចំណុចកំពង់ទួល ស្រុកកណ្ដាលស្ទឹង ខេត្តកណ្ដាល ។ នៅអំឡុងពេលកើតមានទឹកជំនន់ទឹកបានហូរកាត់ផ្លូវនេះជាច្រើនគីឡូម៉ែត្រគឺចាប់ពីចំណុចរង្វង់មូលកួរស្រូវ ទៅដល់ភូមិសាស្ត្រ សង្កាត់គងនយ ខណ្ឌដង្កោ ដែលជាហេតុធ្វើឲ្យផ្លូវទទួលរងការខូចខាតក្លាយទៅជារណ្ដៅនិងជង្ហុកច្រើនកន្លែងរាប់មិនអស់ ហើយពួកគាត់សង្ឃឹមថាអាជ្ញាធរនិងឆាប់ជួសជុលឡើងវិញផងដែរ
តាមប្រភពដដែលបានបន្តថា រយៈពេល២ថ្ងៃមុននេះទឹកហាក់នៅនឹងថ្កល់ដែលបានធ្វើឲ្យពួកគាត់គ្មានសង្ឃឹមថានិងស្រកនោះទេ ប៉ុន្តែរហូតមដល់ព្រឹកព្រឹកថ្ងៃទី២៥ ខែតុលា ស្រាប់តែទឹកស្រកលឿនគួរសម ដោយបានធ្វើឲ្យស្រកអស់ពីក្នុងបុរីមួយនៅនៅក្បែររង្វង់មូលកួរស្រូវ និងស្ទើរតែស្រកអស់ពីផ្លូវលេខ១០៤នេះទៀត ។ មូលហេតុដែលទឹកស្រកលឿនបែបនេះគឺដោយសារតែកម្រិតទឹកស្ទឹងព្រែកត្នោតស្រកច្រើនដែរ ហើយប្រសិនបើនៅតែបន្តស្រកលឿនបែបនេះមិនយូរប៉ុន្មាននោះទេ ទឹកជំនន់នេះនឹងឆាប់ស្រកអស់ពីតំបន់ទំនាបខ្លាំងដែរ ហើយពេលនេះនៅតំបន់ខ្លះដែលខ្ពស់ជាងស្ទឹងលិចដែរ តែលិចរាក់ ចំណែកឯតំបន់ខ្លះដែលទំនាបខ្លាំងនៅលិចជ្រៅនៅឡើយ៕ (កែសម្រួលដោយ ៖ ធីតា)
ចែករំលែកព័តមាននេះ