រាជធានីភ្នំពេញ ៖ កំណាត់ផ្លូវជាតិលេខ៣ ត្រង់ចំណុចភូមិព្រៃព្រីងខាងត្បូងព្រំប្រទល់ភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ បានការខូចខាតយ៉ាងធ្ងន់ធ្ងរក្លាយទៅជារណ្ដៅ ជង្ហុក ថ្លុកក្របី សម្បុកមាន់ជាច្រើនកន្លែង ដោយសារតែប្រព័ន្ធលូរំដោះទឹកចេញតូចពេកហើយបរិមាណទឹកភ្លៀងច្រើនហួសទើបជន់លិច និងហូរកាត់លើផ្លូវតែម្ដង ។
មិនតែប៉ុណ្ណោះមានរថយន្តធន់ធ្ងន់បើកឆ្លងកាត់ទាំងយប់ ទាំងថ្ងៃរាល់ថ្ងៃផងនោះ ទើបបណ្ដាលឲ្យផ្លូវខូចខ្ទេចខ្ទីបែបនេះ មើលទៅទឹកដក់ល្ហាចល្ហស្ទើរតែក្លាយជាបឹងទៅហើយ មិនខុសពីផ្លូវទៅកាន់នរកឡើយ ។
ប្រជាពលរដ្ឋបាននិយាយថា ទឹកភ្លៀងបានហូរចាក់ពីតំបន់ភូមិសាស្ត្រសង្កាត់កន្ទោកខណ្ឌកំបូល បណ្ដាលឲ្យលិចផ្លូវបេតុងជាច្រើនកន្លែង និងបានហូរកាត់លើកំណាត់ផ្លូវជាតិលេខ៣ ត្រង់ចំណុចខាងលើនេះ បណ្ដាលឲ្យទឹកជន់លិច រងការខូចខាតច្រើនថ្ងៃកន្លងមកហើយ មិនតែប៉ុណ្ណោះនៅត្រង់ចំណុចនោះមានលូសម្រាប់ឲ្យទឹកហូរដែរ ប៉ុន្តែលូតូច ហើយទឹកច្រើនទើបហូរមិនទាន់ ។
ចំណែកមុខទឹកដែលហូរកាត់ផ្លូវមិនមែនមានប្រវែងរាប់រយម៉ែត្រនោះទេ ប្រសិនបើដាក់លូមុខកាត់ធំៗវិញ ទឹក និងអាចហូរបានរួចចាក់ដីជាបណ្ដោះអាសន្នអាចធ្វើដំណើរបានស្រួល តែស្ថិតនៅក្នុងស្ថានភាពដូចពេលឥឡូវនេះវិញបានធ្វើឲ្យជួបនូវការលំបាកក្នុងការធ្វើដំណើរខ្លាំងណាស់ មិនតែប៉ុណ្ណោះមានការកកស្ទះចរាចរណ៍ថែមទៀតផង ។
ប្រភពខាងលើបានបន្តថា ចំណុចដែលរងការខូចខាតប្រវែងប្រមាណ១គីឡូម៉ែត្រ ចាប់ពីភូមិព្រៃព្រីងត្បូងដល់ភូមិក្រាំងដូនទៃ សង្កាត់ចោមចៅទី២ ក្នុងនោះប្រវែងប្រមាណ៣០០ម៉ែត្រ អាចធ្វើដំណើរបានតែមួយចំហៀងប៉ុណ្ណោះ ឯមួយចំហៀងទៀត ត្រូវធីបចោលសិន ព្រោះតែលិចទឹកផង និងខូចផងវេទនាក្នុងការធ្វើដំណើរខ្លាំងពេក ហើយរថយន្តភាគច្រើនឲ្យតែហ៊ានបើកចូលទៅ គឺដឹងតែជាប់ផុងហើយ ។
ដោយឡែកចំណុចដែលរងការខូចខាតខ្លាំងជាងគេនោះ គឺនៅមុខស្ថានីយ៍ប្រេងឥន្ធនៈសមប្រាថ្នា ស្ថិតក្នុងភូមិព្រៃព្រីងត្បូង ដែលពេលនេះស្ទើរក្លាយទៅជាបឹងទៅហើយ រីឯម៉ូតូ ឬម៉ូតូកង់បី និងម៉ូតូសណ្ដោងរ៉ឺម៉កខ្លះពេលបើកចូលទៅបានរលត់ម៉ាស៊ីន ឯខ្លះទៀតជាប់ផុងទាល់តែមានអ្នកជួយរុញគ្នាទើបអាចទៅមុខរួចបាន ។
ចំណែក អ្នកជិះម៉ូតូខ្លះក៏បានដួលម៉ូតូចូលទៅក្នុងទឹកដ៏កខ្វក់បណ្ដាលឲ្យទទឹកខ្លួន និងអីវ៉ាន់រងការខូចខាតខ្ទេចខ្ទី មិនតែប៉ុណ្ណោះក៏មានរថយន្តដែលដឹកធ្ងន់ក៏បានជាប់ផុងជាបន្តបន្ទាប់ដែរ ។
ប្រជាពលរដ្ឋដដែលបាននិយាយបន្តទៀតថា អាជ្ញាធរ និងស្ថាប័នពាក់ព័ន្ធនានាគួរតែមានវិធានការកែសម្រួលដាក់លូធំៗ និងចាក់ដីជាបណ្ដោះអាសន្នសិនដើម្បីសម្រួលដល់ការធ្វើចរាចរណ៍ មិនគួរបណ្ដោយឲ្យស្ថិតនៅក្នុងស្ថានភាពបែបនេះទេ ព្រោះប្រសិនបើមានលូធំទឹក និងលែងហូរកាត់ផ្លូវបែបនេះទៀតហើយ ចំណែកឯចរាចរណ៍ក៏លែងមានការកកស្ទះដែរ ។ ប៉ុន្តែបើនៅតែគ្មានការគិតគូគ្មានវិធានការ និងបណ្ដោយទៅតាមយថា កម្មទៀតនោះ និងធ្វើផ្លូវកាន់តែខូចខ្លាំងឡើង ហើយការកកស្ទះចរាចរណ៍ក៏នៅតែបន្តកើតមានមិនឈប់ឡើយ ។
ម្យ៉ាងទៀតនៅត្រង់ចំណុចនេះមិនអាចអត់មានកម្លាំងនគរបាលដាក់ប្រចាំការឈរសម្រួលចរាចរណ៍ជាប្រចាំបានទេ ហើយមើលទៅគួរឲ្យអាណិតដល់កម្លាំងនគរបាលខ្លាំងណាស់ ត្រូវឈរត្រាំទឹកមាត់ស្រែកផងបៀមកញ្ចែផ្លុំបញ្ជាចរាចរណ៍ផង មិនហ៊ានឈប់សម្រាកឡើយ ។
មន្ត្រីនគរបាលមួយរូបបាននិយាយថា កម្លាំងនគរបាលខណ្ឌពោធិ៍សែនជ័យ មានទាំងផ្នែកអន្តរាគមន៍ និងផ្នែកសណ្ដាប់ធ្នាប់ចរាចរណ៍ រួមជាមួយកម្លាំងនគរបាលប៉ុស្តិ៍ចោមចៅទី២ និងចោមចៅទី៣ ត្រូវបានពង្រាយគ្នាឈរត្រាំទឹក កណ្ដាលផ្លូវ ចាប់តាំងពីវេលាព្រឹកព្រលឹមរហូតដល់យប់ជ្រៅ ដើម្បីសម្រួលចរាចរណ៍ជារៀងរាល់ថ្ងៃតែម្ដង ។ ព្រោះផ្លូវត្រង់ចំណុចនេះបានរងការខូចខាតខ្លាំងមែនទែន ចំណែកឯមធ្យោបាយធ្វើដំណើរមានច្រើនណែនណាន់តាន់តាប់ ជាពិសេសនៅពេលព្រឹក និងពេលល្ងាច ដូច្នេះកងកម្លាំងនគរបាល មិនអាចដកចេញសូម្បីតែ១នាទីបានឡើយ បើហ៊ានតែដក និងកកស្ទះភ្លាមតែម្ដង។
ដូច្នេះហើយមានតែពាក្យថា ស៊ូទ្រាំប៉ុណ្ណោះ ហើយទន្ទឹមនិងនេះដែរ ក៏សំណូមពរដល់បងបប្អូនប្រជាពលរដ្ឋទាំងអស់សុំស្ដាប់តាមការបញ្ជាចរាចរណ៍របស់កងនគរបាលផង កុំចេះតែរុលទៅមុខអត់មានមើលពីស្ថានភាពផ្លូវដែលបង្កឲ្យមានការកកស្ទះកើតឡើង៕
ចែករំលែកព័តមាននេះ