ការបង្កើតទំនាក់ទំនងមានសារៈសំខាន់ណាស់ទាំងក្នុងការងារ និងក្នុងអាជីវកម្ម។ មានមនុស្សជាច្រើនពឹងផ្អែកលើបណ្តាញមនុស្សដែលខ្លួនស្គាល់សម្រាប់ទទួលបានឱកាសការងារ និងឱកាសរកលុយថ្មីៗ។ អ្នកស្រីស៊ូស៊ី វេចន៍ (Suzy Welch) ដែលជាអ្នកនិពន្ធសៀវភៅផ្នែកគ្រប់គ្រងដ៏ល្បីប្រចាំសហរដ្ឋអាមេរិកក៏យល់ស្របនឹងចំណុចនេះដែរ។
អ្នកស្រីបានបកស្រាយថា ការជួបជាមួយមនុស្សមិនត្រឹមតែអនុញ្ញាតឲ្យអ្នករៀនសូត្រពីអ្វីដែលអ្នកត្រូវដឹងទេ តែអ្នកអាចរៀនពីក្រុមហ៊ុនដែលបានបរាជ័យ ឬកំពុងតែជោគជ័យផងដែរ ព្រមទាំងរៀនសូត្រពីបច្ចេកវិទ្យាថ្មីៗដែលកំពុងតែមានសក្តានុពលលើទីផ្សារ។ ក្រៅពីនេះហើយ អ្នកអាចលឺពីឱកាសការងារល្អៗពីអ្នកដទៃទៀតផង។
ប៉ុន្តែវាមិនមែនមានន័យថាមនុស្សគ្រប់គ្នាចូលចិត្តការបង្កើតទំនាក់ទំនងទេ។ លើសពីនេះទៅទៀត ការផ្ទុះជំងឺកូវីដ ១៩ បានបង្កឲ្យការបង្កើតទំនាក់ទំនងកាន់តែមានភាពលំបាកជាងមុនផងដែរ។
អ្នកស្រីវេចន៍បានចែករំលែកនូវគន្លឹះងាយៗដែលអាចជួយឲ្យអ្នកបង្កើតទំនាក់ទំនងល្អជាមួយអ្នកដទៃដែលអាចផ្តល់ឱកាសការងារ ឬឱកាសរកលុយនៅថ្ងៃមុខបាន។
អ្នកស្រីបានប្រាប់ថា ជារៀងរាល់សប្តាហ៍ អ្នកស្រីរកមើលមនុស្សដែលបានធ្វើឲ្យជីវិតរបស់អ្នកស្រីល្អប្រសើរជាងមុន មិនថាជាមិត្តភក្តិ មិត្តរួមការងារ ឬមនុស្សដែលអ្នកស្រីគោរពទេ។ អ្នកទាំងនេះក៏អាចជាមនុស្សដែលអ្នកស្រីធ្លាប់ធ្វើការជាមួយ ឬមិត្តរួមការងារបច្ចុប្បន្នផងដែរ។ បន្ទាប់មកអ្នកស្រីព្យាយាមរកមនុស្សដែលអ្នកស្រីមិនទាក់ទងជាមួយជាប្រចាំ និងបង្កើតការសន្ទនាជាមួយអ្នកទាំងនោះ។
អ្នកស្រីធ្លាប់ផ្ញើសារមួយឲ្យទៅសាស្ត្រាចារ្យរបស់អ្នកស្រីដែលបានបង្រៀនកំណាព្យពេលដែលអ្នកស្រីជានិស្សិតឆ្នាំទីមួយនៅសាកលវិទ្យាល័យ។ អ្នកស្រីបានប្រាប់មកថា មេរៀនដែលអ្នកស្រីបានរៀនពីការខិតខំប្រឹងប្រែងតស៊ូពីសាស្រា្តចារ្យរូបនោះបានជួយដល់អាជីពអ្នកស្រីយ៉ាងខ្លាំង។
អ្នកស្រីចូលចិត្តផ្ញើសារសួរសុខទុក្ខដែលភ្ជាប់នូវអំណរគុណទាំងនេះទៅកាន់មនុស្សខាងលើ និងប្រាប់ទៅពួកគេថាអ្នកស្រីមិនសង្ឃឹមថាអាចទទួលបានអ្វីមកវិញទេ។ ប៉ុន្តែមនុស្សភាគច្រើនតែងតែឆ្លើយតបនឹងអ្នកស្រីវិញ ហើយអនុញ្ញាតឲ្យអ្នកស្រីចាប់ផ្តើមការសន្ទនាដ៏គួរឲ្យចាប់អារម្មណ៍ថែមទៀតផង ៕
ចែករំលែកព័តមាននេះ